ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޖަރީމާގައި ޒަޚަމު ކޮށްލާފައިވާ މީހުންނަށް އިތުރު ފަރުވާ ދިނުމަށް މިޞްރަށް ފޮނުވުމަށް ޔަހޫދީން ހުރަސް އަޅައިފިއެވެ. ޣައްޒާގައި ވެރިކަން ކުރާ ޙަމާސް ޖަމާޢަތުން ބުނީ، ޒަޚަމުވެފައިވާ މީހުން މިޞްރުގެ ހޮސްޕިޓަލްތަކަށް ގެންދިޔުން ޔަހޫދީން މަނާ ކޮށްފައިވާ ކަމުގައެވެ. އަދި، އެ ކަމަށް ހުރަސް އަޅަމުންދާ ކަމުގައެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގައި ޔަހޫދީން ހިންގަމުންދާ ގަތުލުއާންމާ އެކު ޔަހޫދީން ވަނީ ރަފަޙް ހުރަސް ބަންދު ކޮށްފައެވެ. އަދި، ޣައްޒާގައި ހާލުގައި ޖެހިފައިވާ އެތަކެއް ސަތޭކަ ހާސް ބަޔަކު މިޞްރަށް ދަތުރު ކުރުމަށް ހުރަސް އަޅާފައެވެ. ނަމަވެސް، ޤަޠަރުން އިސްނަގައިގެން ބޭއްވި މަޝްވަރާތަކަކަށް ފަހު، ޣައްޒާގައި ދިރިއުޅޭ ބޭރު ޤައުމުތަކުގެ ޕާސްޕޯޓް އޮންނަ މީހުންނަށް މިޞްރަށް ދިޔުމަށް ހުއްދަ ދިނެވެ.
ޙަމާސް ޖަމާޢަތުން މި ކަމަށް އެއްބަސްވީ، ޔަހޫދީންގެ އުދުވާންތަކުގައި ޒަޚަމު ކޮށްލާފައިވާ މީހުން އިތުރު ފަރުވާ ދިނުމަށް މިޞްރަށް ގެންދިޔުމުގެ ފުރުޞަތު ދޭނެ ކަމުގައި ޒަޔަނިސްޓު އިސްރާޢީލުން ބުނުމުންނެވެ. ނަމަވެސް، ޔަހޫދީން މިހާރު މި ވަނީ އެ ފުރުޞަތު ބަންދު ކޮށްފައެވެ. މި ކަމާ ގުޅިގެން ޙަމާސް ޖަމާޢަތުން ބުނީ، ޣައްޒާގައި ތިބި ބޭރު ޤައުމުތަކުގެ މީހުންނަށް މިޞްރަށް ދަތުރު ކުރުމަށް އެ ޖަމާޢަތުން ވެސް ހުއްދަ ނުދޭނެ ކަމުގައެވެ.
ޢައްޒާއާއި މިޞްރު ގުޅޭ ރަފަޙް ހުރަސް އަނެއްކާ ވެސް ބަންދު ކޮށްފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާންތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 9,488 އަށް އުފުލިފައެވެ. އޭގެ ތެރޭގައި ކުށެއް ނެތް 3,760 ކުޑަކުދިންނާއި 2,326 އަންހެނުންގެ އިތުރުން އުމުރުން ދުވަސްވީ އެތަކެއް ސަތޭކަ ބަޔަކު ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 32,000 އަށް އުފުލިފައެވެ. ޔަހޫދީންގެ މި ގަތުލުއާންމު ހިންގަމުން ދަނީ އެމެރިކާގެ އެއްބާރުލުމާއި އެހީތެރިކަމާ އެކުގައެވެ.
"ޒަޚަމު ކޮށްލާފައިވާ މީހުންނަށް އިތުރު ފަރުވާ ދިނުމަށް އެ މީހުން މިޞްރަށް ނުގެންދެވޭ ނަމަ، ބޭރު ޤައުމުތަކުގެ ޕާސްޕޯޓް ގެންގުޅޭ މީހުންނަށް ޣައްޒާ ދޫކޮށް ދިޔުމުގެ ފުރުޞަތެއް ނުދެވޭނެ،" ޙަމާސް ޖަމާޢަތުގެ އިސް އޮފިޝަލަކު ވިދާޅުވިއެވެ. މިޞްރުން ވެސް ވަނީ ރަފަޙް ހުރަހުން އިތުރު މީހުން އެތެރެ ނުވާ ކަން ކަށަވަރު ކޮށްދިފައެވެ. ދެވަނަ ސަބަބަކީ، ޔަހޫދީ ފައުޖުން ޣައްޒާގެ އަލް-ޝިފާ ހޮސްޕިޓަލުގެ އެމްބިޔުލާންސްތަކަށް މިސައިލް ހަމަލަތަކެއްދީ، ގިނަ ޢަދަދެއްގެ ބަޔަކު ޝަހީދު ކޮށްލުމެވެ.
އަލް-ޝިފާ ހޮސްޕިޓަލުގެ އެމްބިޔުލާންސްތަކަށް މިސައިލް ހަމަލަތަކެއް ދީފައިވާ ކަން ޔަހޫދީ ފައުޖުން ވަނީ ކަށަވަރު ކޮށްދީފައެވެ. ހަމަލަތައް އަމާޒުކޮށްފައިވާ އެމްބިޔުލާންސްތައް އެ ވަގުތު ތައްޔާރުވަމުން ދިޔައީ ޒަޚަމު ކޮށްލާފައިވާ ބަޔަކު މިޞްރަށް ގެންދާށެވެ. އެ ރަޙުމު ކުޑަ ހަމަލާގައި 15 މީހުން ޝަހީދުކޮށްލައި، އިތުރު 60 އެއްހާ މީހުން ޒަޚަމު ކޮށްލިއެވެ. ޔަހޫދީން ބުނީ ހަމަލަތައް ދީފައި ވަނީ ޙަމާސް ޖަމާޢަތުގެ މުޖާހިދުން ތިބި އެމްބިޔުލާންސްތަކަކަށް ކަމުގައެވެ.
ޔަހޫދީ ފައުޖުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް މި އޮޕަރޭޝަން ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.