އިސްރާޢީލާ ދެކޮޅަށް ހަރުކަށި ފިޔަވަޅު އަޅަން ބެލްޖިޔަމްގެ ބޮޑުވަޒީރުގެ ނައިބު ގޮވައިލައްވައިފި
ޔަހޫދީން ޣައްޒާގެ މުސްލިމުންނާ ދެކޮޅަށް ހިންގަމުންދާ ގަތުލުއާންމާ ގުޅިގެން ޒަޔަނިސްޓު އިސްރާޢީލާ ދެކޮޅަށް ހަރުކަށި ފިޔަވަޅުތަކެއް އެޅުމަށް ބެލްޖިޔަމްގެ ބޮޑުވަޒީރުގެ ނައިބު ޕޭތްރާ ދޭ ސަތަރ ގޮވައިލައްވައިފިއެވެ. ބެލްޖިޔަމްގެ ނޫހެއް ކަމުގައިވާ ނިއުސްބްލާދަށް ދެއްވި އިންޓަރވިއުއެއްގައި ދޭ ސަތަރ ވަނީ، ޣައްޒާގައި ޔަހޫދީން ހިންގަމުންދާ ގަތުލުއާންމު ތަހުޤީޤު ކުރުމަށް ވެސް އެ ޤައުމުގެ ސަރުކާރަށް ގޮވައިލައްވާފައެވެ.
"މިއީ އިސްރާޢީލާ ދެކޮޅަށް ހަރުކަށި ފިޔަވަޅުތަކެއް އަޅަންވީ ވަގުތު. ވާރޭ ވެހޭ ފަދައިން ޣައްޒާއަށް ބޮން އެޅުމަކީ އިންސާނިއްޔަތާ ޚިލާފު އަމަލެއް. ގަތުލުއާންމު ހުއްޓައިލަން ބައިނަލްއަޤުވާމީ މުޖުތަމަޢުން ގޮވައިލާފައިވާ ގޮވައިލުމަށް އިސްރާޢީލުން ބީރު ކަންފަތެއް ދެމުންދާ ކަން ވަރަށް ސާފު،" ދޭ ސަތަރ ވިދާޅުވިއެވެ.
ޒަޔަނިސްޓު އިސްރާޢީލާ ދެކޮޅަށް ފިޔަވަޅުތަކެއް އެޅުމަށް އޭނާ ގޮވައިލައްވާފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާގައި ހިންގަމުންދާ ލާއިންސާނީ ޖަރީމާގައި ޝަހީދު ކޮށްލާފައިވާ މީހުންގެ ޢަދަދު ވަނީ 10,569 އަށް އަރާފައެވެ. އޭގެ ތެރޭގައި 4,300 އަށްވުރެ ގިނަ ޢަދަދަކަށް މައުސޫމް ކުޑަކުދިން ހިމެނޭއިރު، ޒަޚަމު ކޮށްލާފައިވާ މީހުންގެ ޢަދަދު ވެސް ވަނީ 24,000 އަށްވުރެ މައްޗަށް އުފުލިފައެވެ.
މި ކަމާ ގުޅޭ ގޮތުން ވާހަކަފުޅު ދައްކަވަމުން ދޭ ސަތަރ ވިދާޅުވީ، އިސްރާޢީލާ އެކު ވިލާތުގެ އިއްތިހާދު (އީ.ޔޫ)ން ހަދާފައިވާ ހުރިހާ އެއްބަސްވުންތަކެއް އުވައިލަން ޖެހޭ ކަމުގައެވެ. އޭނާ އިޝާރާތް ކުރައްވާފައި ވަނީ އީ.ޔޫއާއި އިސްރާޢީލާ ދެމެދު އިޤުތިޞާދީ އަދި ސިޔާސީ ދާއިރާއިން ގުޅުން ބަދަހި ކުރުމަށް ހަދާފައިވާ އެއްބަސްވުންތަކަށެވެ.
ފަލަސްޠީނުގައި އުފައްދާ މުދާ އިމްޕޯޓު ކުރުމަށް ހުއްޓައިލުމަށް ވެސް އޭނާ ގޮވައިލެއްވިއެވެ. އަދި، ހުޅަނގު އައްސޭރީގައި ޤަވާޢިދާ ޚިލާފަށް ވަޒަންވެރި ކޮށްފައިވާ ޔަހޫދީންގެ ތެރެއިން ހަރުކަށި މީހުންނާއި، ހަނގުރާމައިގެ ކުށްތައް ހިންގުމުގައި ބައިވެރިވާ މީހުން އީ.ޔޫއަށް އެތެރެވުން މަނާ ކުރަން ޖެހޭ ކަމުގައި ވެސް އޭނާ ވިދާޅުވިއެވެ.
ޒަޔަނިސްޓު އިސްރާޢީލާ ދެކޮޅަށް ފިޔަވަޅު އަޅަން ދޭ ސަތަރ ގޮވައިލެއްވި ނަމަވެސް، އޭނާ ވަނީ ޙަމާސް ޖަމާޢަތުގެ ހަރަކާތްތައް ހުއްޓުވަން މަސައްކަތްތަކެއް ކުރުމަށް ވެސް ގޮވައިލައްވާފައެވެ. މި ގޮތުން، ޙަމާސް ޖަމާޢަތަށް މާލީ އެހީތެރިކަން ފޯރުކޮށްދޭ ފަރާތްތައް ހޯދައި، އެ ފަރާތްތަކާ މެދު ފިޔަވަޅު އެޅުމަށް އޭނާ ގޮވައިލެއްވިއެވެ.