ޔަހޫދީ ފަސިންޖަރުންނާއެކު ރަޝިޔާގެ ދާގެސްތާނަށް ޖައްސަން އުޅުނު މަތިންދާބޯޓަކަށް ހުރަސްއަޅައިފިއެވެ.
މަޢުލޫމާތު ލިބިފައިވާ ގޮތުގައި ގިނަ ޢަދަދެއްގެ މުސްލިމުން ދިރިއުޅޭ ދާގެސްތާނުގެ ވައިގެ ބަނދަރަށް ޖައްސަން މަސައްކަތްކުރީ ރަޝިޔާގެ އަމިއްލަ އެއަރލައިނެއްކަމަށްވާ ރެޑް ވިންގެވެ. އެ ފްލައިޓް ހުއްޓުވުމަށް ގިނަ ޢަދަދެއްގެ ބަޔަކުވަނީ ދާގެސްތާނުގެ ވައިގެ ބަނދަރަށް ގަދަކަމުން ވަދެގަނެފައެވެ. ސަލާމަތީ ބާރުތަކުން އެ ސަރަޙައްދުން އެ މީހުން ނެރެން ޖެހުނީ ބާރުގެ ބޭނުންކޮށްގެންނެވެ.
އެ ހާދިޘާއާ ގުޅޭގޮތުން ޔަހޫދީންގެ ބޮޑުވަޒީރު ބުންޔާމިން ނެތެންޔާހޫވަނީ ޔަހޫދީންގެ ރައްކާތެރިކަން ކަށަވަރުކޮށްދޭން ޖެހޭކަމަށް ވިދާޅުވެފައެވެ. އެމެރިކާއިންވަނީ ޔަހޫދީންނާ ދެކޮޅަށް ހިންގާ ނޭގާނީ ޢަމަލުތައް ކުށްވެރިކޮށްފައެވެ. ޔަހޫދީން ރަޝިޔާއަށް އައުން ހުއްޓުވުމަށް ދާގެސްތާނުގައި ދިރިއުޅޭ މުސްލިމުން މަސައްކަތްކުރީ ފަލަސްޠީނުގެ ޣައްޒާއަށް ވަރުގަދަ ޙަމަލާތަކެއް ޔަހޫދީން ދެމުންދާ ދަނޑިވަޅެއްގައެވެ. އެ ޙަމަލާތަކުގައި 8،000އަށްވުރެ ގިނަ މީހުންވަނީ ޝަހީދުވެފައެވެ. އޭގެ ތެރޭގައި 3،000އަށްވުރެ ގިނަ ކުޑަކުދިން ހިމެނެއެވެ.
ދާގެސްތާނުގެ ވައިގެ ބަނދަރު މިހާރުވަނީ ނޮވެންބަރު މަހުގެ 6ވަނަ ދުވަހާ ހަމައަށް ބަންދުކޮށްފައެވެ.