ނުކުޅެދުންތެރިކަން ހުންނަ މީހުންނާމެދު ދެކޭގޮތް ބަދަލުވެއްޖެ، މުޖުތަމަޢުން ބަލައިގަނެފި: ނާއިބު ރައީސް

ނުކުޅެދުންތެރިކަން ހުންނަ މީހުންނާމެދު ދެކޭގޮތް ބަދަލުވެ، އެފަދަ މީހުން މިހާރު މުޖުތަމަޢުއިން ބަލައި ގަންނަމުންދާކަމަށް ރައީސުލްޖުމްހޫރިއްޔާގެ ނާއިބު ފައިސަލް ނަސީމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ނުކުޅެދުންތެރިކަން ހުންނަ މީހުންގެ ހައްގުގައި މަސައްކަތްކުރާ އަމިއްލަ ޖަމްޢިއްޔާއެއްކަމަށްވާ ކެއާރ ސޮއައިޓީގެ 25 ވަނަ އަހަރީ ދުވަސް ފާހަގަކުރުމަށް ސޯޝަލް ސެންޓާރުގައި ބޭއްވި ރަސްމިއްޔާތުގައި ދެއްކެވި ވާހަކަފުޅުގައެވެ.

ނައިބް ރައީސް ފައިސަލް ނަސީމް ވިދާޅުވީ މީގެ 25 އަހަރުކުކުރިން ކެއަރ ސޮސައިޓީ އުފެދިގެން އައި ދުވަސްވަރު، ނުކުޅެދުންތެރިކަން ހުންނަ މީހުންނާއިމެދު މުޖުތަމަޢު ދެކޭގޮތާއި، އެފަދަ މީހުން ބަލައިގަންނަގޮތް، މިހާރު ވަރަށް ބޮޑަށް ބަދަލުވެފައިވާކަމަށެވެ. މި ކަމުގައި ހޭލުންތެރިކަން ހުރި މިންވަރު މި މުޖްތަމައުއަށް ބަލާލުމުން ފެނިގެން ދާކަމަށްވެސް ނާއިބު ރައީސް ވިދާޅުވިއެވެ. ކަމެއް ހާސިލް ވެގެން ދަނީ ވަރަށް ގިނަ ބައެއްގެ މަސައްކަތުންކަމަށާއި، އެގޮތުން ނުކުޅެދުންތެރިކަން ހުންނަ މީހުންނާމެދު ދެކޭގޮތް ބަދަލުވީ އަމިއްލަ ޖަމުއިއްޔާތަކާއި ސަރުކާރުތަކުން ކުރި މަސައްކަތުންކަމަށް ނާއިބު ރައީސް ވިދާޅުވިއެވެ.

"މި 5 އަހަރުގައި އަޅުގަނޑުމެއްނަށް ޚާއްސަކޮށް، ޑިޕާޓްމަންޓް އޮފް އިންކުލޫސުވިން އުފައްދާ ސުކޫލްތަކުގައިވެސް މި ކަންތައް ފުޅާކޮށް ވަރަށް ގިނަ ހޮސްޕިޓަލްތަކުގައިވެސް ތެރަޕީ ދިނުމާއި ވަރަށް ގިނަ ކަންކަން ކުރެވިއްޖެ. އަޅުގަނޑު މިއަދު ގަބޫލުކުރަނީ މި ކުލުނާއި ލޯބި އުފެދިގެން ކުރެވޭނެ ކަމެއްކަން. މީ ލޯބިން ކުރެވޭނެކަމެއް. މީ ހަމަ އެކަނި ވަޒީފާއެއްގެ ގޮތުން ކުރާނެ ކަމެއްނޫން." ނައިބް ރައީސް ވިދާޅުވިއެވެ.

ނައިބް ރައީސް ފައިސަލް ނަސީމް ވިދާޅުވީ ކޮންމެ މަސައްކަތަކީވެސް އެކުވެރިކަމާއިއެކު އެއްބައިވަންތަކަމާއެކު ކޮށްފިނަމަ ކާމިޔާބު ވާނެ ކަމެއްކަމަށެވެ. އެގޮތުން މިފަދަ މަސައްކަތެއްގައި ބޭނުންވަނީ މުޖްތަމައުގައި ބޭނުންޖެހިފައި ތިބި ފަރާއްތަކަށް އަޅާލާނެ ބަޔަކުކަމަށް ނާއިބު ރައީސް ވިދާޅުވިއެވެ.

