ޒަޔަނިސްޓު އިސްރާޢީލުގެ ޔަހޫދީންނާ ދެކޮޅަށް ލުބުނާނުގެ ޙިޒްބުالله ޖަމާޢަތުން ކުރަމުންދާ ހަނގުރާމަ ހުއްޓައިނުލާނެ ކަމުގައި އެ ޖަމާޢަތުގެ އިސްވެރިޔާ ޙަސަން ނަޞްރުالله ވިދާޅުވެއްޖެއެވެ. ޙިޒްބުاللهއަކީ ލުބުނާނުގައި ހަރަކާތްތެރިވާ ބާރުގަދަ ޖަމާޢަތެކެވެ. ޙިޒްބުاللهއިން ދެކޭ ގޮތުގައި އެ ޖަމާޢަތުގެ އެންމެ ބޮޑު ދުޝްމަނަކީ ޒަޔަނިސްޓު އިސްރާޢީލެވެ.
އޮކްޓޫބަރު 7 ވަނަ ދުވަހު ޔަހޫދީން ޣައްޒާއަށް ބޮންއަޅަން ފެށި ފަހުން ދެވަނަ ފަހަރަށް ތަޤުރީރު ކުރައްވަމުން ނަޞްރުالله ވިދާޅުވީ، ލުބުނާނުގެ ދެކުނުގައިވާ ސަރަޙައްދުގައި އެ ޖަމާޢަތުގެ މުޖާހިދުން ޔަހޫދީންގެ ފައުޖުތަކާ ކުރިމަތިލަމުންދާނެ ކަމުގައެވެ. އަދި، މި ޖިހާދު ހުއްޓައިލުމުގެ އެއްވެސް ނިޔަތެއް ނެތް ކަމަށާ ކުރިއަށް އޮތް ތަނުގައި މި ކުރިމަތިލުންތައް ހަނގުރާމައަކަށް ބަދަލުވުމުގެ ފުރުޞަތު އޮތް ކަމުގައި ވެސް އޭނާ ވިދާޅުވިއެވެ.
ޔަހޫދީންގެ ފައުޖުތަކާއި ޒަޔަނިސްޓު އިސްރާޢީލުގެ ރަށްތަކަށް އަމާޒުކޮށް ޙިޒްބުاللهއިން ދެމުންދާ ހަމަލަތައް އިތުރަށް ވަރުގަދަ ކޮށްފައިވާ ކަމުގައި ނަޞްރުالله ވިދާޅުވިއެވެ. މިގޮތުން، ޔަހޫދީ ފައުޖަށް އަމާޒުކޮށް ދެމުންދާ ހަމަލާތައް އިތުރު ކޮށްފައިވާއިރު، އެ ޖަމާޢަތުން ވަނީ ފަހުގެ ޒަމާނީ ހަތިޔާރު ވެސް ބޭނުން ކުރަން ފަށާފައެވެ.
ޙިޒްބުاللهއިން ފަހަކަށް އައިސް ބޭނުން ކުރަން ފަށާފައިވާ ހަތިޔާރުތަކުގެ ތެރޭގައި 'ބުރްކާން'ގެ ނަން ދީފައިވާ މިސައިލެއް ހިމެނޭ ކަމަށާއި، އެއީ 300އާއި 500 ކިލޯއާ ދެމެދު ޢަދަދަކަށް ގޮވާތަކެތި އުފުލުގެ ގާބިލުކަން ލިބިފައިވާ ބާރުގަދަ މިސައިލެއް ކަމުގައި ނަޞްރުالله ވިދާޅުވިއެވެ. އަދި، ޔަހޫދީންނަށް ހަމަލަދޭން ފުރަތަމަ ފަހަރަށް ޑްރޯނެއް ބޭނުން ކޮށްފައިވާ ކަމުގައި ވެސް އޭނާ ވިދާޅުވިއެވެ.
ޒަޔަނިސްޓު އިސްރާޢީލުގެ ދެކުނުގައި އޮންނަ ރަށެއް ކަމުގައިވާ ކިރިޔަތް ޝްމޯނޭއަށް ޙިޒްބުاللهއިން ދާދި ފަހުން ދީފައިވާ ހަމަލަތައް ވެސް އޭނާ ފާހަގަ ކުރެއްވިއެވެ. އެއީ، ޔަހޫދީންގެ ހަމަލައެއްގައި ޝަހީދު ކޮށްލާފައިވާ އަންހެނަކާއި އޭނާގެ ތިން މާމަ ދަރިންގެ މަރުގެ ބަދަލު ހިފުމުގެ ގޮތުން ޙިޒްބުاللهއިން ދީފައިވާ ހަމަލަތަކެކެވެ.
އޮކްޓޫބަރު 8 ވަނަ ދުވަހުން ފެށިގެން ޙިޒްބުاللهއިން ދަނީ ޔަހޫދީންގެ އަމާޒުތަކަށް ވަރުގަދަ ހަމަލަތަކެއް އަމާޒު ކުރަމުންނެވެ. އަދި، ޔަހޫދީން ވެސް ދަނީ ރައްދުގައި ލުބުނާނަށް ހަމަލަ ދެމުންނެވެ. މި ހަމަލަތަކުގައި ޙިޒްބުالله ޖަމާޢަތުގެ 70 އަށްވުރެ ގިނަ މީހުން ވަނީ ޝަހީދު ކޮށްލާފައެވެ. އަދި، ޢާންމުންގެ ގިނަ ޢަދަދެއްގެ ބަޔަކު ވެސް ވަނީ ޝަހީދު ކޮށްލާފައެވެ.
ޙިޒްބުاللهއަކީ 1982 ވަނަ އަހަރު އީރާނުގެ ރިވޮލޫޝަނަރީ ގާޑްސް އަޑީގައި އޮވެގެން އުފައްދާފައިވާ ހަތިޔާރު އެޅި ޖަމާޢަތެކެވެ. އީރާނުން މިހާރު ވެސް ދަނީ އެ ޖަމާޢަތަށް ވާގިވެރިވެދެމުންނެވެ. އެ ޖަމާޢަތް އުފެއްދުމުގެ މައިގަނޑު މަޤުޞަދަކީ ޒަޔަނިސްޓު އިސްރާޢީލާއި، ޔަހޫދީންނަށް ވާގިވެރިވާ އެމެރިކާއާ ދެކޮޅަށް ހަނގުރާމަ ކުރުމެވެ.
ޔަހޫދީންނާ ދެކޮޅަށް ކުރަމުންދާ ޖިހާދު ހުއްޓައިނުލާނެ ކަމުގައި ނަޞްރުالله ވިދާޅުވެފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާގައި ހިންގަމުންދާ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 11,078 އަށް އުފުލިފައެވެ. އޭގެ ތެރޭގައި 4,500 އަށްވުރެ ގިނަ ޢަދަދަކަށް މައުސޫމު ކުޑަކުދިން ވެސް ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 24,000 އަށް އަރައެވެ.