އޮކްޓޯބަރު މަހުގެ 7ވަނަ ދުވަހުން ފެށިގެން ޔަހޫދީން އިސްރާއީލުގެ ފައުޖުތަކުން ޣައްޒާއަށް ދެމުންދާ ވަރުގަދަ ޙަމަލާތަކުގައި 34 ނޫސްވެރިން ޝަހީދުކޮށްލައިފިއެވެ.
އިސްރާއީލުން ޣައްޒާއަށް ޙަމަލާ ދެމުން އަންނަތާ 23 ދުވަސް ވެފައިވާއިރު، އެ ސަރަޙައްދުން 34 ނޫސްވެރިން ޝަހީދުވެފައިވާކަމަށް ޣައްޒާގެ ހެލްތު މިނިސްޓްރީން ނެރުނު ބަޔާނެއްގައި ވަނީ ފާހަގަކޮށްފައެވެ. އަދި ޝަހީދުކޮށްލައިފައިވާ ނޫސްވެރިންގެ ނަންތައް އެ ބަޔާނުގައި އާއްމުކުރައްވާފައިވެއެވެ.
ޝަހީދުކޮށްލައިފައިވާ 34 ނޫސްވެރިންގެ ތެރޭގައި 3 އަންހެން ނޫސްވެރިން ހިމެނޭކަމަށާ ގިނަ ނޫސްވެރިންތަކެއްގެ އާއިލާ މެމްބަރުންވެސް ޝަހީދުވެފައިވާކަމަށް ޣައްޒާގެ ހެލްތް މިނިސްޓްރީން ނެރުނު ބަޔާނުގައި ވެއެވެ.
އޮކްޓޯބަރު 25 ވަނަ ދުވަހު ނޫސެއިރާތު ރެފިއުޖީ ކޭމްޕްގެ ގެއަކަށް އިސްރާއީލުން ދިން ހަމަލާއެއްގައި އަލްޖަޒީރާގެ މުވައްޒަފު ވައެލް އަލް ދަހުދޫގެ އާއިލާގެ މެމްބަރުން ޝަހީދުވެފައިވާއިރު، އޭގެ ތެރޭގައި އޭނާގެ އަންހެނުންނާއި ދަރިފުޅާއި އަންހެން ދަރިފުޅު ހިމެނެއެވެ.
މީގެ އިތުރުން، އިސްރާއީލާއި ލުބުނާނުގެ ބޯޑަރުގައި ހިނގި ހަމަނުޖެހުންތަކުގައި އިސްރާއީލުން ދިން ހަމަލާތަކެއްގައި ލުބުނާނުގެ ނޫސްވެރިއެއްގެ ފުރާނަވެސް ވަނީ ގެއްލިފައެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ.