މަޖިލީހުގެ ރައީސްކަމަށް އަސްލަމް އިންތިޚާބުކޮށްފި

ރައްޔިތުންގެ މަޖިލީހުގެ ރައީސްގެ މަޤާމަށް އެމްޑީޕީ ޕާލިމަންޓްރީ ގްރޫޕްގެ ލީޑަރު އަދި ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް އިންތިޚާބުކޮށްފިއެވެ.

މަޖިލީހުގެ ރައީސަކަށް އަސްލަމް އިންތިޚާބުކުރީ ކުރިން އެމަޤާމުގައި ހުންނެވި ރައީސް މުޙައްމަދު ނަޝީދު އިސްތިއުފާދެއްވުމުންނެވެ. ރައީސް ނަޝިދު މަޤާމުން އިސްތިއުފާދެއްވީ ދެފަހަރެއްގެ މަތިން އިތުބާރު ނެތްކަމުގެ މައްސަލަ ހުށައަޅައި މަޖިލީހުގެ ޖަލްސާތައް ކުރިއަށް ނުގެންދެވި ދިގުލައިގެން ގޮސްފައިވަނިކޮށެވެ.

މަޖިލީހުގެ ރައީސަކު އިންތިޚާބުކުރުމަށް ބޭއްވި ޖަލްސާގައި އެމަޤާމަށް ދެ ނަމެއް ހުށައެޅިއެވެ. އެއީ އަސްލަމްގެ އިތުރުން ދަ ޑިމޮކްރެޓްސްގެ ޕާލިމަންޓްރީ ގްރޫޕްގެ ލީޑަރު ޢަލީ ޢާޒިމްގެ ނަމެވެ. މަޖިލީހުގެ ރައީސްކަމަށް އަސްލަމް އިންތިޚާބުކުރީ މެންބަރުންގެ މެދުގައި ނެގި ސިއްރު ވޯޓަކުންނެވެ. 77 މެންބަރުން ބައިވެރިވެވަޑައިގެންނެވި އެ ޖަލްސާއިން އަސްލަމް އިންތިޚާބު ކާމިޔާމިޔާބުކުރެއްވީ 53 ވޯޓެވެ. އަދި ޢަލީ ޢާޒިމަށް ލިބިވަޑައިގަތީ 23 ވޯޓެވެ.

މަޖިލީހުގެ ރައީސްކަމަށް އިންތިޚާބުވެވަޑައިގެންނެވި މުޙައްމަދު އަސްލަމް ވަނީ 16 ވަނަ ރައްޔިތުންގެ މަޖިލީހުން ފެށިގެން މެދުކެނޑުމެއް ނެތި 4 ދައުރު އަދާކުރައްވާފައެވެ. އެގޮތުން އަސްލަމް އެންމެ ފުރަތަމަ މަޖިލީހަށް އިންތިޚާބުވެވަޑައިގަތީ 2005 ވަނަ އަހަރުއެވެ، އަސްލަމަކީ މިވަގުތު މަޖިލީހުގައި މެދުކެނޑުމެއްނެތި އެންމެ ގިނަ ދުވަހު މެންބަރުކަން އަދާކުރެއްވި އެއް މެންބަރުންވެސްމެއެވެ.

އަސްލަމް ވަނީ މަޖިލީހުގެ ކޮމިޓީތަކުގައިވެސް މުހިންމު ދައުރެއް އަދާކުރައްވާފައެވެ. އެގޮތުން އަސްލަމް ތަމްސީލްކުރެއްވި މުހިންމު ކޮމިޓީތަކުގެ ތެރޭގައި ސަލާމަތީ ޚިދުމަތްތަކާއި ބެހޭ ކޮމިޓީއާއި، ޤަވާއިދު ކޮމިޓީފަދަ ކޮމިޓީތަކުގެ މުގައްރިރުކަމާއި ކޮމިޓީގެ މެންބަރުކަން ހިމެނެއެވެ.

އަސްލަމް މިހާތަނަށް ހުންނެވީވެސް އެމްޑީޕީގެ ޕާލިމަންޓްރީ ގްރޫޕްގެ ލީޑަރުކަމުގައެވެ.