އީރާނުގެ ރައީސް އިބްރާހީމް ރައީސީ ސަޢުދީ ޢަރަބިއްޔާއަށް ވަޑައިގަންނަވައިފިއެވެ. އޭނާ ސަޢުދީ އަރަބިއްޔާގެ ރިޔާޟަށް ވަޑައިގަންނަވާފައި މި ވަނީ ޢަރަބި ލީގާއި އޮގަނައިޒޭޝަން އޮފް އިސްލާމިކް ކޯޕޮރޭޝަން (އޯ.އައި.ސީ)ގެ ކުއްލި ބައްދަލުވުމެއްގައި ބައިވެރިވެ ވަޑައިގެންނެވުމަށެވެ. ޢަރަބި އަދި މުސްލިމް ޤައުމުތަކުން ބައިވެރިވި މި ބައްދަލުވުމަކީ، ސަޢޫދީ ޢަރަބިއްޔާއިން އިސްނަގައިގެން ބާއްވާފައިވާ ބައްދަލުވުމެކެވެ.
މި ބައްދަލުވުމުގެ މައިގަނޑު މަޤުޞަދަކީ ޔަހޫދީން ޣައްޒާގެ ނިކަމެތި ރައްޔިތުންނާ ދެކޮޅަށް ހިންގަމުންދާ ލާއިންސާނީ ޖަރީމާތައް ހުއްޓުމަކަށް ގެނެވޭނެ ގޮތްތަކެއް ހޯދުމެވެ. އަދި، ޒަޚަމްކޮށްލާފައިވާ އެތަކެއް ހާސް ބަޔަކަށް ފަރުވާ ދެވޭނެ ގޮތްތަކެއް ހޯދައި، އެ ސަހަރުގައި ހާލުގައި ޖެހިފައިވާ އެތަކެއް މިލިޔަން މުސްލިމުންނަށް އިންސާނީ އެހީތެރިކަން ފޯރުކޮށްދެވޭނެ މަގުތައް ހޯދުމެވެ. އޮކްޓޫބަރު 7 ވަނަ ދުވަހުން ފެށިގެން ޔަހޫދީން ހިންގަމުންދާ ޖަރީމާގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 11,078 އަށް އަރާފައެވެ.
ސަޢޫދީ ޢަރަބިއްޔާގައި ކުރިއަށްދާ ބައްދަލުވުމުގައި ބައިވެރިވެ ވަޑައިގެންނެވުމަށް ރައީސީ ރިޔާޟަށް ވަޑައިގަންނަވާފައިވާއިރު، މިއީ ދެ ޤައުމުގެ ދެމެދުގައި ސިޔާސީ ގުޅުން ޤާއިމު ކުރި ފަހުން އޭނާ އެ ޤައުމަށް ކުރައްވާ ފުރަތަމަ ދަތުރުފުޅެވެ. އީރާނާއި ސަޢޫދީ ޢަރަބިއްޔާއާ ދެމެދު ސިޔާސީ ގުޅުން ގާއިމު ކޮށްފައިވަނީ މާރިޗު މަހުގެ 11 ވަނަ ދުވަހުއެވެ.
"ޣައްޒާގެ މުސްލިމުންނަށް ހަމަލަދޭން ބޭނުން ކުރަމުންދާ ހަތިޔާރުތަކަކީ އެމެރިކާގެ ތަކެތި. ޣައްޒާގެ ގަތުލުއާންމު ހުއްޓުވަން އެމެރިކާއިން ދަނީ ހުރަސް އަޅަމުން. އަދި، ގަތުލުއާންމު އިތުރަށް ފުޅާ ކުރަން އެހީތެރިކަން ފޯރުކޮށްދެމުން،" ރިޔާޟަށް ފުރާވަޑައިގެންނެވުމުގެ ކުރިން ވާހަކަފުޅު ދައްކަވަމުން ރައީސީ ވިދާޅުވިއެވެ. އަދި، އިސްރާޢީލަކީ 'ޓެރެރިސްޓު' ދަޢުލަތެއްގެ ގޮތުގައި ކަނޑައެޅުމަށް ވެސް އޭނާ ވަނީ ގޮވައިލައްވާފައެވެ.
