އެމެރިކާގެ އެހީތެރިކަމާއެކު ޔަހޫދީ އިސްރާޢީލުން ފަލަސްތީނުގެ އާންމުންނަށް ދެމުންދާ ލާއިންސާނީ ހަމަލާތައް ނިމުމަކަށް ގެނެސް، ހަނގުރާމަ ހުއްޓާލުމަށް އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެން ދެކޮޅުހައްދަވައިފިއެވެ. ހަނގުރާމައާ ގުޅޭގޮތުން ބްލިންކެން ވާހަކަފުޅު ދައްކަވާފައި ވަނީ މިސްރާއި ޢުރުދުންގެ ޚާރިޖީ ވަޒީރުންނާއެކު، އުރުދުންގެ ވެރި ރަށް އައްމާންގައި ބޭއްވި ނޫސްވެރިންގެ ބައްދަލުވުމެއްގައެވެ.
މިހާރުން މިހާރަށް ހަނގުރާމަ ހުއްޓާލުމަށް ގޮވާލައި މިސްރާއި ޢުރުދުންގެ ޚާރިޖީ ވަޒީރު ވާހަކަފުޅު ދެއްކެވި ނަމަވެސް، ހަނގުރާމަ ހުއްޓާލުމުގެ ބަދަލުގައި ޣައްޒާއަށް އިންސާނީ އެހީ ފޯރުކޮށްދިނުމަށް ވަގުތު ދޭން ޖެހޭ ކަމަށް ބްލިންކެން ވަނީ ވިދާޅުވެފައެވެ.
"އަހަރުމެން ގަބޫލުކުރާ ގޮތުގައި ހަނގުރާމަ ހުއްޓާލައިފިނަމަ، އޭގެ ފައިދާ ވާނީ ހަމާސްއަށް. ހަމާސްއިން އަނެއްކާވެސް އޮކްޓޫބަރު ހަތެއްގައި ޢިސްރާއީލަށް ދިން ފަދަ ހަމަލާއެއް ތަކުރާރުކޮށްފާނެ." ބްލިންކެން ވިދާޅުވިއެވެ.
ޣައްޒާގައި ޢިސްރާއީލުން ހިންގަމުންދާ ރަހުމުކުޑަ އަމަލުތައް ހުއްޓުމަކަށް ގެނެސް، ބައިނަލްއަޤުވާމީ ޤަނޫނުތަކާ އިސްރާޢީލުން ޚިލާފުވަމުންދާ ޚިލާފުވުންވެސް ހުއްޓުމަކަށް ގެންނަންޖެހޭ ކަމަށް ޢުރުދުންގެ ޚާރިޖީ ވަޒީރު އައިމަން ޞަފާދީ ވިދާޅުވިއެވެ. ޣައްޒާއަށް ފޯރުކޮށްދޭ އިންސާނީ އެހީ ފޯރުކޮށްދިނުމަށާއި، ގެދޮރު ދޫކޮށް ދިޔުމަށް އާންމުންނަށް މަޖުބޫރުކުރުން ހުއްޓުވައި، ޔަހޫދީ ޢިސްރާއީލުން ހުޅަނގު އައްސޭރީގައި ހިންގާ ގަތުލުއާންމުތައް ހުއްޓުވުމަށްވެސް ޞަފާދީ ވަނީ ގޮވާލައްވާފައެވެ.
ދިރިތިއްބާ ބަޔަކު މެރުމަކީ އަމިއްލައަށް ދިފާއުވުން ނޫންކަމަށް މިސްރުގެ ހާރިޖީ ވަޒީރު ސާމިހް ޝުކްރީ ވިދާޅުވިއެވެ. އަދި އެއްވެސް ޝަރުތަކާ ނުލައި މިހާރުން މިހާރަށް ހަނގުރާމަ ހުއްޓާލުމަށްވެސް ޝުކްރީ ވަނީ ގޮވާލައްވާފައެވެ. ފަލަސްތީނުގެ މައްސަލައަކަށް ވުމުން ބައިނަލްއަގުވާމީ ޤާނޫނުތަކާ ޚިލާފުވެ، އާންމު ރައްޔިތުންނަށް ހަމަލާދޭއިރުވެސް ހަނގުރާމަ ކުށްވެރިކުރުމަށް ބައެއް ޤައުމުތަކުން ޖެހިލުންވާ ކަމަށް ޝުކްރީ ވިދާޅުވިއެވެ.
ނޫސްވެރިންގެ ބައްދަލުވުމުގެ ކުރިން ބްލިންކެން ވަނީ ޢުރުދުން، ސަޢުދީ ޢަރަބިއްޔާ، މިސްރު، ޔޫއޭއީ އަދި ޤަތަރުގެ ޚާރިޖީ ވަޒީރުންނާއި ފަލަސްތީނުގެ އިސް އޮފިޝަލަކާވެސް ބައްދަލުކުރައްވާފައެވެ. އަދި ޢުރުދުންގެ ރަސްގެފާނު ޢަބްދުﷲއާ އެކުވެސް ބްލިންކެން ވަނީ ވަކިން މަޝްވަރާ ބައްދަލުވުމެއް ބާއްވަވާފައެވެ.
ޚާރިޖީ ވަޒީރުންނާއެކު ބޭއްވެވި ބައްދަލުވުމުގައި ބައިވެރިވެވަޑައިގެންނެވީ އުރުދުންގެ ޚާރިޖީ ވަޒީރު އައިމަން ޞަފާދީ އާއި ސަޢުދީގެ ވަލީޢަހުދު ފައިސަލް ބިން ފަރުހާންގެ އިތުރުން ޔޫއޭއީގެ ޢަބްދުالله ބިން ޒައިދު އަލް ނަހްޔާން އާއި ޤަތަރުގެ މުޙައްމަދު ބިން ޢަބްދުއްރަހްމާން ބިން ޖާސިމް އަލް ޘާނީ އާއި މިސްރުގެ ސަމީހް ޝުކްރީ އަދި ފަލަސްތީން ލިބަރޭޝަން އޮގަނައިޒޭޝަންގެ ފަރާތުން ހުސެއިން އަލް ޝެއިޚް އެވެ.
ޢުރުދުންގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވާ ގޮތުގައި ހަނގުރާމަ ހުއްޓުވުމަށް ކުރާ މަސައްކަތުގެ ތެރެއިން މިހާރުން މިހާރަށް ހަނގުރާމަ ހުއްޓާލުމަށާއި އެއްވެސް ކަހަލަ ހުރަހެއްނެތި ޣައްޒާއަށް އިންސާނީ އެހީ ފޯރުކޮށްދިނުމަށް ޢަރަބި ލީޑަރުން ގޮވާލާ ގޮވާލުން އެ ބައްދަލުވުމުގައި ވަނީ ތަކުރާރު ކުރައްވާފައެވެ.