އީވާއާއި އަފީފް މަޖިލީހުގެ އިމްތިޔާޒަށް އަރައިގަނެފައިވާކަމަށް ފާސްކޮށްފި

ރައްޔިތުންގެ މަޖިލީހުގެ މިއަދުގެ ޖަލްސާގެ ރިޔާސަތު ބެލެހެއްޓެވި، ވިލުފުށީ ދާއިރާގެ މެންބަރު ޙަސަން އަފީފާއި، މަޖިލީހުގެ ނާއިބު ރައީސް އީވާ ޢަބްދުﷲ، މަޖިލީހުގެ އިމްތިޔާޒަށް އަރާފަނެފައިވާކަމަށް އިމްތިޔާޒާއި ސުލޫކީ ކޮމިޓީން ނިންމައިފިއެވެ.

ރައްޔިތުން މަޖިލީހުގެ ރައީސްގެ އިތުބާރު ނެތް މައްސަލަ، މަޖިލީހުގެ ނައިބު ރައީސް ނެތަސް ކުރިޔަށް ގެންދެވޭނެކަމަށް ސުޕްރީމްކޯޓުން ކަނޑައެޅުމުން އެމައްސަލަ މިއަދުގެ ޖަލްސާއަށް އެޖެންޑާކުރިއެވެ. މިއަދު ބޭއްވި ފުރަތަމަ ޖަލްސާއަށް މަޖިލީހުގެ ނާއިބު ރައީސް އީވާ ސަލާމުގައި ހުންނެވުމުން ރިޔާސަތު ބެލެހެއްޓެވީ ވިލުފުށީ ދާއިރާގެ މެންބަރު ޙަސަން އަފީފެވެ.

މިއަދުގެ ފުރަތަމަ ޖަލްސާ 09:00ގައި ފަށައި، އެ މައްސަލަ ކުރިއަށް ގެންދިއުމަށް މަސައްކަތްކުރިނަމަވެސް، ރައީސް ނަޝީދު ވަކިކުރެއްވުމުގެ ޤަރާރު ހުށައަޅާފައިވަނީ މަޖިލީހުގެ ޤަވާއިދާއި ޚިލާފަށްކަމަށް ދަ ޑިމޮކްރެޓްސް އިން ބުންޏެވެ. އެޕާޓީގެ ޕާލިމަންޓްރީ ގްރޫޕްގެ ލީޑަރު މެދު ހެންވޭރު ދާއިރާގެ މެންބަރު ޢަލީ ޢާޒިމް ވަނީ ނިޒާމީ މައްސަލަ ނަންގަވައި، އެ ޤަރާރުގައި ދީބާޖާ ހިމަނާފައި ނުވާތީ އެ މައްސަލަ ޤަވާއިދާ ޚިލާފްކަމަށް ވިދާޅުވެފައެވެ.

އެކަމުގައި ހޫނު ބަހުސަކަށްފަހު ނިޒާމީ މައްސަލަ ބަލައިގަނެ، ރިޔާސަތުގައި އިންނެވި އަފީފް ޖަލްސާ ނިންމަވާލެއްވިއެވެ.

އެއަށްފަހު 11:30އަށްވެސް އިތުރު ޖަލްސާއެއް އެޖެންޑާކުރިއެވެ. އެ ޖަލްސާގެ ރިޔާސަތު ބެލެހެއްޓެވީ މަޖިލީހުގެ ނާއިބު ރައީސް އީވާ ޢަބްދުﷲއެވެ. އެޖަލްސާ ފެށްޓެވުމަށްފަހު މާގިނަ އިރުތަކެއްނުވެ، އެއީ ހެނދުނުގެ ޖަލްސާގައި ބޭރުކޮށްފައިވާ ގަރާރެއް ކަމަށް ބުނެ އެޖަލްސާ އީވާ ނިންމަވާލެއްވިއެވެ.

މިކަމާއި ގުޅިގެން އަފީފްގެ ސުލޫކީ މައްސަލައެއް އެމްޑީޕީ ޕާލިމަންޓްރީ ގްރޫޕުގެ ލީޑަރު މުޙައްމަދު އަސްލަމް އިމްތިޔާޒާއި ސުލޫކު ކޮމިޓީއަށް ހުށައެޅުއްވިއެވެ. އެ މައްސަލާގައި ވަނީ ނަޝީދު ވަކިކުރެއްވުމުގެ ގަރާރު ކުރިއަށް ނުގެންދެވޭނެކަމަށް ނިންމަވައި އަފީފް ޖަލްސާ ނިންމާލެއްވީ މަޖިލީހުގެ ގަވައިދާ ހިލާފަށް، މުޅި މަޖިލީހުގެ ހައްގަށް އުނިކަން އަންނަ ގޮތަށްކަމަށެވެ. އަދި ކޮމިޓީގެ މި ބައްދަލުވުމުގައި މިލަންދޫ ދާއިރާގެ އެމްޑީޕީގެ މެމްބަރު އަލީ ރިޟާ ވަނީ ފަހުން ބޭއްވި ޖަލްސާގައި އީވާވެސް ޖަލްސާ ނިންމާލައްވާފައިވަނީ ގަވައިދާ ހިލާފަށްކަމަށް ނިންމައިދިނުމަށް ހުށަހަޅާފައެވެ.

އެމްޑީޕީގެ އަޣްލަބިއްޔަތު އޮންނަ އެ ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުން ފާސްކުރީ ދެ ޖަލްސާވެސް ނިންމާލީ ގަވައިދާ ހިލާފަށްކަމަށެވެ. އަދި އެ މައްސަލަ ވަނީ ޢާންމު ކޮމިޓީއަށް ފޮނުވާފައެވެ.

މަޖިލީހުގެ ގަވައިދުގައިވާ ގޮތުން މިފަދަ މައްސަލައެއް ކޮމިޓީން ފާސްކުރުމަށް ފަހު އަޅާންވީ އިސްލާހީ ފިޔަވަޅާއެކު މަޖިލީހުގެ އިދާރާއަށް ފޮނުވަން ޖެހެއެވެ. ތަޅުމުގައި ބަހުސްކުރުމާމެދު ވޯޓަކަށް އަހައި ގޮތެއް ނިންމާނެއެވެ.