މަޖިލީހުގެ ތެރެއިން ނަޝީދުގެ މައްސަލަ ގެންދެވޭނެ 4 ގޮތެއް އެބައޮތް - ނިއުޝާ

ރައްޔިތުން މަޖިލީހުގެ ރައީސް، ރައީސް މުޙައްމަދު ނަޝީދު މަޤާމުން ވަކިކުރުމަށް ހުށައެޅިފައިވާ މައްސަލަ މަޖިލީހުގެ ނިޒާމުގެ ތެރެއިން ހައްލުކުރެވެން އެބަ އޮތްކަމަށް މަޖިލީހުގެ އަމީން ޢާއްމު ފާތިމަތު ނިއުޝާ ވިދާޅުވެއްޖެއެވެ.

ރައްޔިތުންގެ މަޖިލީހުގެ ނައިބު ރައީސް ޢީވާ އަބްދުﷲ ސަލާމުގައި ހުންނެވުމުން، މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރު ނެތްކަމަށް ހުށައެޅި މައްސަލަ ކުރިޔަށް ނުގެންދެވޭތީ މަޖިލީހުގެ ޤަވައިދު މާނަކުރުމަށް އެމްޑީީން ވަނީ ސުޕްރީމްކޯޓަށް ހުށައަޅާފައެވެ.

މި މައްސަލާގައި މިއަދު ބޭއްވި އަޑުއެހުމުގައި ވާހަކަދައްކަވަމުން މަޖިލީހުގެ އަމީން ޢާއްްމު ފާތިމަތު ނިއުޝާ ވިދާޅުވީ އެ މައްސަލައިގައި އަދިވެސް މަޖިލީހުގެ ނިޒާމުގެ ތެރެއިން ހައްލު ހޯދެން އެބައޮތްކަމަށެވެ. އެގޮތުން ހަތަރު ގޮތެއް އޮތްކަން ނިއުޝާ ވަނީ ފާހަގަކުރައްވާފައެވެ.

ނިއުޝާ ވިދާޅުވީ މިހާރު ދިމާވެފައިވާ މައްސަލަ ހައްލުކުރެވޭނެ އެންމެ ފުރަތަމަ ގޮތަކީ މަޖިލީހުގެ ޢާއްމު ކޮމެޓީ އިސްނަގައި ގަވައިދަށް ގެންނަން ފެންނަ އިސްލާހެއް މަޖިލީހުގެ ތަޅުމަށް ހުށައެޅުން ކަމަށެވެ. ދެވަނަ ގޮތަކީ މަޖިލީހުގެ އުސޫލަށް ބަދަލު ގެނައުމަށް މެމްބަރަކު ޤަރާރެއް ހުށައެޅުންކަމަށާއި އެހެންނަމަވެސް އެ ގޮތަކީ ދިގު މަރުހަލާއެއް ދެމިގެން ހިގައިދާނެ ކަމެއްކަން ނިއުޝާ ފާހަގަކުރެއްވިއެވެ.

"ޤަރާރެއް ހުށައަޅާ އެ މަސައްކަތް ގެންދިއުމަށް ދިގު މުއްދަތެއް ހޭދަވާނެކަމަށް ޤަބޫލުކުރެވޭ. އެހެންވީމަ މިއީ މިވަގުތަށް ފަސޭހައިން ކުރެވޭނެ ކަމެއްކަމަކަށް ނުފެނޭ." ނިއުޝާ ވިދާޅުވިއެވެ.

ތިންވަނަ ކަމެއްގެ ގޮތުގައި ނިއުޝާ ފާހަގަކުރެއްވީ މަޖިލީހުގެ ޤަވައިދަށް ގެންނަން ފެންނަ އިސްލާހު، ވަކި މައްސަލައެއްގެ ގޮތުގައި މަޖިލިހުގެ ތަޅުމަށް ހުށައެޅުމެވެ. މިފަދަ މައްސަލައެއް މަޖިލީހުގެ ތަޅުމަށް ހުށައަޅާފައި މިހާރުވެސް އޮތްކަން ފާހަގަކުރައްވާ ނިއުޝާ ވިދާޅުވީ އެ މައްސަލަ ކުރިޔަށް ގެންދިޔުމަށް އެޖެންޑާކޮށްދެއްވުމަށް މަޖިލީހުގެ ނައިބު ރައީސްގެ އަރިހުން އެދިވަޑައިގެންފައިވާކަމަށެވެ.

ރައީސް ނަޝީދުގެ މަގާމުން ވަކިކުރުމުގެ ގަރާރު މަޖިލީހުގައި ކުރިޔަށް ގެންދެވިދާނެ އެންމެ ފަހު ކަމެއްގެ ގޮތުގައި ނިއުޝާ ފާހަގަކުރެއްވީ ޚާއްސަ އިޖުރާއަތާއި އެއްގޮތަށް، މަޖލީހުގެ ގަވައިދުގެ 250 ވަނަ މާއްދާގައި ބުނާ، "ޤަވައިދުގައި ނެތް ކަމެއް ކަމަށް ބަލާ" ރައްޔިތުންގެ މަޖިލީހުން މި މައްސަލައާއި މެދު ގޮތެއް ނިންމެވުންކަމަށެވެ.

މަޖިލީހުގެ ގަވައިދު މާނަކުރުމަށް އެމްޑީޕީން ސުޕްރީމްކޯަޓަށް ހުށައެޅި މައްސަލައިގެ އަޑުއެހުންތައް މިއަދު ވަނީ ނިންމާލާފައެވެ. މި މައްސަލާގައި ދެން އޮންނާނީ ހުކުމްކުރުމެވެ.