އެމެރިކާގެ އެހީތެރިކަމާއެކު ޒަޔަނިސްޓު އިސްރާޢީލުން ޣައްޒާގައި ހިންގަމުންދާ ފުރަބަންދާއި، އެ ސަހަރަށް މެދުކެނޑުމެއް ނެތި ދެމުންދާ ރަޙުމު ކުޑަ ހަމަލަތަކާ ގުޅިގެން އެ ސަހަރުގައި ހުންނަ ކެންސަރު ބައްޔަށް ފަރުވާދޭ ހަމައެކަނި ހޮސްޕިޓަލް ބަންދު ކޮށްފިއެވެ. އެ ހޮސްޕިޓަލް ބަންދު ކުރަން ޖެހިފައި ވަނީ، އެ ތަނަށް ކަރަންޓުގެ ޚިދުމަތް ދިނުމަށް ބޭނުންވާ ތެޔޮ ހުސްވުމާ ގުޅިގެންނެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ވަނީ ޣައްޒާގެ ފުރަބަންދު އިތުރަށް ހަރުކަށި ކޮށްފައެވެ. ކާބޯތަކެއްޗާއި، ފެނާއި، ބޭސްފަރުވާގެ ސާމާނުގެ އިތުރުން ތެޔޮ އެތެރެ ކުރަން ހުރަސް އަޅާފައެވެ. ޞިއްޙީ ފަރުވާދޭ މަރުކަޒުތަކަކީ ކަރަންޓުގެ ޚިދުމަތާ ނުލައި ހިންގޭނެ ތަންތަނެއް ނޫނެވެ. އަދި، ތެޔޮ ހުސްވުމުގެ ސަބަބުން މިހާރު ވެސް ގިނަ ޢަދަދެއްގެ ހޮސްޕިޓަލާއި ޞިއްޙީ ފަރުވާދޭ މަރުކަޒުތައް ވަނީ ބަންދުކޮށްފައެވެ.
ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު 8,796 އަށް އަރާފައިވާއިރު، އޭގެ ތެރޭގައި 3,648 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ.
ޣައްޒާގައި ހުންނަ ކެންސަރު ބައްޔަށް ފަރުވާދޭ ހަމައެކަނި ހޮސްޕިޓަލަކީ ޓަރކިޝް-ޕަލަސްޓީނިޔަން ފްރެންޑްޝިޕް ހޮސްޕިޓަލެވެ. އެ ތަނުގެ ޑިރެކްޓަރު ޞުބްޙީ ސްކީކް ވިދާޅުވީ، އެ ތަނަށް ކަރަންޓުގެ ޚިދުމަތް ފޯރުކޮށްދިނުމަށް ބޭނުންކުރާ ތެޔޮ ހުސްވުމާ ގުޅިގެން، އެ ތަނުގެ ފަރުވާއަށް ހުރަސް އެޅިފައިވާ ކަމުގައެވެ. އެއީ، ގިނަ ޢަދަދެއްގެ ބަޔަކަށް ފަރުވާ ކުރަމުން ދިޔަ ހޮސްޕިޓަލެއް ކަމުގައި ވެސް އޭނާ ވިދާޅުވިއެވެ.
ފަލަސްޠީނުގެ ޞިއްޙަތާ ބެހޭ ވަޒީރު މައި އަލް-ކީލާ ވެސް ވަނީ އެ ހޮސްޕިޓަލް ބަންދުކޮށް، ކެންސަރު ބައްޔަށް ފަރުވާ ދިނުން މެދުކެނޑިފައިވާ ކަން ކަށަވަރު ކޮށްދެއްވާފައެވެ. އެއާ އެކު، ކަރަންޓު ދޭނެ ގޮތެއް ނެތިގެން ބަންދު ކުރަން ޖެހިފައިވާ ހޮސްޕިޓަލްތަކުގެ ޢަދަދު 16 އަށް އަރާފައިވާ ކަމުގައި އަލް-ކީލާ ވިދާޅުވިއެވެ.
"ކެންސަރު ހޮސްޕިޓަލުގައި އެޑްމިޓު ކޮށްގެން ފަރުވާ ހޯދަމުން ދިޔަ 70 އަށްވުރެ ގިނަ މީހުންގެ ފުރާނަ މިވަނީ ނުރައްކަލަށް ހުށަހެޅިފައި،" އޭނާ ވިދާޅުވިއެވެ. ޣައްޒާގައި ކެންސަރު ބައްޔަށް ފަރުވާ ހޯދާ ބަލި މީހުންގެ ޢަދަދު 2,000 އަށްވުރެ އިތުރުވާނެ ކަމުގައި ވެސް އަލް-ކީލާ ވިދާޅުވިއެވެ.
ޢައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ގަތުލުއާންމުގައި ޒަޚަމު ކޮށްލާފައިވާ މީހުންގެ ޢަދަދު 20,200 އަރާއިރު އޭގެ ތެރޭގައި 2,000 އަށްވުރެ ގިނަ ކުޑަކުދިންނާއި 1,400 އަށްވުރެ ގިނަ އަންހެނުން ހިމެނެއެވެ. ޣައްޒާގެ މުސްލިމުން ދިރިއުޅޭ ގެދޮރުގެ 45 އިންސައްތަ މިހާރު ވަނީ ސުންނާފަތި ކޮށްލާފައެވެ.