ޔަހޫދީ ފައުޖުން ޣައްޒާގެ ކުށެއް ނެތް މުސްލިމުންނާ ދެކޮޅަށް މިހާރު ހިންގަމުންދާ ލާއިންސާނީ ގަތުލުއާންމުގެ ފަހަތުގައި އޮތީ އެމެރިކާ ކަމަށާއި، އެމެރިކާއިން ބޭނުންވެއްޖެ ހިނދެއްގައި އެ ގަތުލުއާންމު ހުއްޓުވިދާނެ ކަމުގައި ޙިޒްބުالله ޖަމާޢަތުގެ އިސްވެރިޔާ ޙަސަން ނަޞްރުالله ވިދާޅުވެއްޖެއެވެ. ޙިޒްބުاللهއަކީ ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތެކެވެ.
ޔަހޫދީން ޢައްޒާގެ މުސްލިމުންދާ ދެކޮޅަށް ހިންގަމުންދާ ލާއިންސާނީ ޖަރީމާތަކުގެ ފަހަތުގައި އޮތީ އެމެރިކާ ކަމުގައި ވިދާޅުވެ، ނަޞްރުالله ވާހަކަފުޅު ދައްކަވާފައި މި ވަނީ، އޮކްޓޫބަރު 7 ވަނަ ދުވަހު ޔަހޫދީން ފެށި އުދުވާނަށް ފަހު އޭނާ ދެއްވި ފުރަތަމަ ތަޤުރީރުގައެވެ. ޓީވީ މެދުވެރިކޮށް ދެއްވި ތަޤުރީރުގައި ނަޞްރުالله ވިދާޅުވީ، ޣައްޒާގައި ޔަހޫދީ ފައުޖުން ކުރަމުންދާ ހަނގުރާމަ މެދުއިރުމަތީގެ ހުރިހާ ކަންކޮޅަކަށް ފެތުރުމުގެ ފުރުޞަތު ވަރަށް ބޮޑު ކަމުގައެވެ.
ޒަޔަނިސްޓު އިސްރާޢީލާއި އެމެރިކާއާ ދެކޮޅަށް ނަޞްރުالله ވާހަކަފުޅު ދައްކަވާފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާންތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 9,227 އަށް އުފުލިފައެވެ. އޭގެ ތެރޭގައި ކުށެއް ނެތް 3,760 ކުޑަކުދިންނާއި 2,326 އަންހެނުންގެ އިތުރުން އުމުރުން ދުވަސްވީ އެތަކެއް ސަތޭކަ ބަޔަކު ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 32,000 އަށް އުފުލިފައެވެ. ޔަހޫދީންގެ މި ގަތުލުއާންމު ހިންގަމުން ދަނީ އެމެރިކާގެ އެއްބާރުލުމާއި އެހީތެރިކަމާ އެކުގައެވެ.
ޙިޒްބުاللهއަކީ އީރާނުން ވާގިވެރިވާ މުޖާހިދުންގެ ޖަމާޢަތެކެވެ. އޮކްޓޫބަރު 7 ވަނަ ދުވަހު ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ހަނގުރާމަ ފެށުމާ ގުޅިގެން ޙިޒްބުاللهއިން ވެސް ވަނީ ޙަމާސް ޖަމާޢަތަށް ވާގިވެރިވުމުގެ ގޮތުން ޒަޔަނިސްޓު އިސްރާޢީލަށް ހަމަލަދޭން ފަށާފައެވެ. މި ހަމަލަތައް އަމާޒު ކޮށްފައި ވަނީ ލުބުނާނާއި އިސްރާޢީލް ގުޅޭ ސަރަޙައްދީ ރޮނގު ކައިރީގައި އޮންނަ ޔަހޫދީ ފައުޖުގެ އަމާޒުތަކަށެވެ.
މި ކަމާ ގުޅޭ ގޮތުން ވާހަކަފުޅު ދައްކަވަމުން ނަޞްރުالله ވިދާޅުވީ، ޙިޒްބުاللهގެ ބޭނުމަކީ ޔަހޫދީ ފައުޖުގެ ވީހާވެސް ގިނަ ޢަދަދެއްގެ ސިފައިންނާއި ބަރުހަތިޔާރު ލުބުނާންގެ ސަރަޙައްދީ ރޮނގު ކައިރިއަށް ޖަމާކުރުމުން ކަމުގައެވެ. އެހެން ނޫން ނަމަ، ޔަހޫދީ އަސްކަރިއްޔާގެ ފައުޖުގެ ހުރިހާ ސިފައިންނާއި ބަރުހަތިޔާރު ޣައްޒާގެ މުސްލިމުންނަށް ހަމަލަދޭން ބޭނުން ކުރުމުގެ ފުރުޞަތު ޔަހޫދީންނަށް ލިބުނީސް ކަމުގައި އޭނާ ވިދާޅުވިއެވެ.
