ފަލަސްޠީނުގެ ޣައްޒާއަށް އެއްގަމުން އަރައިގަނެ އެ ސަރަޙައްދުގައި ވެރިކަންކުރާ ޙަމާސް ޖަމާޢަތާ ކުރިމަތުލުމަށް ޢާއްމު ޔަހޫދީންގެ ތާޢީދެއްނެތްކަން ޚިޔާލުހޯދުމުގެ ސަރވޭއަކުން ދައްކައިފިއެވެ.
ޔަހޫދީންގެ ދުވަހު ނޫހެއްކަމަށްވާ މާރިވުން ކުރި ޚިޔާލުހޯދުމުގެ ސަރވޭއަކުން ދައްކާ ގޮތުގައި އެއްގަމުން ޢައްޒާއަށް ވަދެގަންނަން ޔަހޫދީންގެ %49 މީހުން ތާޢީދެއް ނުކުރެއެވެ. އަދި އެއްގަމުން ޣައްޒާއަށް ވަދެގަންނަން ތާޢީދުކުރަނީ އެންމެ %22 މީހުންކަމަށާއި %29 މީހުން ވަކި ގޮތަކަށް ތާޢީދުނުކުރާކަން އެ ސަރވޭއިން ދައްކައެވެ. މީގެ 10 ދުވަސްކުރިން ކުރި ސަަރވޭއަކުން ދެއްކި ގޮތުގައި އެއްގަމުން ޢައްޒާއަށް ވަދެގަންނަން ޔަހޫދީންގެ %65 މީހުން ތާޢީދުކުރެއެވެ. އެހެންކަމުން ފާއިތުވި ދުވަސްތަކުގައި ޣައްޒާގައި ކުރަމުންދާ ހަނގުރާމައާ ގުޅޭގޮތުން ޢާއްމުން ދެކޭގޮތް ވަރަށް ބޮޑަށް ބަދަލުވެފައިވާކަމަށް އެ ނޫހުން ބުނެއެވެ.
އެއްގަމުން ޢައްޒާއަށް ވަދެގަންނަން ޔަހޫދީންގެ %49 މީހުން ތާޢީދު ނުކުރާކަން ސަރވޭއަކުން ދެއްކީ ޙަމާސުން ހައްޔަރުކޮށްފައިވާ 200އަށްވުރެ ގިނަ އަސީރުންގެ ތެރެއިން 50 މީހުން ޔަހޫދީންގެ ވައިގެ ޙަމަލާތަކުގައި މަރުވެފައިވާކަމަށް އެ ޖަމާޢަތުން ބުނެފައިވަނިކޮށެވެ.