ލުބުނާނުގެ ވެރިރަށް ބެއިރޫތަކީ ދެވަނަ ޣައްޒާއަށް ހަދައިލަން ޖެހިދާނެ ކަމަށް ބުނެ، ޒަޔަނިސްޓު އިސްރާޢީލުގެ ދިފާޢީ ވަޒީރު ޔޮއާވް ގަލާންތު އިންޒާރު ދީފިއެވެ. އޭނާގެ މި އިންޒާރު އަމާޒު ކޮށްފައި މި ވަނީ ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތެއް ކަމުގައިވާ ޙިޒްބުاللهއަށެވެ. އެއީ، އީރާނުން ވާގިވެރިވާ ބާރުގަދަ ޖަމާޢަތެކެވެ.
އޭނާ ޙިޒްބުاللهއަށް އިންޒާރު ދީފައި މި ވަނީ، ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ފަށާފައިވާ ގަތުލުއާންމުގެ ބަދަލު ހިފުމުގެ ގޮތުން ޙިޒްބުاللهއިން އިސްރާޢީލުގެ ރަށްތަކަށް ހަމަލަދެމުންދާ ދަނޑިވަޅެއްގައެވެ. ޙިޒްބުاللهގެ އިތުރުން ލުބުނާނުގައި ހަރަކާތްތެރިވާ ޙަމާސް ޖަމާޢަތުގެ ހަތިޔާރު އެޅި ގޮފި – ޢިއްޒުންދީން އަލް-ޤައްސާމް ބްރިގޭސްޑްސްއިން އިސްރާޢީލަށް ދީފައިވާ ހަމަލަތަކުގައި ޔަހޫދީ އަސްކަރިއްޔާގެ ސިފައިންގެ ހަ މީހުން ވަނީ މަރައިލާފައެވެ. އަދި، ޢާންމުންގެ ދެ މީހަކު ވެސް މަރައިލާފައިވެއެވެ.
"ޙަމާސް ޖަމާޢަތުން އަމަލު ކުރަމުންދާ ގޮތަށް ޙިޒްބުاللهއިން ވެސް އަމަލު ކުރާ ނަމަ، އެ ކަމުގެ ހިތި ފެންނާނީ ލުބުނާނުގެ ޢާންމު ރައްޔިތުންނަށް. ޢައްޒާއަށް [މުސްލިމުންނަށް] ހަދަމުން މިދާ ގޮތް ބެއިރޫތަށް [ރައްޔިތުންނަށް] ވެސް ހަދައިލަން ޖެހިދާނެ،" ގަލާންތު ބުންޏެވެ. އިސްރާޢީލާއި ލުބުނާން ގުޅޭ ސަރަޙައްދީ ރޮނގު ބަލަހައްޓާ ޔަހޫދީ ފައުޖު ތައްޔާރީ ހާލަތެއްގައި އޮތުމަށް ވެސް އޭނާ ވަނީ އިރުޝާދު ދީފައެވެ.
ގަލާންތުގެ ވަރުގަދަ އިންޒާރެއް ޙިޒްބުاللهއަށް ދީފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޔަހޫދީން ޣައްޒާގައި ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު ވަނީ 11,100 އަށް ވުރެ މައްޗަށް އުފުލިފައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވެސް 24,000 އަށްވުރެ ގިނައެވެ. މި ގަތުލުއާންމު ހިންގަމުން މި ދަނީ އެމެރިކާގެ ރުހުމާއި އެހީތެރިކަމާ އެކުގައެވެ.
ޙިޒްބުاللهގެ އިސްވެރިޔާ ޙަސަން ނަޞްރުالله ވެސް ދާދި ފަހުން ވަނީ ޔަހޫދީންނަށް ވަރުގަދަ އިންޒާރެއް ދެއްވާފައެވެ. އޭނާ ވިދާޅުވީ، ޔަހޫދީންނާ ދެކޮޅަށް އެ ޖަމާޢަތުން ކުރަމުންދާ ޖިހާދު ހުއްޓައިނުލާނެ ކަމުގައެވެ. ޙިޒްބުاللهއިން ދެކޭ ގޮތުގައި އެ ޖަމާޢަތުގެ އެންމެ ބޮޑު ދުޝްމަނަކީ ޒަޔަނިސްޓު އިސްރާޢީލެވެ.
