ޔަހޫދީ އިސްރާއީލުގެ ފައުޖުތަކުން ޣައްޒާގައި ހިންގަމުންދާ ލާއިންސާނީ ޖަރީމާތަކާ ގުޅިގެން ބޮލީވިއާއިން އިސްރާއީލާ ޚާރިޖީ ގުޅުން ކަނޑާލައިފިއެވެ.
ބޮލީވިއާއިން ރަސްމީކޮށް މިކަން ހާމަކުރީ ނޫސްވެރިންގެ ބައްދަލުވުމެއްގައި އެ ޤައުމުގެ ޚާރިޖީ ވުޒާރާގެ ނާއިބު، ފްރެޑީ މަމަނީއެވެ. ފްރެޑީ ވަނީ ޔަހޫދީން ޣައްޒާގެ އާންމުންނަށް ދެމުންގެންދާ ލާއިންސާނީ އަމަލުތައް ވަރަށް ބޮޑަށް ކުށްވެރި ކުރައްވާފައެވެ.
މިއާއެކު ފަލަސްތީނު މައްސަލައިގައި ޔަހޫދީ އިސްރާއީލާއެކު އޮތް ޚާރިޖީ ގުޅުން ނިމުމަކަށް ގެނައިކަން އިޢުލާންކުރި ފުރަތަމަ ޤައުމުތަކުގެ ތެރޭގައި ބޮލީވިއާ ވަނީ ހިމެނިފައެވެ.
ހަނގުރާމައިގެ ސަބަބުން ވަރަށް ބޮޑަށް އެހީގެ ބޭނުންޖެހިފައިވާ ޣައްޒާގެ ރައްތިންނަށް އެހީ ފޯރުކޮށްދެވާނެކަމަށް ބޮލީވިއާގެ މިނިސްޓަރ އޮފް ޕްރެޒިޑެންސީ މާރިއާ ނެލާ ނޫސްވެރިންގެ ބައްދަލުވުމުގައި ވަނީ ވިދާޅުވެފައެވެ. އަދި މިހާރުވެސް ކުށެއްނެތް މައުސޫމް އެތައް ބަޔަކު ގަސްދުގައި މަރާ،ގެ ދޮރު ދޫކޮށް ދިއުމަށް މަޖުބޫރު ކުރަމުންދާ ހަނގުރާމަ މިހާރުން މިހާރަށް ހުއްޓާލުމަށްވެސް އެކަމަނާ ވަނީ ގޮވާލައްވާފައެވެ.
ބޮލީވިއާގެ މި ނިންމުމަށް ޙަމާސްއިން ވަނީ މަރުހަބާ ކިޔާފައެވެ. ޔަހޫދީ އިސްރާއީލާ ގުޅުން ޤާއިމުކޮށްފައިވާ އަރަބި ޤައުމުތަކުންވެސް އެ ޤައުމާ ގުޅުން ކަނޑާލުމަށް ހަމާސްއިން ވަނީ ގޮވާލާފައެވެ. ބޮލީވިއާއިން އިސްރާއީލާއެކު އޮތް ޚާރިޖީ ގުޅުން ކަނޑާލިއިރު، ލެޓިން އެމެރިކާގެ އިތުރު ދެ ޤައުމު ކަމަށްވާ، ކޮލަމްބިއާ އާއި ޗިލީންވެސް ވަނީ ތެލް އަވީވްގައި ތިބި އިސްރާއީލްގެ ސަފީރުން އަނބުރާ ޤައުމަށް ދިއުމަށް ގޮވާލާފައެވެ. އަދި ޣައްޒާގެ އާންމުންނަށް ދެމުންގެންދާ ހަމަލާތައް ކުށްވެރިކޮށް، ހަނގުރާމަ ހުއްޓާލުމަށް އެ ދެ ޤައުމުންވެސް ވަނީ ގޮވާލާފައެވެ. މެކްސިކޯއާއި ބްރެޒިލް ހިމެނޭ ގޮތަށް އެހެން ލެޓިން އެމެރިކާ ޤައުމުތަކުންވެސް ވަނީ ހަނގުރާމަ ހުއްޓާލުމަށް ގޮވާލާފައެވެ.
ތާރީޚީ ގޮތުން ބަލާއިރު، ލެޓިން އެމެރިކާގެ ވާތު ފިޔައިގެ ޤައުމުތަކުން ފަލަސްތީނަށް ތާއީދުކުރާއިރު، ކަނާތު ފިޔައިގެ ޤައުމުތައް ތާއީދު ކުރަނީ އިސްރާއީލާ އެމެރިކާ އަށް ކަން ފާހަގަކޮށްލެވެއެވެ. އަރަބި ދުނިޔޭގެ އިތުރުން، ފަލަސްތީނުގެ އެންމެ ގިނަ މީހުން ދިރިއުޅެނީ ޗިލީގައެވެ. ޣައްޒާގައި ޔަހޫދީ އިސްރާއިލުން ދެމުންދާ ހަމަލާތަކުގައި، މަރުވި މީހުންގެ ތެރޭގައި ލެޓިން އެމެރިކާގެ ބައެއް ޤައުމުތަކުން މަދުވެގެން 13 މީހުން ހިމެނޭއިރު، އިތުރު 21 މީހުން ވަނީ ވީނުވީއެއްނޭގި ގެއްލިފައެވެ.
ޔަހޫދީ އިސްރާއީލުން ޣައްޒާގައި ހިންގި ލައިންސާނީ އަމަލުތަކާއި ހެދި، ބޮލީވިއާއިން މީގެކުރިންވެސް ވަނީ އިސްރާއީލާ ޚާރިޖީ ގުޅުން ކަނޑާލާފައެވެ. 2009 ވަނަ އަހަރު ކަނޑާލާފައިވާ ގުޅުން އަލުން ގާއިމުކުރީ 2020 ވަނަ އަހަރު ރައީސް ޖެނީން އަނޭޒްގެ ވެރިކަމުގައެވެ.