ޔަހޫދީ ފައުޖުން ޣައްޒާގައި ހިންގަމުންދާ ލާއިންސާނީ އުދުވާންތައް ތިން ދުވަހުގެ މުއްދަތަކަށް މެދުކަނޑައިލަން އެމެރިކާގެ ރައީސް ޖޯ ބައިޑަން އެދިވަޑައިގަންނަވައިފިއެވެ. މި ކަމާ ގުޅޭ ގޮތުން އޭނާ ވަނީ ޒަޔަނިސްޓު އިސްރާޢީލުގެ ޖައްބާރު ބޮޑުވަޒީރު ބެންޖަމިން ނަތަންޔާހޫއާ ވާހަކަފުޅު ދައްކަވާފައެވެ.
ޢައްޒާއަށް ހަމަލަ ދިނުން ތިން ދުވަހަށް މެދުކަނޑައިލަން ބައިޑަން ގޮވާލައްވާފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު ވަނީ 10,328 އަރާފައެވެ. އޭގެ ތެރޭގައި 4,000 އަށްވުރެ ގިނަ މައުސޫމު ކުޑަކުދިން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 24,000 އަށް އަރައެވެ.
ޣައްޒާއަށް ދެމުންދާ ހަމަލަތައް ވަގުތީ ގޮތުން މެދުކަނޑައިލުމާ ގުޅޭ ގޮތުން ޤަޠަރުން އިސްވެ އެމެރިކާއާއި ޒަޔަނިސްޓު އިސްރާޢީލާ އެކު ދަނީ މަޝްވަރާ ކުރަމުންނެވެ. ޤަޠަރުން މެދުވެރިއެއްގެ ދައުރު އަދާކުރާ މި މަޝްވަރާތަކުގައި ޣައްޒާގައި ވެރިކަން ކުރާ ޙަމާސް ޖަމާޢަތުން ވެސް ބައިވެރިވެއެވެ.
ޙަމާސްއިން ބުނީ، ތިން ދުވަހުގެ މުއްދަތަކަށް ޔަހޫދީ ފައުޖުގެ ހަމަލަތައް މެދުކަނޑައިލައިފި ނަމަ، އެ ޖަމާޢަތުން ރަހީނު ކޮށްފައިވާ އަސީރުންގެ ތެރެއިން 10 ނުވަތަ 15 މީހުން މިނިވަން ކުރާނެ ކަމުގައެވެ. މިއީ، އަސީރުން މިނިވަން ކުރަން ލިބިފައި އޮތް ރަނުގެ ފުރުޞަތެއް ކަން ޖައްބާރު ނަތަންޔާހޫއަށް ވިސްނައިދޭން ބައިޑަން ގެންދަވަނީ މަސައްކަތް ކުރައްވަމުންނެވެ.
ޣައްޒާއަށް ހަމަލަ ދިނުން ކުޑަ ވަގުތު ކޮޅަކަށް ނަމަވެސް މެދުކަނޑައިލައިފި ނަމަ، ޒަޚަމުވެފައިވާ މީހުންނަށް ޞިއްޙީ އެހީތެރިކަން ފޯރުކޮށްދޭން ފުރުޞަތު ލިބޭނެއެވެ. އަދި، ކާބޯތަކެތި ހުސްވެފައިވާ ގެތަކަށް އެ ތަކެތި ފޯރުކޮށްދީ، ޣައްޒާއަށް އިންސާނީ އެހީގެ ސާމާނު ވައްދަން ވެސް ފުރުޞަތު ލިބޭނެއެވެ. ޙަމާސްގެ ބޭނުމަކީ އެއީއެވެ.
މި ފަދަ އެއްބަސްވުމެއް އެކުލަވައިލެވިއްޖެ ނަމަ، ޙަމާސްއިން ރަހީނު ކޮށްފައިވާ ޔަހޫދީންގެ ފުރިހަމަ ލިސްޓެއް ޢާންމު ކުރާނެ ކަމުގައި ވެސް އެ ޖަމާޢަތުން ބުނެއެވެ. ނަމަވެސް، ޢައްޒާގެ މުސްލިމުން ޝަހީދު ކުރުމަށް ޔަހޫދީ ފައުޖުން ހިންގަމުންދާ އަސްކަރީ ކެމްޕޭން ކުޑަ ހިނދުކޮޅަކަށް ވެސް މެދުކަނޑައިލަން ޖައްބާރު ނަތަންޔާހޫ ބޭނުން ނުވާ ކަމުގައި ރިޕޯޓުތައް ބުނެއެވެ.
ބައިޑަން ނަތަންޔާހޫއާ ފޯނުން ގުޅުއްވައި ދެއްކެވި ވާހަކަފުޅާ ގުޅޭ ގޮތުން ވައިޓް ހައުސްއިން ބުނީ، ގަތުލުއާންމު ވަގުތީ ގޮތުން މެދުކަނޑައިލާ، ހާލުގައި ޖެހިފައިވާ ޢާންމުންނަށް ހަނގުރާމަ ހިނގަމުންދާ ސަރަޙައްދުތައް ދޫކޮށް ރައްކާތެރި ހިސާބުތަކަށް ބަދަލުވުމުގެ ފުރުޞަތު ދިނުމަށް ބައިޑަން އެދިވަޑައިގެންނެވި ކަމުގައެވެ. ނަމަވެސް، ފާހަގަ ކޮށްލަން ޖެހޭ ކަމަކީ، ޢައްޒާގެ ރައްކާތެރި ކަމަށް ބުނެވޭ ހަމަ އެންމެ އިންޗިއެއްގެ މިންވަރު ވެސް ނެތް ކަމެވެ. ޔަހޫދީ ފައުޖުން ދަނީ ހޮސްޕިޓަލްތަކާއި އެމްބިޔުލާންސްތަކަށް ވެސް ބޮން އަޅަމުންނެވެ.
ޣައްޒާގެ ގަތުލުއާންމު ފަށާފައި ވަނީ އޮކްޓޫބަރު 7 ވަނަ ދުވަހު ޙަމާސް ޖަމާޢަތުގެ މުޖާހިދުން ޒަޔަނިސްޓު އިސްރާޢީލުގެ ރަށްތަކަށް އަރައި 1,400 އެއްހާ މީހުން މަރައިލުމާ ގުޅިގެންނެވެ. ޙަމާސްއިން ވަނީ އިސްރާޢީލުގެ 180 އެއްހާ މީހުން ރަހީނު ކޮށްފައެވެ. އަދި، ޕަލަސްޓީނިޔަން އިސްލާމިކް ޖިހާދުން އިތުރު 40 މީހުން ރަހީނު ކޮށްފައިވާއިރު، އެހެން ޖަމާޢަތްތަކުން ވަނީ އިތުރު 20 މީހަކު ރަހީނު ކޮށްފައެވެ.