އޮކްޓޫބަރު 7 ވަނަ ދުވަހު ޔަހޫދީން ޣައްޒާއަށް ބޮންއަޅަން ފެށި ފަހުން ދެވަނަ ފަހަރަށް ތަޤުރީރު ކުރައްވަމުން ނަޞްރުالله ވިދާޅުވީ، ލުބުނާނުގެ ދެކުނުގައިވާ ސަރަޙައްދުގައި އެ ޖަމާޢަތުގެ މުޖާހިދުން ޔަހޫދީންގެ ފައުޖުތަކާ ކުރިމަތިލަމުންދާނެ ކަމުގައެވެ. އަދި، މި ޖިހާދު ހުއްޓައިލުމުގެ އެއްވެސް ނިޔަތެއް ނެތް ކަމަށާ ކުރިއަށް އޮތް ތަނުގައި މި ކުރިމަތިލުންތައް ހަނގުރާމައަކަށް ބަދަލުވުމުގެ ފުރުޞަތު އޮތް ކަމުގައި ވެސް އޭނާ ވިދާޅުވިއެވެ.
ޔަހޫދީންގެ ފައުޖުތަކާއި ޒަޔަނިސްޓު އިސްރާޢީލުގެ ރަށްތަކަށް އަމާޒުކޮށް ޙިޒްބުاللهއިން ދެމުންދާ ހަމަލަތައް އިތުރަށް ވަރުގަދަ ކޮށްފައިވާ ކަމުގައި ނަޞްރުالله ވިދާޅުވިއެވެ. މިގޮތުން، ޔަހޫދީ ފައުޖަށް އަމާޒުކޮށް ދެމުންދާ ހަމަލާތައް އިތުރު ކޮށްފައިވާއިރު، އެ ޖަމާޢަތުން ވަނީ ފަހުގެ ޒަމާނީ ހަތިޔާރު ވެސް ބޭނުން ކުރަން ފަށާފައެވެ.
އޮކްޓޫބަރު 8 ވަނަ ދުވަހުން ފެށިގެން ޙިޒްބުاللهއިން ދަނީ ޔަހޫދީންގެ އަމާޒުތަކަށް ވަރުގަދަ ހަމަލަތަކެއް އަމާޒު ކުރަމުންނެވެ. އަދި، ޔަހޫދީން ވެސް ދަނީ ރައްދުގައި ލުބުނާނަށް ހަމަލަ ދެމުންނެވެ. މި ހަމަލަތަކުގައި ޙިޒްބުالله ޖަމާޢަތުގެ 70 އަށްވުރެ ގިނަ މީހުން ވަނީ ޝަހީދު ކޮށްލާފައެވެ. އަދި، ޢާންމުންގެ ގިނަ ޢަދަދެއްގެ ބަޔަކު ވެސް ވަނީ ޝަހީދު ކޮށްލާފައެވެ.
ޙިޒްބުاللهއަކީ 1982 ވަނަ އަހަރު އީރާނުގެ ރިވޮލޫޝަނަރީ ގާޑްސް އަޑީގައި އޮވެގެން އުފައްދާފައިވާ ހަތިޔާރު އެޅި ޖަމާޢަތެކެވެ. އީރާނުން މިހާރު ވެސް ދަނީ އެ ޖަމާޢަތަށް ވާގިވެރިވެދެމުންނެވެ. އެ ޖަމާޢަތް އުފެއްދުމުގެ މައިގަނޑު މަޤުޞަދަކީ ޒަޔަނިސްޓު އިސްރާޢީލާއި، ޔަހޫދީންނަށް ވާގިވެރިވާ އެމެރިކާއާ ދެކޮޅަށް ހަނގުރާމަ ކުރުމެވެ.