ގއ.ކޮނޑޭ މެޖިސްޓްރޭޓް ކޯޓުގެ އިސްމެޖިސްޓްރޭޓް މުހައްމަދު އިބްރާހީމް ސަސްޕެންޑްކޮށްފި

ގއ.ކޮނޑޭ މެޖިސްޓްރޭޓް ކޯޓުގެ އިސްމެޖިސްޓްރޭޓް އަލްއުސްތާޛު މުހައްމަދު އިބްރާހީމް ސަސްޕެންޑްކޮށްފިއެވެ.

މުޙައްމަދު އިބްރާހިމް ސަސްޕެންޑް ކުރުމަށް ނިންމަވާފައިވަނީ މިމަހުގެ 1 ވަނަ ދުވަހު ބޭއްވި ޖުޑީޝަލް ސަރވިސް ކޮމިޝަންގެ 70 ޖަލްސާގައެވެ.

ޖޭއެސްސީން ވިދާޅުވީ މުހައްމަދު އިބްރާހީމް ސަސްޕެންޑް ކޮށްފައިވަނީ ކޯޓަށް ހުށަހެޅޭ މައްސަލަތައް ދިރާސާނުކުރާތީއާއި، މައްސަލަތަކުގެ ޙުކުމާއި، މައްސަލަތަކުގެ ރިޕޯޓު މުވައްޒަފުން ތައްޔާރުކުރަންޖެހުމުގެ އިތުރުން އަދި ކޯޓަށް ހުށަހެޅޭ މައްސަލަތައް ގިނަދުވަސްވެ އެމައްސަލަތަކަށް އިސްމެޖިސްޓްރޭޓް މުޙައްމަދު އިބްރާހީމް އިޙުމާލުވެފައިވާތީކަމަށެވެ.

ޖޭއެސްސީން ވިދާޅުވީ ކޯޓުގެ ވާހަކަތަކާއި ކޯޓަށް ހުށަހެޅޭ މައްސަލަތަކުގެ ވާހަކަ ކޯޓުން ބޭރުގައި އިސްމެޖިސްޓްރޭޓް މުޙައްމަދު އިބްރާހީމް ދައްކާކަން އެ ކޮމިޝަންގެ ތަޚްޤީޤަށް ސާބިތުވެފައިވާކަމަށެވެ. އަދި އިސްމެޖިސްޓްރޭޓް މުޙައްމަދު އިބްރާހީމްގެ މި ޢަމަލުތަކަކީ، ދިވެހިރާއްޖޭގެ ފަނޑިޔާރުންގެ ޤާނޫނާ ޚިލާފަށް ކޮށްފައިވާ ޢަމަލުތަކެއްކަމަށެވެ.

އެހެންކަމުން ޖުޑީޝަލް ސަރވިސް ކޮމިޝަނުގެ ޤާނޫނުގެދަށުން، މުސާރައާއި އިނާޔަތްތައް ނުލިބޭގޮތަށް މުހައްމަދު އިބްރާހީމް މިއަދުން ފެށިގެން 02 ހަފްތާގެ މުއްދަތަށް ވަޒީފާގެ މަސައްކަތަށް ނުކުތުން މަނާކުރައްވާފައިވާ ކަމަށް ޖޭއެސްސީންވަނީ ހާމަކުރައްވާފައެވެ.