ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް މިހާރު ހިންގަމުންދާ ގަތުލުއާންމަކީ އެމެރިކާގެ ރައީސް ޖޯ ބައިޑަންގެ ރުހުމާއި އެއްބާރުލުމާއެކު ހިންގަމުންދާ ގަތުލުއާންމެއް ކަމުގައި އެމެރިކާގެ ޤާނޫނު ހަދާ މަޖިލިސް ކަމުގައިވާ ކޮންގްރެސް މެންބަރު ރަޝީދާ ޠުލީބް ވިދާޅުވެއްޖެއެވެ. ޠުލީބަކީ ކޮންގްރެސްގެ މެންބަރު ކަމުގެ މަޤާމަށް އިންތިޚާބުވެ ވަޑައިގެންނެވި ފަލަސްޠީން ދަރިކޮޅަށް ނިސްބަތްވާ ފުރަތަމަ ބޭފުޅާއެވެ. އޭނާއަކީ ކޮންގްރެސްގައި ބައިޑަންގެ ޑިމޮކްރެޓިކް ޕާޓީ ތަމްސީލު ކުރައްވާ މެންބަރެކެވެ.
ބައިޑަންގެ ނިންމުންތަކަށް ފާޑު ވިދާޅުވެ އެކްސް (ކުރީގެ ޓްވިޓަރ)ގައި ޝާއިޢު ކުރެއްވި ވީޑިޔޯއެއްގައި ޠުލީބް ވިދާޅުވީ، ޔަހޫދީން ހިންގަމުންދާ ގަތުލުއާންމަށް ތާޢީދު ކުރުމުގެ 'ހިތި' ކުރިއަށް އޮތް އިންތިޚާބުގައި ބައިޑަންއަށް ފެންނާނެ ކަމުގައެވެ. އޭނާ އިޝާރާތް ކުރައްވާފައި އެ ވަނީ 2024 ވަނަ އަހަރު އެމެރިކާ ބާއްވަން ހަމަޖެހިފައިވާ ރިޔާސީ އިންތިޚާބަށެވެ. އެ އިންތިޚާބުގައި ވާދަކުރައްވާނެ ކަން ބައިޑަން ވަނީ އިޢުލާނު ކުރައްވާފައެވެ.
ކޮންގްރެސްގެ މެންބަރު ޠުލީބް ބައިޑަންއަށް ފާޑުވިދާޅުވެފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާންތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 9,488 އަށް އުފުލިފައެވެ. އޭގެ ތެރޭގައި ކުށެއް ނެތް 3,760 ކުޑަކުދިންނާއި 2,326 އަންހެނުންގެ އިތުރުން އުމުރުން ދުވަސްވީ އެތަކެއް ސަތޭކަ ބަޔަކު ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 32,000 އަށް އުފުލިފައެވެ. ޔަހޫދީންގެ މި ގަތުލުއާންމު ހިންގަމުން ދަނީ އެމެރިކާގެ އެއްބާރުލުމާއި އެހީތެރިކަމާ އެކުގައެވެ.
"ފަލަސްޠީނުގެ މުސްލިމުންނާ ދެކޮޅަށް ހިންގަމުންދާ ގަތުލުއާންމަށް ބައިޑަން ތާޢީދު ކުރޭ،" ޠުލީބް މިހެން ވިދާޅުވާ ވީޑިޔޯގައި ފެނިގެން ދަނީ ޝަހީދު ކޮށްލާފައިވާ މުސްލިމުންގެ ހަށިތަކެވެ. ޒަޚަމު ކޮށްލާފައިވާ މީހުންނެވެ. ޣައްޒާގައި ހިންގަމުންދާ ގަތުލުއާންމު ހުއްޓުވުމަށް ގޮވައިލާ އެމެރިކާގެ ރަށްތަކުގައި ބާއްވަމުންދާ ހިނގައިލުންތަކުގެ ބައިވެރިންނެވެ. ޔަހޫދީންނަށް ފުރިހަމަ ތާޢީދު އޮތް ކަމުގައި ބައިޑަން ވިދާޅުވާ މަންޒަރެވެ. އަދި، ޒަޔަނިސްޓު އިސްރާޢީލުގެ ބޮޑުވަޒީރު ބެންޖަމިން ނަތަންޔާހޫ ބައިޑަންއަށް ޝުކުރު އަދާކުރާ މަންޒަރެވެ.
