ތަޙްޤީޤުތައް ހަރުދަނާކުރުމުގެ ޕްރޮގްރާމްގެ ތެރެއިން ޕްރޮސިކިއުޓަރ ޖެނެރަލް ގަލޮޅު ޕޮލިހަށް

ދިވެހި ފުލުހުންގެ ޚިދުމަތުން ހިންގަވާ ޖިނާއީ ތަޙްޤީޤުތައް ހަރުދަނާކޮށް، ފެންވަރު ރަނގަޅުކުރުމަށް، ދިވެހި ފުލުހުންގެ ޚިދުމަތާއި ޕްރޮސިކިއުޓަރ ޖެނެރަލްގެ އޮފީހާއެކު ކުރާ މަސައްކަތުގެ ތެރެއިން، ޕްރޮސިކިއުޓަރ ޖެނެރަލް ހުސައިން ޝަމީމު ގަލޮޅު ޕޮލިސްއަށް ޒިޔާރަށް ކުރައްވައިފިއެވެ.

މިޒިޔާރަތުގައި، ގަލޮޅު ޕޮލިސް ސްޓޭޝަންގައި ޢާންމުންނަށް ޚިދުމަތްދޭން ހުރި ވަޞީލަތްތައް ޕްރޮސިކިއުޓަރ ޖެނެރަލް ބައްލަވާލައްވައި، އިންވެސްޓިގޭޓަރުންނާ މަޝްވަރާ ކުރެއްވިއެވެ. އަދި ސްޓޭޝަންގެ އެކި މަސައްކަތްތަކުގައި ޕްރޮސިކިއުޓަރ ޖެނެރަލްގެ އޮފީހުން ފޯރުކޮށްދެވޭނެ އެހީތެރިކަމާބެހޭ ގޮތުންވެސް މަޝްވަރާކުރެއްވިއެވެ. މިސިލްސިލާ މަސައްކަތުގައި ގަލޮޅު ޕޮލިސް ސްޓޭޝަންގައި ނުނިމި ހުރި މައްސަލަތައް ނިންމުމުގައި ޤާނޫނީ ގޮތުން ދެއްވެން ހުރި ލަފައާއި އިރުޝާދު ދެއްވުމުގެ ޚާއްޞަ މަސައްކަތްތަކެއްވެސް ވަނީ އިފްތިތާޙު ކުރައްވާފައެވެ.

ޕްރޮސިކިއުޓަރ ޖެނެރަލް ގަލޮޅު ޕޮލިސްއަށް ކުރެއްވި މިޒިޔާރަތުގައި، ޑެޕިއުޓީ ޕްރޮސިކިއުޓަރ ޖެނެރަލް އަލްއުސްތާޛު ޢަލީ ސަމީރާއި، އެސިސްޓަންޓް ޕްރޮސިކިއުޓަރ ޖެނެރަލް އަލްއުސްތާޛު ޢަބްދުﷲ ރާބިޢުއާއި އެސިސްޓަންޓް ޕްރޮސިކިއުޓަރ ޖެނެރަލް އަލްއުސްތާޛާ ޝަމްރާ ޝަމީމާއި، ޕީޖީ އޮފީހުގެ އެކި ޔުނިޓުތަކުގެ ވެރިން ބައިވެރިވެވަޑައިގެންނެވިއެވެ.