ޔަހޫދީ ފައުޖުތަކުން ޣައްޒާގައި ހިންގަމުންދާ ލާއިންސާނީ ޖަރީމާތައް ހައްދުފަހަނަ އަޅާފައިވާ ކަމަށް ވިދާޅުވެ، އީރާނުގެ ރައީސް އިބްރާހީމް ރައީސީ ޒަޔަނިސްޓު އިސްރާޢީލުން ވަރުގަދަ އިންޒާރެއް ދެއްވައިފިއެވެ. އޮކްޓޫބަރު 7 ވަނަ ދުވަހުން ފެށިގެން އެމެރިކާގެ ވާގިވެރިކަމާ އެކު ޣައްޒާގެ މުސްލިމުންނާ ދެކޮޅަށް ޔަހުދީން ހިންގަމުންދާ ގަތުލުއާންމު ކުށްވެރި ކުރައްވައި ވާހަކަފުޅު ދައްކަވަމުން ރައީސީ ވިދާޅުވީ ޔަހޫދީންނާ ދެކޮޅަށް ތެދުވަން އެހެން ޤައުމުތަކަށް މަޖުބޫރުވަމުންދާ ކަމުގައެވެ.
ޔަހޫދީންގެ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު 8,005 އަށް އަރާފައިވާއިރު، އޭގެ ތެރޭގައި 3,300 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ. ޢައްޒާގައި ޒަޚަމު ކޮށްލާފައިވާ މީހުންގެ ޢަދަދު 20,200 އަރާއިރު އޭގެ ތެރޭގައި 2,000 އަށްވުރެ ގިނަ ކުޑަކުދިންނާއި 1,400 އަށްވުރެ ގިނަ އަންހެނުން ހިމެނެއެވެ. ޣައްޒާގެ މުސްލިމުން ދިރިއުޅޭ ގެދޮރުގެ 45 އިންސައްތަ މިހާރު ވަނީ ސުންނާފަތި ކޮށްލާފައެވެ.
"ޒަޔަނިސްޓު އިސްރާޢީލުން ހިންގަމުންދާ ލާއިންސާނީ ޖަރީމާތައް ހައްދުފަހަނައަޅައި އެތަކެއް 'ރަތް ރޮނގެއް' ހުރަސް ކޮށްފި. މި ކަން މި ގޮތުގައި ކުރިއަށްދާ ނަމަ، އެހެން ޤައުމުތަކަށް މި ހަނގުރާމައިގެ ތެރެއަށް ވަންނަން މަޖުބޫރުވާނެ. އެމެރިކާއިން ގޮވައިލަމުން އެ ދަނީ މި ހަނގުރާމައިގެ ތެރެއަށް ބޭރުގެ ފަރާތްތަކުން ނުވަންނަން. އަތް ނުބާނަން. ނަމަވެސް، އެމެރިކާއިން އެ ދަނީ އަތްބާނައި، ޔަހޫދީންނަށް އެހީތެރިކަން ފޯރުކޮށްދެމުން،" ރައީސީ ވިދާޅުވިއެވެ.
ޔަހޫދީ ފައުޖުތަކުން ޣައްޒާގެ ނިކަމެތި މުސްލިމުންނާ ދެކޮޅަށް ފަށާފައިވާ ހަނގުރާމައިގެ ތެރެއަށް ވަންނަން މަޖުބޫރުވަމުންދާ ކަމުގައި ރައީސީ ވިދާޅުވެފައިވީ ނަމަވެސް، އެ ކަމާ މެދު އަޅުއްވާނީ ކޮން ފިޔަވަޅުތަކެއް ކަން ހާމަ ކުރައްވާފައެއް ނުވެއެވެ. ނަމަވެސް، ސޫރިޔާއާއި އިރާޤުގައި ހަރަކާތްތެރިވާ ޖަމާޢަތްތަކުން އެމެރިކާގެ އަސްކަރީ މަރުކަޒުތަކަށް ދާދި ފަހުން ހަމަލަތަކެއް ދީފައިވާ ކަން ފާހަގަ ކޮށްލަން ޖެހެއެވެ.
އީރާނުން ވާގިވެރިވާ މުޖާހިދުންގެ ޖަމާޢަތްތަކުގެ ތެރޭގައި ޙަމާސް އަދި ލުބުނާނުގައި ހަރަކާތްތެރިވާ ޙިޒްބުالله ހިމެނެއެވެ. އީރާނުން އެހީތެރިކަން ފޯރުކޮށްދޭ ހަތިޔާރު އެޅި ޖަމާޢަތްތައް އިރާޤާއި ސޫރިޔާގައި ވެސް ހަރަކާތްތެރިވެއެވެ. މީގެ އިތުރުން، ޔަމަނުގައި ހަރަކާތްތެރިވާ ހޫޘީންނަކީ ވެސް އީރާނުން ވާގިވެރިވެދޭ ޖަމާޢަތެއް ކަން ފާހަގަ ކޮށްލަން ޖެހެއެވެ. އެ ހުރިހާ ޖަމާޢަތްތައް އެކުވެ، ޔަހޫދީންނާ ދެކޮޅަށް ތެދުވެއްޖެ ނަމަ، ޔަހޫދީންނާއި އެ މީހުންނަށް ވާގިވެރިވާ ޤައުމުތަކަށް ދަތި އަދި އުނދަގޫ ހަނގުރާމައަކާ ކުރިމަތިލާން ޖެހޭނެ ކަމަށް މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.