ޣައްޒާގެ ފުރަބަންދު ހަރުކަށިކޮށް އެ ސަހަރަށް ތެޔޮ އެތެރެ ކުރަން ހުރަސް އެޅުމާ ގުޅިގެން އަލް-ޤުދުސް ހޮސްޕިޓަލުން ކަރަންޓު ކެނޑި، ހުރިހާ ޚިދުމަތްތަކެއް ހުއްޓިއްޖެއެވެ. ފަލަސްޠީނުގެ ރެޑް ކްރެސެންޓުން ބުނީ އަލް-ޤުދުސް ހޮސްޕިޓަލަށް ކަރަންޓުގެ ޚިދުމަތް ދިނުމަށް ބޭނުން ކުރަމުން ދިޔަ ތެޔޮ މުޅިން ހުސްވެފައިވާ ކަމުގައެވެ. އަދި، އެ ހޮސްޕިޓަލުން ކަރަންޓުގެ ޚިދުމަތް ކެނޑި، ބަންދު ކުރަން ޖެހިފައިވާ ކަމުގައެވެ.
"އެ ތަނުން ހުރިހާ ޚިދުމަތެއް ހުއްޓިއްޖެ. އެ ތަނަށް ކަރަންޓުގެ ޚިދުމަތް ދޭން ބޭނުންވާ ތެޔޮ ވަނީ ހުސްވެފައި،" ރެޑް ކްރެސެންޓުން ބުންޏެވެ. އަލް-ޤުދުސް ހޮސްޕިޓަލަކީ މިހާރު 'އޮޕަރޭޝަނަލް' ނުވަތަ ހިނގާ ތަނެއް ނޫން ކަމުގައި ވެސް އެ ޖަމުޢިއްޔާއިން ބުންޏެވެ.
"އިންސާނިއްޔަތަށް މަސައްކަތް ކުރާ ބައިނަލްއަޤުވާމީ ޖަމުޢިއްޔާތަކުގައި އެތަކެއް ފަހަރު އާދޭސް ކުރެވިއްޖެ. ހަފުތާއެއްހާ ދުވަސް ވަންދެން ޔަހޫދީން މެދުނުކެނޑި އެ ހޮސްޕިޓަލަށް ބޮން އަޅަމުން ދިޔަ. އެ ތަނުން މުވާސަލާތީ ޚިދުމަތްތައް ފަސް ދުވަހަށް ކަނޑައިލި. އާދޭސް ކުރިޔަސް ވީ އެއްވެސް ކަމެއް ނެތް. ފައިދާއެއް ނެތް،" ރެޑް ކްރެސެންޓުން ނެރުނު ބަޔާނެއްގައި ބުންޏެވެ.
ޔަހޫދީންގެ ހަމަލަތަކުގައި ޒަޚަމު ކޮށްލާފައިވާ އެތަކެއް ހާސް ބަޔަކަށް ޞިއްޙީ ފަރުވާ ދެވޭނެ ގޮތްތަކެއް ހޯދައިދޭން ރެޑް ކްރެސެންޓުން ދަނީ ބައިނަލްއަޤުވާމީ މަސްރަޙުގައި އާދޭސް ކުރަމުންނެވެ. ޣައްޒާގައި ހާލުގައި ޖެހިފައިވާ މިލިޔަނަކަށް ވުރެ ގިނަ މީހުންނަށް އިންސާނީ އެހީގެ ސާމާނު ފޯރުކޮށްދޭން ވެސް އެ ޖަމާޢަތުން ދަނީ ގޮވައިލަމުންނެވެ. ނަމަވެސް، އެ ގޮވައިލުންތަކަށް ޔަހޫދީން ދީފައި ވަނީ ބީރު ކަންފަތެކެވެ. އަދި، ޔަހޫދީންގެ ލާއިންސާނީ ގަތުލުއާންމު ހުއްޓުވަން ދުނިޔެ އޮތީ ނުކުޅެދިފައެވެ.
ޔަހޫދީ ފައުޖުގެ އަސްކަރީ ޓޭންކުތަކުން މިހާރު އޮތީ އަލް-ޤުދުސް ހޮސްޕިޓަލް ވަށައިލާފައެވެ. އަދި، މެދުކެނޑުމެއް ނެތި ދަނީ އެ ހޮސްޕިޓަލްގެ އިތުރުން އެ ހޮސްޕިޓަލް ހުންނަ ސަރަޙައްދަށް ހަމަލަ ދެމުންނެވެ. ޣައްޒާގެ ހޮސްޕިޓަލްތަކަށް އަމާޒުކޮށްދޭ މި ފަދަ ހަމަލަތައް ފަހަކަށް އައިސް އިތުރު ކޮށްފައިވާ ކަން ފާހަގަ ކޮށްލަން ޖެހެއެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 11,100 އަށް އުފުލިފައެވެ. އޭގެ ތެރޭގައި 4,500 އަށްވުރެ ގިނަ ޢަދަދެއްގެ ކުޑަކުދިން ހިމެނޭއިރު، ޒަޚަމު ކޮށްލާފައިވާ މީހުންގެ ޢަދަދު 24,000 އަށް އަރައެވެ. ޔަހޫދީންގެ ގަތުލުއާންމު ހިންގަމުން ދަނީ އެމެރިކާގެ ރުހުމާއި، އެއްބާރުލުމާއި އެހީތެރިކަމާ އެކުގައެވެ.