މި ރަސްމިއްޔާތުގައި ވާހަކަ ދައްކަމުން ކެއާރ ސޮސައިޓީގެ އެގްޒެކެޓިވް ބޯޑްގެ ޗެއާރޕާރސަން އިސްމާޢީލް އަދުހަމް ވިދާޅުވީ، ކެއާރ ސޮސައިޓީ އުފެދުނީންސުރެށް އެންމެ ބޭނުންވީ ހާއްޞަ އެހީއަށް ބޭނުންވާ ފަރާއްތަކަކީ މުޖްތަމައުގެ ބައެއްގެ ގޮތުގައި އަދި މުޖްތަމައުގައި ބަލައިގަންނަ ބައެއްގެ ގޮތުގައި ހެދުންކަމަށެވެ.

އެގޮތުން މީގެ 25 އަހަރު ކުރިއަށް ބެލި ކަމުގައިވީނަމަވެސް ނުކުޅެދުންތެރިކަން ހުންނަ މީހުންނަށް އެހާ ބޮޑު އަހަންމިއްޔަތުކަމެށް ދީފައި ނުވާކަމަށް އަދުހަމް ވިދާޅުވިއެވެ. އެހެންނަމަވެސް އަދުގެ މި މުޖްތަމައުއަށް ބަލައިފިނަމަ ސުކޫލްތަކުގައިވެސް އެނޫން ތަންތަނުގައިވެސް ނުކުޅެދުންތެރިކަން ހުންނަ މީހުންނަކީ މުޖްތަމައުގައި ބަލައިގަންނަ ބަޔަކަށް ވެގެން ގޮސްފައިވާކަމަށް އަދުހަމް ވިދާޅުވިއެވެ. އެގޮތުން މިއީ ވަރަށް ބޮޑު ކާމިޔާބީއެއްގެ ގޮތުގައި އަދުހަމް ސިފަކުރެއްވިއެވެ.

"އަޅުގަނޑު އެއްގޮތަކަށްވެސް ނުދައްނަވާނަން މީ ހަމަ އެކަނި ކެއާރގެ މަސައްކަތެކޭއެއް. އެކަމަކު މުޖްތަމައު ބަލައިގަނެ، އެކި އެކި ފަރުދުންނާއި އެކި އެކި ޖަމާއަތްތަކުއްނާއި އަދި ސަރުކާރުގެ އެކި ފަރާއްތަކުން މިކަން ބަލައިގަނެ، މިކަމަކީ އަޅުގަނޑުމެންގެ މުޖްތަމައުގައި ބޭނުންވެފައިވާ ކަމެއްކަން އަޅުގަނޑުމެންގެ މުޖްތަމައުއަށް އިނގޭ" އަދުހަމް ވިދާޅުވިއެވެ.

ކެއާރ ސޮސައިޓީއަށް 25 އަހަރު ފުރުމުގެ ގޮތުން އެ ސޮސައިޓީން ވަނީ ހާއްސަ އޯޑިއޯ ލަވައެއްވެސް ލޯންޗްކޮށްފައެވެ. ކެއަރ ސޮސައިޓީގެ އަހަރީ ދުވަސް ފާހަގަކުރުމަށް ބޭއްވި މި ހަރަކާތުގައި ވަނީ ކުޑަކުދިން ޝަޢުގުވެރިކުރުވާ ގިނަ ހަރަކާތްތަކެއްވެސް ކުރިއަށް ގެންގޮސްފައެވެ. ނާއިބު ރައީސް ވަނީ އެ ސްޓޯލްތަކަށް ޒިޔާރަތްކުރައްވާ ބައްދަލަވާލައްވާފައެވެ.

1998 ވަނަ އަހަރު އުފެދުނު ކެއާރ ސޮސައިޓީއަކީ ނުކުޅެދުންތެރިކަން ހުންނަ ކުދިންނަށް ތައުލީމް އުނގަންނައިދީ، އެފަރާތްތަކުގެ ޙައްޤުޤައި މަސައްކަތްކުރުމަށް އުފައްދާފައިވާ ޖަމްއިއްޔާކެވެ.