ޔަހުދީންނާއި ހަމާސްއާއި ދެމެދު މިހާރު ހިނގަމުންދާ ހަނގުރާމައިގައި، ހަމާސްގެ ބެލުމުގެ ދަށަށް ގެންގޮސްފައިވާ އަސީރުންގެ މައްސަލައިގައި އެއްބަސްވުމަކަށްދާން ޔަހޫދީން ބޭނުންނުވާކަމަށް ހަމާސްގެ ހަތިޔާރުއެޅި ގޮފީގެ ތަރުޖަމާނު ވިދާޅުވެއްޖެއެވެ.
ހަމާސްއިން އާންމުކޮށްފައިވާ ވީޑިއޯއެއްގައި ހަމާސްގެ ހަތިޔާރު އެޅި ގޮފި އިޒުއްދީން އަލް ގައްސާމް ބްރިގޭޑްސްގެ ތަރުޖަމާނު އަބޫ އުބައިދާ ވިދާޅުވީ އެ ޖަމާއަތުން ރަހީނުކޮށްފައިވާ ހުރިހާ މީހުން ދޫކޮށްލާނީ ފަލަސްތީނުގެ ހުރިހާ ގައިދީން މިނިވަންކުރުމުން ކަމަށެވެ. އަދި އަސީރުންގެ މައްސަލައިގައި އެއްބަސްވުމަކަސް އައުމަށް ހަމާސްއަށް ވެސް މަޝްވަރާ ކުރެވިދާނެ ކަމަށް އޭނާ އިތުރަށް ވިދާޅުވިއެވެ. ޔަހޫދީންގެ ހަމަލާތަކުގައި ޣައްޒާއިން މަރުވި މީހުންގެ އަދަދު މިހާރު ވަނީ 8000ށް ވުރެ މަތިވެފައެވެ.
މި މަހުގެ ހަތް ވަނަ ދުވަހުން ފެށިގެން ޔަހޫދީން އަންނަނީ މެދުނުކެނޑި ޣައްޒާއަށް ހަމަލާތައް ދެމުންނެވެ. ޣައްޒާގެ އެތަން މިތަނަށް ކޮންމެ ދުވަހަކުވެސް އަންނަނީ ބޮން އަޅަމުންނެވެ. ޣައްޒާއަށް ކާބޯތަކެއްޗާއި، ފެނާއި، ބޭސްފަރުވާއަށް ބޭނުންވާ ސާމާނު ފޯރިކޮށްދިނުމަށްވެސް ޔަހޫދީން އަންނަނީ ހުރަސް އަޅަމުންނެވެ. މި މަހުގެ 27 ވަނަ ދުވަހު ޣައްޒާގެ މުވާސަލާތީ ޚިދުމަތްވެސް ވަނީ އެއްކޮށް ކަނޑާލާފައެވެ. ޔަހޫދީން މިހާރު ވަނީ އެއްގަމު މަގުން ޣައްޒާއަށް އަރައިގަނެފައެވެ. މިއާއިއެކު ޣައްޒާގެ އިތުރު ލޭއޮހޮރުވުންތައް ހިނގާނެއެވެ.