ޒަޔަނިސްޓު އިސްރާޢީލުގެ ދެކުނުގައި އޮންނަ ރަށެއް ކަމުގައިވާ އެއިލާތަށް ޑްރޯން ހަމަލައެއް ދިނުމުން އެ ކަމުގެ ބަދަލު ހިފުމުގެ ގޮތުން ޔަހޫދީ ފައުޖުން ސޫރިޔާއަށް ހަމަލަތަކެއް ދީފިއެވެ. އެއިލާތަށް ދީފައިވާ ޑްރޯން ހަމަލަ އަމާޒު ކޮށްފައި ވަނީ ސްކޫލް ޢިމާރާތަކަށެވެ. ޑްރޯން ހަމަލާގައި އެއްވެސް މީހެއްގެ ފުރާނައަށް ނުރައްކާވެފައި ނުވި ނަމަވެސް، ސްކޫލަށް ވަނީ ގެއްލުން ލިބިފައެވެ.
އެއިލާތަކީ ސޫރިޔާއާ 400 އެއްހާ ކިލޯމީޓަރު ދުރުގައި އޮންނަ ރަށެކެވެ. ޔަހޫދީ އިސްރާޢީލުން ބުނީ އެއިލާތަށް ޑްރޯން ހަމަލަތައް ދިނުމުގެ ފަހަތުގައި އޮތީ ސޫރިޔާގައި ހަރަކާތްތެރިވާ ހަތިޔާރުއެޅި ޖަމާޢަތެއް ކަމުގައެވެ. ނަމަވެސް، އެއީ ކޮން ޖަމާޢަތެއް ކަން ޔަހޫދީން ހާމަކޮށްފައެއް ނުވެއެވެ. ބުނީ، އެ ޖަމާޢަތުގެ އަމާޒުތަކަށް ރައްދު ހަމަލަ ދީފައިވާނެ ކަމުގައެވެ.
އެއިލާތަށް ދީފައިވާ ޑްރޯން ހަމަލާގެ ފުރިހަމަ ޒިންމާ ސޫރިޔާގެ ސަރުކާރުން އުފުލަން ޖެހޭނެ ކަމުގައި ވެސް ޔަހޫދީން ބުނެއެވެ. އަދި، އެއީ ޓެރެރިޒަމްގެ އަމަލެއްގެ ގޮތުގައި ސިފަ ކުރިއެވެ. ނަމަވެސް، ފާހަގަ ކޮށްލަން ޖެހޭ ކަމަކީ، ހަޤީޤީ ޓެރެރިސްޓުންނަކީ ޔަހޫދީން ކަމެވެ. އަދި، އެއިލާތަށް ހަމަލަ ދީފައި ވަނީ ޔަހޫދީން ޣައްޒާގެ މުސްލިމުންނާ ދެކޮޅަށް ދެމުންދާ ޓެރެރިސްޓު ހަމަލަތައް ހުއްޓައި ނުލުމާ ގުޅިގެން ކަމެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާއަށް ދެމުންދާ ހަމަލަތަކުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 11,000 އަށް އަރާފައެވެ. އޭގެ ތެރޭގައި 4,500 އަށްވުރެ ގިނަ ޢަދަދެއްގެ މައުސޫމު ކުޑަކުދިން ހިމެނެއެވެ. ޔަހޫދީން ޣައްޒާއަށް ބޮން އަޅަމުން ދަނީ އެމެރިކާގެ ރުހުމާއި އެހީތެރިކަމާ އެކުގައެވެ. ޣައްޒާއަށް އަޅަމުންދާ ބޮންތަކާއި މިސައިލްތަކަކީ އެމެރިކާއިން ފޯރުކޮށްދެމުންދާ ހަތިޔާރެވެ.
މި އުދުވާންތަކަށް ކެތް ނުކުރެވިގެން އެކި ޤައުމުތަކުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުން ވަނީ ޔަހޫދީންނާ ދެކޮޅަށް ތެދުވެފައެވެ. އަދި، ޒަޔަނިސްޓު އިސްރާޢީލުގެ ރަށްތަކަށް ހަމަލަދޭން ފަށާފައެވެ. އެ ޖަމާޢަތްތަކުގެ ތެރޭގައި ޔަމަނުގައި ހަރަކާތްތެރިވާ ހޫޘީންނާއި ލުބުނާނުގައި ހަރަކާތްތެރިވާ ޙިޒްބުالله ޖަމާޢަތް ހިމެނެއެވެ.
ހޫޘީން ދަނީ އިސްރާޢީލުގެ ރަށްތަކަށް އަމާޒުކޮށް މިސައިލާއި ޑްރޯން ހަމަލަތައް ދެމުންނެވެ. ނޮވެންބަރު 9 ވަނަ ދުވަހު ވެސް ހޫޘީން އިސްރާޢީލަށް އަމާޒުކޮށް ބެލިސްޓިކް މިސައިލް ހަމަލަތަކެއް ދިނެވެ. އެ ހަމަލަތައް އަމާޒު ކޮށްފައިވާ ރަށްތަކުގެ ތެރޭގައި އެއިލާތު ވެސް ހިމެނެއެވެ. ނަމަވެސް، އެ ސަރަޙައްދުގައި ހަރަކާތްތެރިވާ އެމެރިކާގެ އަސްކަރީ މަނަވަރުތަކުން ދަނީ، ހޫޘީންގެ ގިނަ ހަމަލަތައް ދިފާޢު ކުރަމުންނެވެ. ޔަހޫދީންނަށް ހިމާޔަތާއި ރައްކާތެރިކަން ފޯރުކޮށްދެމުންނެވެ.
ޔަހޫދީ އިސްރާޢީލުން ވެސް ދަނީ 'އެރޯ' އަދި 'ޕޭޓްރިޔަޓް' ދިފާޢީ ނިޒާމުތައް ބޭނުން ކޮށްގެން މި ފަދަ ގިނަ ހަމަލަތައް ދިފާޢު ކުރަމުންނެވެ. އަދި، ރަތް ކަނޑުގެ ސަރަޙައްދުގައި ހަރަކާތްތެރިވާ ޔަހޫދީ އަސްކަރިއްޔާގެ މަނަވަރުތަކުގެ ޢަދަދު ވަނީ އިތުރު ކޮށްފައެވެ. ބޭނުމަކީ، މި ފަދަ ހަމަލަތަކުން އިސްރާޢީލުގެ ދެކުނުގައި އޮންނަ ރަށްތައް ދިފާޢު ކުރުމެވެ. އެއިލާތަކީ ރަތް ކަނޑުގެ އައްސޭރިފަށުގައި އޮންނަ އިސްރާޢީލުގެ އިޤުތިޞާދީ މައި ބަނދަރެވެ.