އެމެރިކާގެ ވާގިވެރިކަމާއެކު ޔަހޫދީ ފައުޖުތަކުން ޣައްޒާގައި ހިންގަމުންދާ ލާއިންސާނީ ޖަރީމާގައި ޝަހީދުކޮށްލާފައިވާ ފަލަސްޠީނުގެ މުސްލިމުންގެ ޢަދަދު 8,005 އަށް އަރައިފިއެވެ. ޣައްޒާގެ ފުރަބަންދު ހަރުކަށިކޮށް، ޔަހޫދީ ފައުޖުތަކުން މުސްލިމުންގެ ގެދޮރަށް ބޮން އަޅައި، އެ މީހުންގެ ލޭހޮރުވައިލަން ފަށާފައި ވަނީ އޮކްޓޫބަރު 7 ވަނަ ދުވަހުއެވެ.
މި ގަތުލުއާންމުގައި ޝަހީދު ކޮށްލާފައިވާ މީހުންގެ ތެރޭގައި 3,300 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ. ޢައްޒާގައި ޒަޚަމު ކޮށްލާފައިވާ މީހުންގެ ޢަދަދު 20,200 އަރާއިރު އޭގެ ތެރޭގައި 2,000 އަށްވުރެ ގިނަ ކުޑަކުދިންނާއި 1,400 އަށްވުރެ ގިނަ އަންހެނުން ހިމެނެއެވެ. ޣައްޒާގެ މުސްލިމުން ދިރިއުޅޭ ގެދޮރުގެ 45 އިންސައްތަ މިހާރު ވަނީ ސުންނާފަތި ކޮށްލާފައެވެ.
ޔަހޫދީންގެ މެދުކެނޑުމެއް ނެތް ހަމަލަތަކާ ގުޅިގެން ޣައްޒާގައި ހާލުގައި ޖެހިފައިވާ މީހުންގެ ޢަދަދު މިލިޔަނަކަށް ވުރެ މައްޗަށް އަރާފައިވާއިރު، ކާބޯތަކެއްޗާއި ބޯފެން ވަނީ ހުސްވެފައެވެ. ފަލަސްޠީނުގެ ރެފިއުޖީންނާ ބެހޭ އ.ދގެ އިދާރާއިން ބުނީ، އެ އިދާރާގެ ގުދަންތަކަށް ވަދެ، ހާލުގައި ޖެހިފައިވާ މީހުން ކާބޯތަކެތި ގެންދަން ފަށާފައިވާ ކަމުގައެވެ.
ޔުނައިޓެޑް ނޭޝަންސް ރިލީފް އެންޑް ވަރކްސް އޭޖެންސީ (ޔޫ.އެން.އާރް.ޑަބްލިޔު.އޭ)ގެ ޑިރެކްޓަރ ތޯމަސް ވައިޓް ވިދާޅުވީ، ހައިހޫނުކަމާ ކުރިމަތިލާން ޖެހިފައިވާ އެތަކެއް ސަތޭކަ މުސްލިމުން އެ އިދާރާގެ ގުދަންތަކަށް ވަދެ، ފުށާއި ގޮވާމުގެ ބާވަތްތައް ގެންގޮސްފައިވާ ކަމުގައެވެ. އަދި، މިއީ ވަރަށް ކަންބޮޑުވާ މައްސަލައެއް ކަމުގައި ވެސް އޭނާ ވިދާޅުވިއެވެ.
"އެ މީހުންގެ ޢާއިލާތަކަށް ކާންބޯން ދޭނެ ގޮތެއް ނެތި، ގޮތް ހުސްވުމުން، މިހާރު އެ ދަނީ ޔޫ.އެން.އާރް.ޑަބްލިޔު.އޭގެ ގުދަންތަކަށް ވަންނަމުން. އަދި، އެ ތަނުގައި ރައްކާކޮށްފައި ހުރި ކާބޯތަކެތި ގެންދަމުން. މިއީ ވަރަށް ކަންބޮޑުވާ މައްސަލައެއް،" ވައިޓް ވިދާޅުވިއެވެ.
އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވެސް ވަނީ، ޣައްޒާގައި ދިރިއުޅޭ މުސްލިމުންގެ ހާލަތު ދުވަހެއް ދުވަހަކަށް ގޯސްވަމުންދާ ކަމުގައި ވިދާޅުވެފައެވެ. "ޣައްޒާއަށް ހަމަލަދިނުން ވަގުތުން ހުއްޓައިލަން ޖެހޭ. ޣައްޒާގައި ހާލުގައި ޖެހިފައިވާ މީހުންނަށް މިހާރުންމިހާރަށް އެހީގެ ސާމާނު ފޯރުކޮށްދޭން ޖެހޭ. އެ މީހުންނަށް ކުރިމަތިކޮށްފައި މި އޮތް މުސީބާތުން އެ މީހުން ސަލާމަތް ކުރަން ޖެހޭ،" ގުތެރޭޝް ވިދާޅުވިއެވެ.
ނަމަވެސް، ޒަޔަނިސްޓު އިސްރާޢީލުން އޮތީ ދޫދޭގޮތަކަށް ނޫނެވެ. ޣައްޒާއަށް ކާބޯތަކެއްޗާއި ފެނުގެ އިތުރުން ބޭސްފަރުވާއަށް ބޭނުންވާ ސާމާނާއި ތެޔޮ އެތެރެ ކުރަން ޔަހޫދީން ދަނީ ހުރަސް އަޅަމުންނެވެ. ޣައްޒާއަށް ބޭނުންވާ އެހީގެ ސާމާނު ބަރު ކޮށްފައިވާ 200 އެއްހާ ލޮރީ ރަފަޙް ހުރަސް ކައިރީގައި ތާށިވެފައި އޮތް އިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާއަށް ވަނުމުގެ ހުއްދަ ދީފައި ވަނީ އެންމެ 84 ލޮރީއަށެވެ.
އޮކްޓޫބަރު 27 ވަނަ ދުވަހު ޣައްޒާއިން ދިން ހަމަލަތަކުގައި އެ ސަހަރުގައި މުވާސަލާތީ ޚިދުމަތްތައް ދިނުމަށް ބޭނުންކުރާ ވަސީލަތްތައް ސުންނާފަތި ކޮށްލައި، ފޯނާއި އިންޓަރނެޓުގެ ޚިދުމަތް ކަނޑައިލާފައިވާއިރު، ފާއިތުވި 24 ގަޑިއިރުގެ ތެރޭގައި ޔަހޫދީ ފައުޖުތަކުން ވަނީ ޣައްޒާގެ 450 އަމާޒަކަށް ވަރުގަދަ ހަމަލަތަކެއް ދީފައެވެ. އެ ހަމަލަތައް އަމާޒު ކޮށްފައި ވަނީ ޙަމާސް ޖަމާޢަތުގެ މުޖާހިދުން ތިބި ޢިމާރާތްތަކަށް ކަމުގައި ޒަޔަނިސްޓު އިސްރާޢީލުން ބުނި ނަމަވެސް، ހަޤީޤަތަކީ ޔަހޫދީންގެ ހަމަލަތައް އަމާޒު ކޮށްފައި ވަނީ ޢާންމުންގެ ގެދޮރަށް ކަމެވެ. ހޮސްޕިޓަލްތަކަށް ކަމެވެ. ސްކޫލްތަކާއި އެމްބިޔުލާންސްތަކަށް ކަމެވެ.
ޔަހޫދީންގެ ހަމަލަތަކާ ގުޅިގެން ޣައްޒާގައި ގެދޮރު ނެތިފައިވާ މީހުންގެ ޢަދަދު 1.4 މިލިޔަނަށް އަރާއިރު، އޭގެ ތެރެއިން 613,000 އަށްވުރެ ގިނަ މީހުން މި ވަގުތު ތިބީ ޔޫ.އެން.އާރް.ޑަބްލިޔު.އޭގެ ބެލުމުގެ ދަށުގައެވެ. އެ ޖަމުޢިއްޔާއިން ހިންގަމުންދާ 150 ހިޔާއެއްގައެވެ. އެ މީހުންނަށް ކާބޯތަކެތި ފޯރުކޮށްދިނުމަށް ހުރަސް އެޅިފައިވާ ކަމުގައި އެ ޖަމުޢިއްޔާއިން ބުނެއެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.