ޔަހޫދީ ފައުޖުތަކުން ހުޅަނގު އައްސޭރީގެ ދެ ރަށަކަށް އަރައި ފަލަސްޠީނުގެ ފަސް މީހުން ޝަހީދު ކޮށްލައިފިއެވެ. އެމެރިކާގެ އެހީތެރިކަމާ އެކު އޮޕަރޭޓު ކުރާ ޔަހޫދީ ފައުޖުގެ ސިފައިން އަރައި އުދުވާންތައް ހިންގާފައި ވަނީ ޖިނީނާއި ޚަލީލްގައެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޖިނީންގައި ހިންގި ލާއިންސާނީ ޖަރީމާތަކުގައި ފަލަސްޠީނުގެ ހަތަރު މީހުން ޝަހީދު ކޮށްލި ކަމުގައެވެ. ފަސްވަނަ މީހާ ޝަހީދު ކޮށްލާފައި ވަނީ ޚަލީލްގައެވެ.
އެ ވުޒާރާއިން ބުނީ، ޔަހޫދީންގެ ޝިކާރައަކަށްވެ ޝަހީދުވެފައި ވަނީ އުމުރުން 23 އާއި 28 އަހަރާ ދެމެދުގެ މީހުން ކަމުގައެވެ. ޖިނީން ރެފިއުޖީ ކޭމްޕަށް ޔަހޫދީ ފައުޖުތަކުން އަރާފައި ވަނީ ފަތިހުގެ ވަގުތުގައެވެ. އެ ކޭމްޕުގައި ހިންގި ލާއިންސާނީ އުދުވާނުގައި އިތުރު ނުވަ މީހުން ޒަޚަމު ކޮށްލާފައިވާ ކަމުގައި ވެސް އެ ވުޒާރާއިން ބުނެއެވެ.
މަންޒަރު ފެނުނު މީހުން ބުނީ ޔަހޫދީ ފައުޖުގެ ސިފައިން ޖިނީން ރެފިއުޖީ ކޭމްޕަށް އަރާފައި ވަނީ 100 އެއްހާ އުޅަނދުގައި ކަމުގައެވެ. އަދި، އެ އުޅަނދުތަކާ އެކު ބުލްޑޯޒަރެއް ވެސް ޖިނީން ރެފިއުޖީ ކޭމްޕަށް ވަދެފައިވާ ކަމަށާއި، އެ އުޅަނދު ބޭނުންކޮށްގެން ފަލަސްޠީނުގެ ކުށެއް ނެތް މުސްލިމުން ދިރިއުޅޭ ގެދޮރާއި މުދަލަށް ގެންލުން ދީފައިވާ ކަމުގައި ވެސް މަންޒަރު ފެނުނު މީހުން ބުންޏެވެ. ޔަހޫދީން ގެއްލުން ދީފައިވާ ޢިމާރާތްތަކުގެ ތެރޭގައި ޖިނީންގެ ހޮސްޕިޓަލް ވެސް ހިމެނެއެވެ.
ޚަލީލަށް އަރައި ހިންގި އުދުވާނުގައި ޝަހީދު ކޮށްލާފައި ވަނީ 23 އަހަރުގެ ޒުވާނެއް ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުނެއެވެ. މި އުދުވާންތައް ހިންގާފައި ވަނީ، ޔަހޫދީންގެ ޢާންމުންގެ މީހަކު ދިން ހަމަލައެއްގައި ޚަލީލްގައި އިތުރު މީހަކު ޝަހީދު ކޮށްލާފައިވާ ދަނޑިވަޅެއްގައެވެ. އެއީ ވެސް 23 އަހަރުގެ މީހެއް ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުނެއެވެ.
އޮކްޓޫބަރު 29 ވަނަ ދުވަހު ވެސް ޔަހޫދީ ފައުޖުތަކުން ވަނީ ހުޅަނގު އައްސޭރިއަށް އަރައި އުދުވާންތަކެއް ހިންގާފައެވެ. އެ ދުވަހު ވެސް ފަލަސްޠީނުގެ ފަސް މީހުން ޝަހީދު ކޮށްލިއެވެ. އޮކްޓޫބަރު 7 ވަނަ ދުވަހުން ފެށިގެން މިއަދާ ހަމައަށް ޔަހޫދީ ފައުޖުން ހުޅަނގު އައްސޭރީގައި ހިންގާފައިވާ ޖަރީމާތަކުގައި ޝަހީދު ކޮށްލާފައިވާ މީހުންގެ ޢަދަދު ވަނީ 120 އަށް އަރާފައެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ދަނީ ޣައްޒާއަށް ވެސް ރަޙުމު ކުޑަ ހަމަލަތަކެއް ދެމުންނެވެ. ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު 8,306 އަށް އަރާފައިވާއިރު، އޭގެ ތެރޭގައި 3,300 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ. ޢައްޒާގައި ޒަޚަމު ކޮށްލާފައިވާ މީހުންގެ ޢަދަދު 20,200 އަރާއިރު އޭގެ ތެރޭގައި 2,000 އަށްވުރެ ގިނަ ކުޑަކުދިންނާއި 1,400 އަށްވުރެ ގިނަ އަންހެނުން ހިމެނެއެވެ. ޣައްޒާގެ މުސްލިމުން ދިރިއުޅޭ ގެދޮރުގެ 45 އިންސައްތަ މިހާރު ވަނީ ސުންނާފަތި ކޮށްލާފައެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.