ޣައްޒާއިން ކާބޯތަކެތި ހުސްވެ، 2.3 މިލިޔަނެއްހާ މުސްލިމުން ހައިހޫނު ކަމާ ކުރިމަތިލާން ޖެހިފައިވާ ކަމަށާއި، އެ މީހުންނަށް ބަނޑުފުރާނަ މުއްތި ކުރާނެ ގޮތެއް ނެތް ކަމުގައި އ.ދގެ ދުނިޔޭގެ ކާބޯތަކެއްޗާ ބެހޭ ޕުރޮގުރާމު – ވޯލްޑް ފުޑް ޕްރޮގްރާމް (ޑަބްލިޔު.އެޗް.ޕީ)ން ބުނެފިއެވެ. އެ އިދާރާއިން ބުނީ ޣައްޒާގެ ފުރަބަންދާ ގުޅިގެން އެ ސަހަރުން ކާބޯތަކެއްޗާއި ސާފު ބޯފެން މިހާރު ހުސްވެފައިވާ ކަމުގައެވެ.
"ކުރިއަށް އޮތީ ފިނި މޫސުން. އެތަކެއް ސަތޭކަ ބަޔަކާ އެކު ހިޔާތައް ވަނީ ތޮއްޖެހިފައި. ސާފު ބޯފެނެއް ނެތް. ހައިހޫނު ކަމާ ކުރިމަތިލުން ނޫން އިތުރު ގޮތެއް ޣައްޒާގެ މުސްލިމުންނަކަށް ނެތް. ބަނޑުފުރާނަ މުއްތި ކުރެވޭނެ ގޮތެއް ނެތް،" ޑަބްލިޔު.އެފް.ޕީގެ އެގްޒެކެޓިވް ޑިރެކްޓަރ ސިންޑީ މެކެއިން ވިދާޅުވިއެވެ.
އެ އިދާރާއިން ބުނީ، ޣައްޒާގެ ރައްޔިތުން ކެއުމުގައި އެންމެ ޢާންމު ގޮތެއްގައި ބޭނުން ކުރާ ޕާން މިހާރު މުޅިން ހުސްވެފައިވާ ކަމުގައެވެ. އަދި، ޕާން ފިހަން ބޭނުންވާ ތަކެތި ހުސްވެ، ޕާން ފިހާނެ ގޮތެއް ނެތް ކަމުގައެވެ. ސިންޑީ ވިދާޅުވީ، ޣައްޒާއާއި މިޞްރު ގުޅޭ ރަފަޙް ހުރަސްގެ އިތުރުން އެހެން ސަރަޙައްދުތަކުން ވެސް ޣައްޒާއަށް ކާބޯތަކެއްޗާއި އިންސާނީ އެހީގެ ސާމާނު އެތެރެ ކުރުމުގެ ފުރުޞަތު ދޭން ޖެހިފައިވާ ކަމުގައެވެ. އަދި، ތެޔޮ ހުސްވުމާ ގުޅިގެން ވެސް، ހާލުގައި ޖެހިފައިވާ އެތަކެއް ސަތޭކަ ހާސް މީހުންނަށް ކާބޯތަކެތި ފޯރުކޮށްދޭން ހުރަސް އެޅިފައިވާ ކަމުގައެވެ.
ޔަހޫދީ ޣައްޒާގެ ފުރަބަންދު ހަރުކަށި ކޮށްފައި ވަނީ އެމެރިކާގެ އެހީތެރިކަމާ އެކު އޮކްޓޫބަރު 7 ވަނަ ދުވަހު މުސްލިމުންނާ ދެކޮޅަށް ފެށި ގަތުލުއާންމާ އެކުގައެވެ. އެއަށް ފަހު، ޔަހޫދީން ވަނީ ޣައްޒާއަށް ކާބޯތަކެއްޗާއި، ފެނާއި، ތެލުގެ އިތުރުން ބޭސްފަރުވާއަށް ބޭނުންވާ ސާމާނު އެތެރެ ކުރަން ވެސް ހުރަސް އަޅާފައެވެ. ތެޔޮ ހުސްވެ، ކަރަންޓުގެ ޚިދުމަތް ފޯރުކޮށްދޭން ގޮތެއް ނެތިގެން ޣައްޒާގެ 18 ހޮސްޕިޓަލް މިހާރު ވަނީ ބަންދު ކޮށްފައެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ހިންގަމުންދާ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 11,300 އަށް އުފުލިފައެވެ. އޭގެ ތެރޭގައި 4,500 އަށްވުރެ ގިނަ ޢަދަދަކަށް ކުޑަކުދިން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 29,000 އަށް އުފުލިފައެވެ.