"ލުބުނާނުގެ ސަރަޙައްދީ ރޮނގު ކައިރީގައި މި ހިންގަނީ ވަރަށް ކުޑަ އޮޕަރޭޝަނެއްގެ ގޮތުގައި ބެލެވިދާނެ. ނަމަވެސް، ހަޤީޤަތަކީ މިއީ ވަރަށް މުހިންމު އޮޕަރޭޝަނެއް،" ނަޞްރުالله ވިދާޅުވިއެވެ. އޭނާ ވަނީ، ފަލަސްޠީނުގެ ކުށެއް ނެތް މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޖަރީމާގެ ޒިންމާ އެމެރިކާގެ ކޮނޑުގައި އަޅުއްވާފައެވެ.
"ޔަހޫދީން ހިންގަމުންދާ ލާއިންސާނީ ޖަރީމާތައް އެމެރިކާއަށް ހުއްޓުވޭނެ. ސަބަބަކީ،. މިއީ ކަލޭމެން ހިންގަމުންދާ ގަތުލުއާންމެއް. މެދުއިރުމަތީގައި ބޮޑު ހަނގުރާމައެއް ފެށުނަ ނުދޭން ބޭނުން ނަމަ، ކަލޭމެން ޖެހޭނީ ޣައްޒާގައި ހިންގަމުންދާ ގަތުލުއާންމު ހުއްޓުމަކަށް ގެންނަން،" އެމެރިކާއަށް އިޝާރާތް ކުރައްވާ ވާހަކަފުޅު ދައްކަވަމުން ނަޞްރުالله ވިދާޅުވިއެވެ.
ޙިޒްބުاللهއަކީ އެމެރިކާގެ އަސްކަރިއްޔާ، އަދި ކަނޑުގެ ސިފައިންނާ މެދު ޖެހިލުންވާނެ ޖަމާޢަތެއް ނޫން ކަމުގައި ވެސް އޭނާ ވިދާޅުވިއެވެ. އޭނާ އިޝާރާތް ކުރައްވާފައި އެ ވަނީ، ޒަޔަނިސްޓު އިސްރާޢީލަށް އަސްކަރީ އެހީތެރިކަން ފޯރުކޮށްދޭން އެ ސަރަޙައްދަށް ފޮނުވާފައިވާ އެމެރިކާގެ އަސްކަރިއްޔާގެ މަތިންދާބޯޓު އުފުލާ ދެ މަނަވަރާއި އެހެން މަނަވަރުތަކަށެވެ. ލުބުނާނާއި އިސްރާޢީލް ގުޅޭ ސަރަޙައްދީ ރޮނގުގެ ހަމަޖެހުން ބިނާވެފައި ވަނީ ޣައްޒާގައި ޔަހޫދީން ހިންގަމުންދާ ލާއިންސާނީ ޖަރީމާތަކާ ކަމުގައި ވެސް އޭނާ ވިދާޅުވިއެވެ.
ޓީވީ މެދުވެރިކޮށް ނަޞްރުالله ބަސްދީގަތުމެއް ދެއްވާފައި މި ވަނީ އެމެރިކާގެ ޚާރިޖީ ވަޒީރު އެންތަނީ ބްލިންކަން އަނެއްކާ ވެސް ޒަޔަނިސްޓުންގެ އިސްރާޢީލަށް ދަތުރުފުޅެއް ކުރަމުން ގެންދަވާ ދަނޑިވަޅެއްގައެވެ. މިއީ، އޮކްޓޫބަރު 7 ވަނަ ދުވަހަށް ފަހު އޭނާ ޔަހޫދީންގެ ގާތަށް ވަޑައިގަންނަވާ ތިންވަނަ ފަހަރެވެ.
ޣައްޒާގައި ޔަހޫދީން ހިންގަމުންދާ ލާއިންސާނީ ޖަރީމާތަކުގެ އެންމެ ބޮޑު ބައިވެރިއަކީ އެމެރިކާއެވެ. ޔަހޫދީންގެ އުދުވާންތަކަށް ތާޢީދު ކުރުމުގެ އިތުރުން އެމެރިކާއިން ދަނީ އެ ގަތުލުއާންމު ކުރިއަށް ގެންދިޔުމަށް ޔަހޫދީންނަށް އަސްކަރީ ގޮތުންނާއި މާލީ ގޮތުން އެހީތެރިކަން ފޯރުކޮށްދެމުންނެވެ.
ޔަހޫދީ ފައުޖުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް މި އޮޕަރޭޝަން ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.