ޖަރުމަނުވިލާތުގައި ޒަޔަނިސްޓު އިސްރާޢީލާ ދެކޮޅު ހަރަކާތްތައް ހިންގުން މަނާކޮށްފިއެވެ. މި ކަން އިޢުލާނު ކޮށްފައި ވަނީ އެ ޤައުމުގެ ދާޚިލީ ވަޒީރު ނެންސީ ފޭޒަރއެވެ. އޭނާ ވިދާޅުވީ ފަލަސްޠީނުގެ މިނިވަން ކަމަށް ޖިހާދު ކުރަމުންދާ މުޖާހިދުންގެ ޖަމާޢަތް – ޙަމާސްއަށް ހިތްވަރު ދިނުމުގެ އަމަލުތައް ހުއްޓުވަން އަމުރު ކޮށްފައިވާނެ ކަމުގައެވެ. އަދި، ފަލަސްޠީނުގެ ރައްޔިތުންގެ ހައްޤުތަކަށް ވަކާލާތުކޮށް ހަރަކާތްތައް ބާއްވާ ޖަރުމަނުވިލާތުގެ ޖަމުޢިއްޔާއެއް ރޫޅައިލަން އަންގަވާފައިވާނެ ކަމުގައެވެ.
ފަލަސްޠީނަށް ތާޢީދުކޮށް ހަރަކާތްތައް ބޭއްވުން ޖަރުމަނުވިލާތުގެ ސަރުކާރުން މަނާކޮށްފައި މި ވަނީ އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ގަތުލުއާންމާ ގުޅިގެންނެވެ. އެ އުދުވާންތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 9,061 އަށް އުފުލިފައެވެ. އޭގެ ތެރޭގައި ކުށެއް ނެތް 3,760 ކުޑަކުދިންނާއި 2,326 އަންހެނުންގެ އިތުރުން އުމުރުން ދުވަސްވީ އެތަކެއް ސަތޭކަ ބަޔަކު ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 32,000 އަށް އުފުލިފައެވެ. ޔަހޫދީންގެ މި ގަތުލުއާންމު ހިންގަމުން ދަނީ އެމެރިކާގެ އެއްބާރުލުމާއި އެހީތެރިކަމާ އެކުގައެވެ.
ޙަމާސް ޖަމާޢަތަކީ ޖަރުމަނުވިލާތުގެ ސަރުކާރުން ޓެރެރިސްޓު ޖަމާޢަތެއްގެ ގޮތުގައި ކަނޑައަޅާފައިވާ ޖަމާޢަތެކެވެ. އެ ޤައުމުގެ ދާޚިލީ ވަޒީރު ފޭޒަރ ވިދާޅުވީ، ޙަމާސް ޖަމާޢަތުން ފަލަސްޠީނުގެ ކުށެއް ނެތް މުސްލިމުންގެ ހައްޤުގައި ކުރަމުންދާ ޖިހާދަށް ތާޢިދުކޮށް ޖަރުމަނުވިލާތުގައި ބާއްވާ ހުރިހާ ހަރަކާތަކަށް ހުރަސް އަޅާނެ ކަމުގައެވެ. އަދި، އެ ހަރަކާތްތައް ރޫޅައިލާނެ ކަމުގައެވެ.
"ޙަމާސްއަކީ އިސްރާޢީލު ނެތިކޮށްލަން މަސައްކަތް ކުރާ ޓެރެރިސްޓު ޖަމާޢަތެއް. އެ ޖަމާޢަތުން، ނުވަތަ އެ ޖަމާޢަތުގެ ނަމުގައި، ނުވަތަ އެ ޖަމާޢަތަށް ތާޢީދުކޮށް ނަމަވެސް ޖަރުމަނުވިލާތުގައި އެއްވެސް ހަރަކާތެއް ބާއްވަން މަސައްކަތް ކޮށްފި ނަމަ އެ ކަމެއް ހުއްޓުވާނަން،" ފޭޒަރ ވިދާޅުވިއެވެ.
ޖަރުމަނުވިލާތުގެ މި ނިންމުމާ ގުޅިގެން ޙަމާސް ޖަމާޢަތުން ވަނީ އެ ޤައުމުގެ ސަރުކާރަށް ފާޑުކިޔާފައެވެ. ޙަމާސްއިން ބުނީ، ޒަޔަނިސްޓު އިސްރާޢީލުގެ ފައުޖުތަކުން ޣައްޒާގެ ކުށެއް ނެތް މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކަށް ޖަރުމަނުވިލާތުން ތާޢީދު ކުރާ ކަން މި ނިންމުމާ އެކު ހާމަވެގެން ގޮސްފައިވާ ކަމުގައެވެ. ޔަހޫދީ ފައުޖަށް ޖަރުމަނުވިލާތުން އެހީތެރިކަން ފޯރުކޮށްދެމުންދާ ކަމަށް ބެލުމުގެ ފުރުޞަތު ވެސް މިހާރު އޮތް ކަމަށް މަސްރަޙު ދިރާސާކުރާ ފަރާތްތަކުން ގަބޫލު ކުރެއެވެ.
ޖަރުމަނުވިލާތުން ރޫޅައިލާނެ ކަމުގެ އިންޒާރު ދީފައި ވަނީ 'ސަމީދޫން ނެޓްވަރކް'ގެ ނަމުގައި ހިންގާ ޖަމާޢަތަކަށެވެ. އޮކްޓޫބަރު 7 ވަނަ ދުވަހު ޙަމާސްގެ މުޖާހިދުން ޒަޔަނިސްޓު އިސްރާޢީލަށް ހަމަލަ ދިނުމުން ސަމީދޫން ނެޓްވަރކުން ވަނީ ޖަރުމަނުވިލާތުގެ ވެރިރަށް ބެރލިންގައި އުފާ ފާޅުކުރުމުގެ ގޮތުން ހަރަކާތްތަކެއް ބާއްވާފައެވެ. އެ ހަރަކާތުގެ ބައިވެރިން ވަނީ ޢާންމުންނަށް ފޮނިކާތަކެތި ބަހައި، އުފާ ފާޅުކޮށްފައެވެ. މި ކަމާ ނުރުހުންވެ، ޖަރުމަނުވިލާތުގެ ޗާންސެލަރ އޯލާފް ޝޮލްޒް ވަނީ އެ ޖަމާޢަތުގެ ހަރަކާތްތައް ހުއްޓުވާނެ ކަމަށް ވިދާޅުވެފައެވެ.
މިއަދު، ފަލަސްޠީނުގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޖަރިމާތަކާއި، ހަނގުރާމައިގެ ކުށްތަކާއި، ގަތުލުއާންމުތަކަކީ ނާޒީ ޖަރުމަނުވިލާތުން މީގެ ޤަރުނުތަކެއް ކުރިން ޔަހޫދީންނާ ދެކޮޅަށް ހިންގި ފަދަ އަމަލުތަކެއް ނޫންތޯ މަސްރަޙު ދިރާސާކުރާ ގިނަ ބަޔަކު ސުވާލު ކުރެއެވެ. މިއަދު، ޔަހޫދީންނާ އެއްކޮޅަށް އަރައި، މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންނަށް ޖަރުމަނުވިލާތުން ހިތްވަރު ދެމުންދާއިރު، އެތަކެއް ހާސް މުސްލިމުންނެއް ޝަހީދުވަމުންދާ މަންޒަރު ޖަރުމަނުވިލާތުގެ ވެރިންނަށް ނުފެންނަނީތޯ ވެސް އެ ފަރާތްތަކުން ދަނީ ސުވާލު އުފައްދަމުންނެވެ.