ޒަޔަނިސްޓު އިސްރާޢީލަށް އުރުދުނުން ކަނޑައަޅާފައި ހުންނަވާ ސަފީރު އަނބުރާ ޤައުމަށް ގެންދަން ނިންމަވާފައިވާ ކަން އުރުދުންގެ ޚާރިޖީ ވަޒީރު އައިމަން ޞަފްދީ ހާމަ ކުރައްވައިފިއެވެ. މި ގޮތަށް އަމަލު ކުރަން އުރުދުންގެ ސަރުކާރުން ނިންމާފައި މި ވަނީ، އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގެ ކުށެއް ނެތް މުސްލިމުންނާ ދެކޮޅަށް ހިންގަމުންދާ ލާއިންސާނީ ގަތުލުއާންމު ހުއްޓައިނުލުމުން އެ ކަމާ މެދު ނުރުހުން ފާޅު ކުރުމުގެ ގޮތުންނެވެ.
ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު 8,796 އަށް އަރާފައިވާއިރު، އޭގެ ތެރޭގައި 3,648 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ.
"ތެލް އަވީވުގައި ހުންނަވާ އުރުދުންގެ ސަފީރު އަނބުރާ ޤައުމަށް ގެންނަން ނިންމާފައި މި ވަނީ، ޔަހޫދީ ފައުޖުތަކުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތައް ހުއްޓައިނުލާތީ އެ ކަމާ ނުރުހުން ފާޅު ކުރުމުގެ ގޮތުން. ސަފީރު ދެން އެނބުރި އިސްރާޢީލަށް ވަޑައިގަންނަވާނީ ޔަހޫދީން ހިންގަމުންދާ ގަތުލުއާންމު ހުއްޓައިލުމުން،" ޞަފްދީ ވިދާޅުވިއެވެ.
އުރުދުނަކީ އެމެރިކާއާ ވަރަށް ގާތް ގުޅުންތަކެއް ބާއްވަމުންދާ ޤައުމެކެވެ. ޣައްޒާގެ މުސްލިމުންނާ ދެކޮޅަށް ޔަހޫދީން ލާއިންސާނީ ޖަރީމާތައް ހިންގަމުން ދަނީ އެމެރިކާގެ ފުރިހަމަ އެއްބާރުލުމާއި އެހީތެރިކަމާ އެކުގައި ކަން ފާހަގަ ކޮށްލަން ޖެހެއެވެ. އެމެރިކާއިން ދަނީ ޣައްޒާއަށް ބޮން އެޅުން ހުއްޓައިނުލުމަށް ޔަހޫދީންނަށް ބާރު އަޅަމުންނެވެ. އަދި، އުދުވާންތައް ހުއްޓުވަން އ.ދގެ ސަލާމަތީ މަޖިލީހާއި ބައިނަލްއަޤުވާމީ މުޖުތަމަޢުން ކުރަމުންދާ ހުރިހާ މަސައްކަތަކަށް ހުރަސް އަޅަމުންނެވެ.
ޣައްޒާގައި ތަންފީޒު ކުރަމުންދާ ފުރަބަންދު އިތުރަށް ހަރުކަށި ކޮށްފައިވާތީ އެ ކަމާ ގުޅޭ ގޮތުން ވާހަކަފުޅު ދައްކަވަމުން ޞަފްދީ ވިދާޅުވީ، ފަލަސްޠީނުގެ ކުށެއް ނެތް އެތަކެއް މިލިޔަން މުސްލިމުން ކާބޯތަކެއްޗާއި ބޯފެނުން މަހުރޫމު ކުރުވުމަކީ ބަލައިގަނެވޭނެ ކަމެއް ނޫން ކަމުގައެވެ. އަދި، އުރުދުންގައި ހުންނަ އިސްރާޢީލުގެ ސަފީރަށް ވެސް އެނބުރި އުރުދުނަށް އައުމުގެ ހުއްދަ ދޭނީ، ޣައްޒާގައި ހިންގަމުންދާ ގަތުލުއާންމު ނިމުމަކަށް ގެނައުމުން ކަމުގައި ވެސް ޞަފްދީ ވިދާޅުވިއެވެ.
އިސްރާޢީލުގެ ލާއިންސާނީ ޖަރީމާތަކާ އެކު، މެދުއިރުމަތީގެ ސުލްޙައަށް ހުރަސް އެޅިފައިވާ ކަމަށާއި، އެ ސަރަޙައްދު ހަމަނުޖެހުން ގަނޑެއްގެ ތެރެއަށް ވެއްޓުނު ބިރު އުތުރުވަމުންދާ ކަމުގައި ޞަފްދީ ވިދާޅުވިއެވެ. އަދި، އުދުވާންތައް ހުއްޓައިލުމަށް ޚާރިޖީ ދާއިރާއިން ޒަޔަނިސްޓު އިސްރާޢީލަށް ބާރުއެޅުމުގައި އުރުދުން ދެމި އޮންނާނެ ކަމުގައި ވެސް އޭނާ ވިދާޅުވިއެވެ.
ތެލް އަވީވުގައި ހުންނަވާ އުރުދުންގެ ސަފީރު އަނބުރާ ޤައުމަށް ގެންދަން ނިންމާފައި މި ވަނީ، ޒަޔަނިސްޓު އިސްރާޢީލާ އެކު އޮތް ސިޔާސީ ގުޅުން މެދުކަނޑައިލާފައިވާ ކަން ބޮލީވިޔާއިން އިޢުލާނު ކޮށްފައިވާ ދަނޑިވަޅެއްގައެވެ. އެއީ، ދެކުނު އެމެރިކާގެ ޤައުމެކެވެ. ބޮލީވިޔާއަކީ، ޣައްޒާގައި ޔަހޫދީން މިހާރު ހިންގަމުންދާ ލާއިންސާނީ ޖަރީމާތަކާ ގުޅިގެން ޒަޔަނިސްޓު އިސްރާޢީލާ އެކު އޮތް ސިޔާސީ ގުޅުންތައް ނިމުމަކަށް ގެނައި ފުރަތަމަ ޤައުމު ކަން ފާހަގަ ކޮށްލަން ޖެހެއެވެ.
ޢައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ގަތުލުއާންމުގައި ޒަޚަމު ކޮށްލާފައިވާ މީހުންގެ ޢަދަދު 20,200 އަރާއިރު އޭގެ ތެރޭގައި 2,000 އަށްވުރެ ގިނަ ކުޑަކުދިންނާއި 1,400 އަށްވުރެ ގިނަ އަންހެނުން ހިމެނެއެވެ. ޣައްޒާގެ މުސްލިމުން ދިރިއުޅޭ ގެދޮރުގެ 45 އިންސައްތަ މިހާރު ވަނީ ސުންނާފަތި ކޮށްލާފައެވެ.