ޒަޔަނިސްޓު އިސްރާޢީލުގެ ދެކުނުގައި އޮންނަ ރަށެއް ކަމުގައިވާ އެއިލާތަށް ނުރައްކާތެރި ޑްރޯން ހަމަލައެއް ދީފިއެވެ. ޑްރޯން ހަމަލަ އަމާޒު ކޮށްފައި ވަނީ ޢާންމުން ދިރިއުޅޭ ޢިމާރާތަކަށް ކަމުގައި ޔަހޫދީން ބުނެއެވެ. މި ހަމަލާގައި އެއްވެސް މީހެއްގެ ފުރާނައަށް ނުރައްކާނުވި ނަމަވެސް، ޢިމާރާތަށް ގެއްލުންތަކެއް ލިބުނު ކަމުގައި ޔަހޫދީން ބުނެއެވެ. ބައެއް ރިޕޯޓުތައް ބުނާ ގޮތުގައި މި ހަމަލާ އަމާޒު ކޮށްފައި ވަނީ އެއިލާތުގައި ހުންނަ ސްކޫލަކަށެވެ.
އެއިލާތަށް ދީފައިވާ ޑްރޯން ހަމަލާގެ ފަހަތުގައި ވަނީ ކޮން ބަޔެއް ކަން އަދި ސާފެއް ނޫނެވެ. ނަމަވެސް، ޔަމަނުގައި ހަރަކާތްތެރިވާ ހޫޘީ ޖަމާޢަތުން ދާދި ފަހުން ވަނީ ޒަޔަނިސްޓު އިސްރާޢީލުގެ ދެކުނުގައި އޮންނަ ރަށްތަކަށް މިސައިލާއި ޑްރޯން ހަމަލަތަކެއް އަމާޒު ކޮށްފައެވެ. ހޫޘީން ޔަހޫދީންނަށް ހަމަލަ ދީފައި ވަނީ ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގެ ބަދަލު ހިފުމުގެ ގޮތުންނެވެ.
އެއިލާތަށް ޑްރޯން ހަމަލަތަކެއް ދީފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާގައި ޔަހޫދީން ހިންގަމުންދާ ލާއިންސާނީ ޖާރީމާތަކުގައި ޝަހީދު ކޮށްލާފައިވާ މީހުންގެ ޢަދަދު ވަނީ 10,812 އަށް އަރާފައެވެ. އޭގެ ތެރޭގައި 4,300 އަށްވުރެ ގިނަ ޢަދަދެއްގެ ކުޑަކުދިން ހިމެނޭއިރު، ޒަޚަމު ކޮށްލާފައިވާ މީހުންގެ ޢަދަދު މިހާރު ވަނީ 24,000 އަށް އުފުލިފައެވެ.
ހޫޘީންގެ އިތުރުން ލުބުނާނުގައި ހަރަކާތްތެރިވާ ޙަމާސް ޖަމާޢަތުގެ ގޮތްޕާއި، ޙިޒްބުاللهގެ މުޖާހިދުން ވެސް ދަނީ އިސްރާޢީލުގެ ރަށްތަކަށް ހަމަލަ ދެމުންނެވެ. މި ގޮތުން ލުބުނާނުގައި ހަރަކާތްތެރިވާ ޙަމާސް ޖަމާޢަތުގެ ގޮފިން ވަނީ އިސްރާޢީލުގެ ރަށެއް ކަމުގައިވާ ކިރިޔަތް ޝްމޯނޭއަށް ވަރުގަދަ ހަމަލަތަކެއް ދީފިއެވެ. އެ ރަށަށް 19 ފަހަރެއްގެ މަތިން ރޮކެޓް ހަމަލަތަކެއް ދީފައި ވަނީ ޙަމާސް ޖަމާޢަތުގެ ހަތިޔާރު އެޅި ގޮފި – ޢިއްޒުއްދީން އަލް-ޤައްސާމް ބްރިގޭޑްސްއިންނެވެ. ކިރިޔަތް ޝްމޯނޭއަކީ އިސްރާޢީލުގެ އުތުރުގައި އޮންނަ ރަށެކެވެ.
ލުބުނާނުގައި ހަރަކާތްތެރިވާ ޙަމާސްގެ މުޖާހިދުންގެ އިތުރުން ޙިޒްބުاللهގެ މުޖާހިދުން ދެމުންދާ ހަމަލަތަކުގެ ރައްދުގައި ޔަހޫދީ ފައުޖުން ވެސް ދަނީ ލުބުނާނުގެ ރަށްތަކަށް ބޮން އަޅަމުންނެވެ. މި ހަމަލަތަކުގައި 70 މުޖާހިދުން ޝަހީދުވެފައިވާ ކަމުގައި ލުބުނާނުގެ އޮފިޝަލުން ވިދާޅުވެއެވެ.
އޭގެ ތެރޭގައި ޙިޒްބުالله ޖަމާޢަތުގެ 50 މުޖާހިދުން ހިމެނެއެވެ. ޔަހޫދީންގެ ހަމަލަތަކުގައި ޢާންމުންގެ ހަތް މީހުން ވެސް ޝަހީދު ކޮށްލާފައިވެއެވެ. މުޖާހިދުންގެ ހަމަލަތަކުގައި ޔަހޫދީންގެ ނުވަ މީހުން ވަނީ މަރައިލާފައެވެ. އޭގެ ތެރޭގައި ޔަހޫދީ އަސްކަރިއްޔާގެ ޖައްބާރު ސިފައިންގެ އަށް މީހުން ހިމެނެއެވެ.