ޣައްޒާގެ މުސްލިމުންނާ ދެކޮޅަށް ނިއުކްލިޔަރ ހަތިޔާރު ބޭނުން ކުރަން ހިތްވަރުދިން ޒަޔަނިސްޓު އިސްރާޢީލުގެ މިނިސްޓަރު ހޫނުފެނަށް ވެއްޓިއްޖެއެވެ. ޣައްޒާއަށް ނިއުކްލިޔަރ ހަމަލައެއް ދިނުމަކީ ޒަޔަނިސްޓު އިސްރާޢީލަށް އޮތް އިޚްތިޔާރެއް ކަމުގައި ބުނެފައި ވަނީ އެ ޤައުމުގެ ހެރިޓޭޖާ ބެހޭ ވަޒީރު އަނިޚާއި އެލިޔާހޫއެވެ.
ރޭޑިޔޯ ޕުރޮގުރާމަކަށް ދިން އިންޓަރވިއުއެއްގައި ޙަމާސް ޖަމާޢަތް ނައްތައިލުމުގެ ބޭނުމުގައި ޣައްޒާގެ މުސްލިމުންނާ ދެކޮޅަށް 'ނިއުކްލިޔަރ' ހަތިޔާރެއް ބޭނުން ކުރުމުގެ އިޚުތިޔާރު ޒަޔަނިސްޓު އިސްރާޢީލަށް ލިބިގެންވޭތޯ ސުވާލު ކުރުމުން އެލިޔާހޫ ބުނީ، "އެއީ [އެ ކަން ކުރެވިދާނެ] އެއް ގޮތް،" ކަމުގައެވެ.
މި ކަމާ ގުޅިގެން ދުނިޔޭގެ އެކި ކަންކޮޅުތަކުގެ ފާޑުކިޔުންތައް ވަނީ ޒަޔަނިސްޓު އިސްރާޢީލާއި ބޮޑުވަޒީރު ބެންޖަމިން ނަތަންޔާހޫއަށް އަމާޒު ވެފައެވެ. މި ކަން އެންމެ ހަރުކަށި އިބާރާތުން ކުށްވެރި ކޮށްފައިވާ ޤައުމުތަކުގެ ތެރޭގައި ދިވެހިރާއްޖެއާއި ސަޢޫދީ ޢަރަބިއްޔާ ހިމެނެއެވެ.
ސަޢޫދީ ޢަރަބިއްޔާއިން ނެރުނު ބަޔާނެއްގައި ބުނެފައި ވަނީ، ޒަޔަނިސްޓު އިސްރާޢީލުގެ ސަރުކާރު ހައްދުފަހަނަ އަޅާފައިވާ މިންވަރު އެލިޔާހޫގެ ބަސްތަކުން އެނގި ހާމަވެގެން ގޮސްފައިވާ ކަމުގައެވެ. "ވަޒީރު ކަމުގެ މަޤާމުން އެލިޔާހޫ ދުރުކުރުމަށާއި އޭނާއާ މެދު ފިޔަވަޅު އަޅަން ފަސްޖެހުމުން، ޒަޔަނިސްޓު އިސްރާޢީލުގެ ސަރުކާރުން އިންސާނުންނާ މެދު ގެންގުޅޭ ނަފުރަތާއި، އަޚްލާޤީ އަދި ދީނީ މިންގަނޑުތައް ހާމަވެގެން ހިނގައްޖެ،" ސަޢޫދީ ޢަރަބިއްޔާގެ ބަޔާނުގައި ބުނެފައިވެއެވެ.
އެލިޔާހޫގެ ބަސްތަކުން ޒަޔަނިސްޓު އިސްރާޢީލުގެ ނުބައި ނުލަފާކަން ހާމަވެގެން ގޮސްފައިވާ ކަމުގައި ޙަމާސް ޖަމާޢަތުން ބުނެއެވެ. އަދި، އިސްރާޢީލުން ހިންގަމުންދާ ޓެރެރިޒަމްގެ އަމަލުތަކުގެ ނުރައްކާ މުޅި ދުނިޔެއަށް އޮތް ކަމުގައި ވެސް އެ ޖަމާޢަތުން ބުނެއެވެ.
އެލިޔާހޫގެ ބަސްތަކާ ގުޅިގެން މުޅި ދުނިޔޭގެ ފާޑުކިޔުންތައް އަމާޒުވުމުން ނަތަންޔާހޫގެ ސަރުކާރުން ވަނީ ވަޒީރު ކަމުގެ މަޤާމުން އޭނާ ވަގުތީ ގޮތުން ދުރު ކޮށްފައިވާ ކަމަށް ބުނެފައެވެ.
"އެލިޔާހޫ ދައްކާފައިވާ ވާހަކައަކީ ހަޤީޤަތެއްގެ މައްޗަށް ބިނާ ކޮށްފައިވާ ވާހަކައެއް ނޫން. އިސްރާޢީލާއި ޔަހޫދީ ފައުޖުން އަމަލު ކުރަމުން މި ދަނީ ބައިނަލްއަޤުވާމީ ޤާނޫނުތަކާއި ހުދޫދުތަކުގެ ތެރެއިން،" އެލިޔާހޫ ބުނި ބަސްތަކުން ބަރީޢަވާން ނަތަންޔާހޫގެ ސަރުކާރުން ބުންޏެވެ. އިސްރާޢީލުގެ މި ބަޔާނާ ގުޅިގެން، ޣައްޒާގެ މުސްލިމުން ގަތުލު ކުރުމަކީ ބައިނަލްއަޤުވާމީ ކޮން މިންގަނޑެއްގެ ދަށުން ހިންގަމުންދާ ޖަރީމާއެއްތޯ ގިނަ ބަޔަކު ދަނީ ސުވާލު އުފައްދަމުންނެވެ.
ޣައްޒާއަށް ނިއުކްލިޔަރ ބޮމެއް އަޅަން ޔަހޫދީ ވަޒީރަކު ހިތްވަރު ދީފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކުގައި ޝަހީދު ކޮށްލާފައިވާ މީހުންގެ ޢަދަދު ވަނީ 10,022 އަށް އުފުލިފައެވެ. އޭގެ ތެރޭގައި 4,000 އަށްވުރެ ގިނަ ކުޑަކުދިން ހިމެނެއެވެ.
އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 24,000 އަށް އަރާފައެވެ. ޔަހޫދީންގެ ހަމަލަތަކުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުންގެ ޢަދަދު 2,600 އަށް އަރާއިރު، އޭގެ ތެރޭގައި ވެސް 1,270 އެއްހާ ކުޑަކުދިން ހިމެނޭ ކަމުގައި ޣައްޒާގެ އޮފިޝަލުން ވިދާޅުވެއެވެ.