މެދުއިރުމަތީގައި ތިބި އެމެރިކާ ސިފައިންނަށް ދިން ހަމަލާތަކަކީ އެމެރިކާގެ ގޯސް ސިޔާސަތުތަކުގެ ނަތީޖާ: އީރާން

އިރާގާއި އެ ސަރަހައްދުގެ އެހެން ގައުމުތަކުގައި ތިބި އެމެރިކާ ސިފައިންނަށް ދިން ހަމަލާތަކަކީ ހަމާސްއާ ދެކޮޅަށް ޔަހޫދީން ކުރާ ހަނގުރާމައަށް އެމެރިކާ ތާއީދު ކުރުމުންނާއި، އެމެރިކާއިން ގެންގުޅޭ ގޯސް ސިޔާސަތުތަކެއްގެ ނަތީޖާ ކަމަށް އީރާނުން ބުނެފިއެވެ.

މި މަހުގެ 7 ވަނަ ދުވަހު ޔަހޫދީންނާއި ފަލަސްތީނުގެ ހަމާސްއާއި ދެމެދު ފެށި ހަނގުރާމައަށްފަހު، އިރާގާއި ސޫރިއާގައި ތިބި އެމެރިކާ ސިފައިންނަށް ތަކުރާރުކޮށް ހަމަލާތައް ދީފައިވާ ކަމަށް އެމެރިކާގެ އަސްކަރީ މަރުކަޒު، ޕެންޓެގަން އިން ވަނީ ބުނެފައެވެ.

"މި ސަރަހައްދުގައި ހާއްސަކޮށް އިރާގުގައި ހުރި އެމެރިކާގެ މަރުކަޒުތަކަށް ދިން ހަމަލާއަކީ އެ ސަރަހައްދުގައި އެމެރިކާއިން ގެންގުޅޭ ގޯސް ސިޔާސަތުތަކުގެ ނަތީޖާ. އެކަން އިސްލާހު ކުރާނެ ކަމަށް އުންމީދު ކުރަން." އީރާނުގެ ހާރިޖީ ވުޒާރާގެ ތަރުޖަމާނު ނާސިރު ކަނާނީ ވިދާޅުވިއެވެ.

އެމެރިކާގެ މަރުކަޒުތަކަށް ހަމަލާތައް ޔަހޫދީން ފަލަސްތީނުގެ ޣައްޒާގެ ކުށެއްނެތް އާންމުންނަށް ދެމުން ގެންދާ ލާއިންސާނީ ހަމަލާތަކަށް އެމެރިކާއިން ތާއީދުކުރުމާ ސީދާ ދެކޮޅު ގްރޫޕްތަކުން ކަމަށްވެސް ނާސިރު އިތުރަށް ވިދާޅުވިއެވެ.

މި މަހުގެ 7 ވަނަ ދުވަހު ޔަހޫދީންނާ ދެކޮޅަށް ހަމާސްއިން ދިން ހަމަލާއަކީ ހަމާސްއަށް ލިބުނު ކާމިޔާބީއެއް ކަމަށް ބުނެ އިރާނުން ވަނީ އެ ޖަމާއަތަށް ތައުރީފް ކޮށްފައެވެ. ނަމަވެސް ހަމާސްގެ އެ ހަމަލާގައި މާލީ ގޮތުންނާއި އަސްކަރީ ގޮތުން ހަމާސްއަށް ތާއީދުކުރާ، އީރާނުގެ އަތެއް ނުވާ ކަމަށް އެ ގައުމުން މިހާތަނަށްވެސް އަންނަނީ ބުނަމުންނެވެ.
ޔަހޫދީންގެ ފައުޖުތަކުން އެއްގަމު މަގުން ޣައްޒާއަށް ހަމަލާ ދިން ނަމަވެސް އެކަމަށް ހަމާސް އިން އޮތީ ތައްޔާރަށް ކަމަށް އީރާން ސިފައިންގެ ޗީފް އޮފް ސްޓާފް މުހައްމަދު ބަގޭރީ ހޯމަ ދުވަހު ވަނީ ވިދާޅުވެފައެވެ.

ފަލަސްތީނުގެ އަންހެނުންނަށާއި ކުޑަކުދިންނަށް ޔަހޫދީން ދެމުން އަންނަ ލާއިންސާނީ އަނިޔާތައް ކުށްވެރިކޮށް، ހަނގުރާމަ މިހާރުން މިހާރަށް ހުއްޓާލުމަށް ގޮވާލައި އީރާނުގައި ތިބި ޔަހޫދީން ހިމެނޭހެން އެ ގައުމުގެ 200 އެއްހާ މީހުން ހޯމަ ދުވަހު ތެހެރާންގައި ވަނީ މުޒާހަރާވެސް ކޮށްފައެވެ. ހަމާސް އާއި ޔަހޫދީންގެ ހަނގުރާމައަށް ސަރަހައްދުގެ އެހެން ގައުމުތަކުން ވަންނަން ޖެހިދާނެ ކަމަށްވެސް އިރާނުން ތަކުރާރުކޮށް އަންނަނީ ބުނަމުންނެވެ. މީގެއިތުރުން މުސްލިމުންނާ އެއްކޮޅަށް މަސައްކަތްކުރާ ގްރޫޕްތަކަށް ތާއީދު ކުރުމަކީ އެމީހުންގެ ވާޖިބެއް ކަމަށާއި ނަމަވެސް އަމަލުތަކާއި،ހިޔާލުތަކަކީ އެމީހުންގެ އަމިއްލަ ނިންމުމެއް ކަމަށް އީރާނުގެ ރައީސް އިބްރާހީމް ރައީސީ ވަނީ ވިދާޅުވެފައެވެ.
އަނެއްކޮޅުން މެދުއިރުމަތީގައި އެމެރިކާއާ ދެކޮޅަށް ހަނގުރާމަ ކުރުމަށް އީރާނުން މަގުފަހިކޮށްދޭ ކަމަށް އެމެރިކާއިން ތުހުމަތުކުރެއެވެ. އައިއެސްއާ ދެކޮޅަށް މަސައްކަތް ކުރުމަށް އިރާގުގައި އެމެރިކާގެ 2500 ސިފައިން ތިބިއިރު، ސޫރިއާގައި 900 ސިފައިން މިހާރު އެބަތިއްބެވެ.