އޭނާ މިހެން ވިދާޅުވެފައިވާއިރު، ސަޢޫދީ ޢަރަބިއްޔާގައި ކުރިއަށްދާ ސަމިޓުގެ ބައިވެރިން ވަނީ ޔަހުދީ އިސްރާޢީލުގެ ގަތުލުއާންމު އެންމެ ހަރުކަށި އިބާރާތުން ކުށްވެރިކޮށްފައެވެ. އަދި، ހަނގުރާމަ މެދުއިރުމަތީގެ އެހެން ސަރަޙައްދުތަކަށް ފެތުރުމުގެ ބިރު އޮތް ކަން ހާމަ ކޮށްފައެވެ.
ރައީސީގެ އިތުރުން މި ބައްދަލުވުމުގައި ބައިވެރިވެވަޑައިގަންނަވާ ބައެއް އެހެން ބޭފުޅުންގެ ތެރޭގައި ފަލަސްޠީނުގެ ރައީސް މަޙްމޫދު އައްބާސް، ސޫރިޔާގެ ރައީސް ބައްޝާރު ހާފިޛް އަލް-އަސަދު، ޤަޠަރުގެ އަމީރު ޝައިޚް ތަމީމް ބިން ޙަމަދު، ލުބުނާނުގެ ބޮޑުވަޒީރު ކަމުގެ މަޤާމު ވަގުތީ ގޮތުން ފުރުއްވަމުން ގެންދަވާ ނަޖީބް މީޤާތީ، ތުރުކީވިލާތުގެ ރައީސް ރަޖަބް ޠައްޔިބް އުރުދުޣާންގެ އިތުރުން ޢަރަބި ލީގާއި އޯ.އައި.ސީގެ މެންބަރު ޤައުމުތަކުގެ އިސްވެރިން ހިމެނިވަޑައިގަންނަވައެވެ.
ބައްދަލުވުމުގައި ތަޤުރީރު ކުރައްވަމުން އުރުދުޣާން ވަނީ ހުޅަނގުގެ ޤައުމުތަކަށް ވަރަށް ބޮޑަށް ފާޑުވިދާޅުވެފައެވެ. އޭނާ ވިދާޅުވީ، އިންސާނީ ހައްޤުތަކާއި މިނިވަންކަމޭ ކިޔައިގެން ހުޅަނގުގެ ޤައުމުތަކުން އަޑުހަރުކޮށް ވަކާލާތު ކުރަމުން ދިޔަ ނަމަވެސް، ފަލަސްޠީނުގެ މުސްލިމުންނާ ދެކޮޅަށް ލާއިންސާނީ ގަތުލުއާންމެއް ހިންގަމުންދާއިރު އެ ޤައުމުތަކުގެ އަޑެއްބަޑެއް ނީވޭ ކަމުގައެވެ.
ފަލަސްޠީނުގެ ރައީސް ވިދާޅުވީ، ޔަހޫދީންނަށް ބާރު ފޯރުވަމުން ދަނީ އެމެރިކާއިން ކަމުގައެވެ. އަދި، ގަތުލުއާންމު ހުއްޓުމަކަށް ގެނައުމަށް ކުރަމުންދާ މަސައްކަތްތަކަށް ހުރަސް އެޅުމުގެ ޒިންމާ އެމެރިކާއިން އުފުލަން ޖެހޭނެ ކަމުގައެވެ. ޤަޠަރުގެ އަމީރު ވިދާޅުވީ، ޙަމާސް ޖަމާޢަތާ ގުޅިގެން ގަތުލުއާންމު ހުއްޓުމަކަށް ގެނައުމަށް އެ ޤައުމުން ގިނަ މަޝްވަރާތަކެއް ކުރަމުންދާ ކަމުގައެވެ.