އެމެރިކާގެ އެހީތެރިކަމާ އެކު ޔަހޫދީ ފައުޖުން ޣައްޒާގެ ކުށެއް ނެތް މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކާ ގުޅޭ ގޮތުން ޣައްޒާގައި ވެރިކަން ކުރާ ޙަމާސް ޖަމާޢަތާއި އީރާނާ ދެމެދު މަޝްވަރާ ކޮށްފިއެވެ. މި މަޝްވަރާތައް ކުރިއަށް ދިޔައީ ޙަމާސް ޖަމާޢަތުގެ އިސްވެރިޔާ އިސްމާޢީލް ހަނިއްޔާ ދާދި ފަހުން ތެހެރާނަށް ކުރެއްވި ދަތުރުފުޅެއްގެ ތެރެއިންނެވެ.
ހަނިއްޔާގެ ދަތުރުފުޅުގައި އޭނާ ވަނީ އީރާނުގެ ދީނީ ލީޑަރު އާޔަތުالله ޢަލީ ޚާމަންއީއާ ބައްދަލު ކުރައްވާފައެވެ. މި ބައްދަލުވުމުގައި މަޝްވަރާ ކުރައްވާފައި ވަނީ ޔަހޫދީން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ގަތުލުއާންމާ ގުޅޭ ގޮތުންނެވެ. ޔަހޫދީން ޣައްޒާއަށް ބޮން އަޅަން ފަށާފައި ވަނީ، ޙަމާސްގެ މުޖާހިދުން އޮކްޓޫބަރު 7 ވަނަ ދުވަހު ޒަޔަނިސްޓު އިސްރާޢީލުގެ ރަށްތަކަށް އަރައި އަސްކަރީ ކެމްޕޭނެއް ހިންގުމާ ގުޅިގެންނެވެ. އެ ކެމްޕޭނުގައި އިސްރާޢީލުގެ 1,400 އެއްހާ މީހުން ވަނީ މަރައިލާފައެވެ.
ހަނިއްޔާއާއި ޚާމަންއީ ތެހެރާނުގައި ބައްދަލުކުރައްވާފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާންތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 9,488 އަށް އުފުލިފައެވެ. އޭގެ ތެރޭގައި ކުށެއް ނެތް 3,760 ކުޑަކުދިންނާއި 2,326 އަންހެނުންގެ އިތުރުން އުމުރުން ދުވަސްވީ އެތަކެއް ސަތޭކަ ބަޔަކު ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 32,000 އަށް އުފުލިފައެވެ. ޔަހޫދީންގެ މި ގަތުލުއާންމު ހިންގަމުން ދަނީ އެމެރިކާގެ އެއްބާރުލުމާއި އެހީތެރިކަމާ އެކުގައެވެ.
ޙަމާސް ޖަމާޢަތުގެ އިސް އޮފިޝަލެއް ކަމުގައިވާ އުސާމާ ޙަމްދާން ވަނީ، ހަނިއްޔާ ތެހެރާނަށް ވަޑައިގަންނަވާފައިވާ ކަމަށާއި، އެ ދަތުރުފުޅުގައި އީރާނުގެ ދީނީ ލީޑަރާ ބައްދަލު ކުރައްވައި، މުހިންމު މަޝްވަރާތަކެއް ކުރައްވާފައިވާ ކަން ކަށަވަރު ކޮށްދެއްވާފައެވެ. ނަމަވެސް، އެ މަޝްވަރާތަކާ ގުޅޭ އިތުރު ތަފުސީލެއް ޙަމާސްއިން އަދި ހާމަކޮށްފައެއް ނުވެއެވެ. 2019 ވަނަ އަހަރުން ފެށިގެން ހަނިއްޔާ ދިރިއުޅުއްވަނީ ތުރުކީވިލާތާއި ޤަޠަރުގައެވެ.
ޔަހޫދީ ފައުޖުން އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ލާއިންސާނީ އުދުވާންތައް ފެށުމާ ގުޅިގެން އީރާނުން ވަނީ ޔަހޫދީންނަށް ވަރުގަދަ އިންޒާރެއް ދީފައެވެ. އަދި، ބޭރު ޤައުމުތަކާއި އެ ޤައުމުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުން ޒަޔަނިސްޓު އިސްރާޢީލާ ދެކޮޅަށް ތެދުވާނެ ކަމުގެ އިންޒާރު ދީފައެވެ. އަދި، މެދުއިރުމަތީގައި ބޮޑު ހަމަނުޖެހުން ގަނޑެއް އުފެދިދާނެ ކަމުގެ އިންޒާރު ކޮށްފައެވެ.
އީރާނަކީ މެދުރިއުމަތީގެ އިތުރުން ޢަރަބި ޤައުމުތަކުގެ މެދުގައި ވެސް ބާރާއި ނުފޫޒު ގަދަ ޤައުމެކެވެ. ސޫރިޔާއާއި، އިރާޤާއި، ޔަމަނުގެ އިތުރުން ލުބުނާނުގައި ހަރަކާތްތެރިވާ ހަތިޔާރު އެޅި ޖަމާޢަތްތަކަށް ވާގިވެރިވާ ޤައުމެކެވެ. އޭގެ ތެރެއިން ވެސް ލުބުނާނުގައި ހަރަކާތްތެރިވާ ޙިޒްބުالله ޖަމާޢަތާއި ޔަމަނުގައި ހަރަކާތްތެރިވާ ހޫޘީން ފާހަގަ ކޮށްލެވެއެވެ. އެ ދެ ޖަމާޢަތުން ވަނީ ޔަހޫދީން ޣައްޒާގައި ހިންގަމުންދާ ގަތުލުއާންމުގެ ބަދަލު ހިފުމުގެ ގޮތުން ޒަޔަނިސްޓު އިސްރާޢީލަށް ހަމަލަދޭން ފަށާފައެވެ. މި ހަމަލަތަކުގެ ފަހަތުގައި އީރާނުގެ އަތެއް އޮންނާނެ ކަމަށް މަސްރަޙު ދިރާސާކުރާ ފަރާތްތަކުން ގަބޫލު ކުރެއެވެ.
ޔަހޫދީ ފައުޖުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް މި އޮޕަރޭޝަން ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުމާއި، އެތަކެއް ޒަމާނެއްވީ ޔަހޫދީންގެ އަޅުވެތި ކަމަށް ކެތް ނުކުރެވިގެންނެވެ.