ރިޔާސީ އިންތިޚާބުގެ ފުރަތަމަ ބުރުގެ ކެންޑިޑޭޓުން މާލީ ބަޔާން ހުށަހަޅުއްވައިފި

މިދޔަ ސެޕްޓެމްބަރު މަހު ބޭއްވި ރިޔާސީ އިންތިޚާބުގެ ފުރަތަމަ ބުރުގައި ވާދަކުރެއްވި ކެންޑިޑޭޓުންގެ ތެރެއިން ދެވަނަ ބުރަށް ވަޑައިނުގެންނެވުނު ހުރިހާ ކެންޑިޑޭޓުންގެ މާލީ ބަޔާން ހުށަހަޅުއްވާފައިވާ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

ދެވަނަ ބުރަށް ވަޑައިނުގެންނެވުނު ކެންޑިޑޭޓުންގެ އިންތިޚާބާ ގުޅޭ މާލީ ކަންކަމާ ބެހޭ ގޮތުން ކޮށްފައިވާ ހުރިހާ މުއާމަލާތްތައް އޮޑިޓް ކުރުމަށްފަހު އެއޮޑިޓް ރިޕޯޓު އިންތިޚާބު ބާއްވާ ތާރީޚުންގެ ފެށިގެން ގިނަވެގެން 60 ދުވަސް ތެރޭ އިލެކްޝަންސް ކޮމިޝަނަށް ހުށަހަޅުއްވަންޖެހެއެވެ. އެހެންކަމުން ދެވަނަ ބުރަށް ވަޑައިނުގެންނެވުނު ކެންޑިޑޭޓުންގެ މާލީ ބަޔާން މިއަދުގެ ކުރިން ހުށަހަޅުއްވަންޖެހެއެވެ.

އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވީ ރިޔާސީ އިންތިޚާބުގެ ފުރަތަމަ ބުރުގައި ވާދަކުރެއްވި ކެންޑިޑޭޓުންގެ ތެރެއިން، މާލީ ބަޔާން ހުށަހަޅުއްވަން ޖެހިވަޑައިގަންނަވާ ހުރިހާ ކެންޑިޑޭޓުން، ބަޔާން ހުށަހަޅުއްވަން ޖެހޭ ވަގުތަށް އިލެކްޝަންސް ކޮމިޝަނަށް މާލީ ބަޔާން ހުށައަޅުއްވާފައިވާކަމަށެވެ. އެގޮތުން އެންމެ ފުރަތަމަ މާލީ ބަޔާން ހުށައެޅުއްވީ އިންތިޚާބުގައި އަމިއްލަ ގޮތުން ވާދަކުރެއްވި އަލްއުސްތާޛު ޙަސަން ޒަމީލްއެވެ. ޒަމީލް ވަނީ މިދިޔަމަހުގެ 30 ވަނަ ދުވަހު މާލީ ބަޔާން އިލެކްޝަންސް ކޮމިޝަނަށް ހުށައަޅުއްވާފައެވެ. ދެންތިބި 5 ކެންޑިޑޭޓުން މާލީ ބަޔާން ހުށައަޅުއްވާފައިވަނީ މިއަދުއެވެ.

ރިޔާސީ އިންތިޚާބުގެ ދެވަނަ ބުރުގައި ވާދަކުރެއްވި މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙާއި ޕީޕީއެމް، ޕީއެންސީން ކެންޑިޑޭޓް ޑރ.މުޙައްމަދު މުއިއްޒުގެ މާލީ ބަޔާންވެސް ދެވަނަ ބުރު ބޭއްވި ތާރީޚުން ފެށިގެން ގިނަވެގެން 60 ދުވަހުގެ ތެރޭގި ހުށަހަޅުއްވަންޖެހެއެވެ. މިމުއްދަތު ހަމަވާނީ މިމަހުގެ 29 ވަނަ ދުވަހަށެވެ.

މާލީ ބަޔާން ހުށައަޅުއްވާއިރު އިންތިޚާބާ ގުޅިގެން ކެންޑިޑޭޓު ކޮށްފައިވާ ޚަރަދުތަކުގެ ތަފުސީލާއި އިންތިޚާބަށް ޚަރަދު ކުރެއްވުމަށް ފައިސާ ހޯއްދެވި ގޮތުގެ ތަފުސީލު ހިމަނުއްވަންޖެހެއެވެ. އަދި ފައިސާއާއި ތަކެތި ދިން ފަރާތްތަކާއި ދިން މިންވަރުގެ ތަފުސީލާއި ބޭންކު އެކައުންޓުން ކުރައްވާފައިވާ ހުރިހާ މުއާމަލާތެއް އެނގޭނެ ބޭންކު އެކައުންޓް ސްޓޭޓްމަންޓާއި ސައްހަ މައުލޫމާތުކަން އަންގައިދޭން ފައިސާގެ ރަސީދު، އިންވޮއިސް، ބިލުގެ ކޮޕީވެސް ހުށައަޅުއްވަން ޖެހެއެވެ.

އިންތިޚާބާ ބެހޭ ޢާއްމު ޤާނޫނަށް 2018 އަހަރު ގެނައި އިޞްލާހުގައި ބުނެފައި ވަނީ، ވަކި ކަމެއް ކުރުމަށް އެޤާނޫނުގައި ކަނޑައަޅާފައި ވަނިކޮށް އެކަން ނުކުރުމަކީ އިންތިޚާބީ ކުށެއް ކަމަށެވެ. އޭގެ އަދަބެއްގެ ގޮތުން، 6 މަސް ދުވަހާއި 2 އަހަރު ދުވަހުގެ މުއްދަތަކަށް ޖަލަށް ލުން ނުވަތަ 6،000 ރުފިޔާއާއި، 24،000ރުފިޔާއާ އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށްވެސް އެޤާނޫނުގައި ބުނެފައިވެއެވެ.