ޠުލީބް ވިދާޅުވި ބަސްފުޅުތަކަށް ވައިޓް ހައުސްއިން ސީދާ ރައްދު ދީފައެއް ނުވެއެވެ. ނަމަވެސް، ވައިޓް ހައުސްގެ ޤައުމީ ސަލާމަތާ ބެހޭ ކައުންސިލްގެ ތަރުޖަމާނަކު ވިދާޅުވީ، ޣައްޒާގައި ހާލުގައި ޖެހިފައިވާ މުސްލިމުންނަށް އިންސާނީ އެހީތެރިކަން ފޯރުކޮށްދޭން އެމެރިކާއިން ތާޢީދު ކުރާ ކަމުގައެވެ. އަދި، ޙަމާސް ޖަމާޢަތުން ރަހީނު ކޮށްފައިވާ އަސީރުން މިނިވަން ކުރަން ބޭނުންވާ ކަމުގައެވެ.
"އިސްރާޢީލުގެ ރައްޔިތުންގެ ހައްޤުގައި އެ ޤައުމުން ކުރަމުންދާ ހަނގުރާމައެއް ހުއްޓައިލަން އެމެރިކާއިން ތާޢީދެއް ނުކުރާނެ. ޙަމާސް ޖަމާޢަތުގެ ޓެރެރިސްޓުންގެ އަމަލުތައް ހުއްޓުވަން ކުރަމުންދާ މަސައްކަތްތައް ހުއްޓައިލަން ތާޢީދެއް ނުކުރާނެ،" ވައިޓް ހައުސްގެ ޤައުމީ ސަލާމަތާ ބެހޭ ކައުންސިލްގެ ތަރުޖަމާނު ބުންޏެވެ.
ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް އުދުވާންތައް ހިންގަމުން ދަނީ އެމެރިކާގެ އެހީތެރިކަމާއި އެއްބާރުލުމާ އެކުގައި ކަން މުޅި ދުނިޔެ ވެސް ދަނެއެވެ. މުސްލިމުންގެ ގެދޮރަށް އަޅަމުންދާ ބޮންތަކާއި މިސައިލްތަކަކީ އެމެރިކާއިން ފޯރުކޮށްދީފައިވާ ތަކެއްޗެވެ. އެމެރިކާއިން ޔަހޫދީންނަށް ކޮންމެ އަހަރަކު ފޯރުކޮށްދޭ ހަތިޔާރާއި އަސްކަރީ އެހީގެ އަގު އެތަކެއް ބިލިޔަން ޑޮލަރަކަށް އަރައެވެ.
މީގެ އިތުރުން، ޔަހޫދީންގެ އުދުވާންތަކަށް ނިމުމެއް ގެންނަން ބައިނަލްއަޤުވާމީ މައިދާނުގައި ކުރަމުންދާ މަސައްކަތްތަކަށް ވެސް ހުރަސް އަޅަމުން ދަނީ އެމެރިކާއިންނެވެ. ބައިޑަން ކުރީގައި ހުންނަވައިގެންނެވެ. ޒަޔަނިސްޓު އިސްރާޢީލުގެ ލާއިންސާނީ އަމަލުތައް ކުށްވެރިކޮށް އ.ދގެ ސަލާމަތީ މަޖިލީހަށް ހުށަހަޅާ ކޮންމެ ޤަރާރަކަށް އެމެރިކާއިން ދަނީ ހުރަސް އަޅަމުންނެވެ.
"އެމެރިކާގެ ޢާންމު ރައްޔިތުން ހަނދާނެއް ނުނެތޭނެ. ބައިޑަން! ޔަހޫދީންގެ ގަތުލުއާންމު ހުއްޓުވާ! އެ ނޫން ގޮތަކަށް 2024 ގައި އަހަރުމެންގެ ތާޢީދު ހޯދަން ނޫޅޭތި! ރައީސް، އެމެރިކާގެ ރައްޔިތުން މި ކަމުގައި ތިބީ ރައީސާ އެކުގައެއް ނޫން. 2024 ގައި އަހަރުމެން [ބައިޑަން މިހާރު އަމަލު ކުރަމުންދާ ގޮތް] ހަނދާން ކުރާނަން،" ޠުލީބް ވިދާޅުވިއެވެ.
ޔަހޫދީ ފައުޖުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް މި އޮޕަރޭޝަން ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުމާއި، އެތަކެއް ޒަމާނެއްވީ ޔަހޫދީންގެ އަޅުވެތި ކަމަށް ކެތް ނުކުރެވިގެންނެވެ.