ދެކުނު އެފްރިކާގައި ހުންނަ ޒަޔަނިސްޓު އިސްރާޢީލުގެ އެމްބަސީ ބަންދު ކުރުމުގެ މަސައްކަތްތައް ފަށައިފިއެވެ. މި ކަމަށް ގޮވައިލާ ދެކުނު އެފްރިކާގެ ޤާނޫނު ހަދާ މަޖިލީހަށް ޤަރާރެއް ހުށަހަޅާފައިވާއިރު، ވެރިކަން ކުރާ އެފްރިކަން ނޭޝަނަލް ކޮންގްރެސް (އޭ.އެން.ސީ) ޕާޓީން ވަނީ މި ޤަރާރަށް ތާޢީދު ކުރަން ނިންމާފައެވެ.
އޭ.އެން.ސީން ބުނީ، ދެކުނު އެފްރިކާގައި ހުރި ޒަޔަނިސްޓު އިސްރާޢީލުގެ އެމްބަސީ ބަންދު ކުރާނެ ކަމުގައެވެ. އަދި، އިސްރާޢީލާ އެކު އޮތް ސިޔާސީ ގުޅުން ކަނޑައިލާނެ ކަމުގައެވެ. މި ކަމަށް ގޮވައިލާ ދެކުނު އެފްރިކާގެ ޤާނޫނު ހަދާ މަޖިލީހަށް ޤަރާރެއް ހުށަހަޅާފައި ވަނީ އިދިކޮޅު އިކޮނޮމިކް ފްރީޑަމް ފައިޓަރސް (އީ.އެފް.އެފް) ޕާޓީންނެވެ.
ދެކުނު އެފްރިކާއަކީ ޒަމާނުއްސުރެ ފަލަސްޠީނުގެ މިނިވަން ކަމަށް ވަކާލާތު ކުރަމުންދާ ޤައުމެކެވެ. ޔަހޫދީން ފަލަސްޠީނުގެ ބިންތަކަށް އަތްގަދަކޮށް، މުސްލިމުންނާ ދެކޮޅަށް ހިންގަމުންދާ އިސްތިޢުމާރީ ވެރިކަމަކީ، 1994 ވަނަ އަހަރުގެ ކުރިން ދެކުނު އެފްރިކާގައި އޮތް އަޕާތީޑް ވެރިކަމާ އެއްގޮތް ކަމެއްގެ ގޮތުގައި އެ ޤައުމުގެ ކުރީގެ ރައީސް ނެލްސަން މަންޑޭލާ ސިފަ ކުރައްވާފައިވެއެވެ. މި ތުހުމަތުތައް ޔަހޫދީން ދޮގު ކުރި ނަމަވެސް، އެ މީހުން މުސްލިމުންނާ މެދު އަމަލު ކުރަމުން އެ ދަނީ އެއަށްވުރެ ވެސް ޖައްބާރުކޮށް ކަން މުޅި ދުނިޔެ ޤަބޫލު ކުރެއެވެ.
ދެކުނު އެފްރިކާގައި ހުރި ޒަޔަނިސްޓު އިސްރާޢީލުގެ އެމްބަސީ ބަންދުކޮށް، ޔަހޫދީންނާ އެކު އޮތް ސިޔާސީ ގުޅުން ކަނޑައިލަން ތާޢީދު ކުރާ ކަން ހާމަކޮށް އޭ.އެން.ސީން ބުނީ، އެ ނިންމުން ބަދަލު ކުރާނީ ޣައްޒާގެ މުސްލިމުންނާ ދެކޮޅަށް ޔަހޫދީން މިހާރު ހިންގަމުންދާ ގަތުލުއާންމު ހުއްޓައިލުމުން ކަމުގައެވެ. އަދި، އ.ދގެ ޤަރާރުތަކަށް ބޯލަނބައި އަމަލު ކުރަން ފެށުމުން ކަމުގައެވެ.
ޣައްޒާގައި އިންސާނީ އެހީތެރިކަން ފޯރުކޮށްދޭން މަސައްކަތް ކުރާ ދެކުނު އެފްރިކާގެ ޖަމުޢިއްޔާއެއް ކަމުގައިވާ 'ގިފްޓް އޮފް ދަ ގިވަރސް'އިން ވަނީ އޭން.އެން.ސީގެ ނިންމުމަށް މަރުޙަބާ ކިޔާފައެވެ. އޮކްޓޫބަރު 7 ވަނަ ދުވަހުން ފެށިގެން ޣައްޒާގައި ޔަހޫދީން ހިންގަމުންދާ ލާއިންސާނީ ޖަރީމާގައި ޝަހީދު ކޮށްލާފައިވާ މީހުންގެ ޢަދަދު 11,300 އަށް އަރާއިރު، މަރުވެފައިވާ މީހުންގެ ތެރޭގައި އެ ޖަމުޢިއްޔާގެ އިސް އޮފިޝަލެއް ވެސް ހިމެނެއެވެ.
ޒަޔަނިސްޓު އިސްރާޢީލުގެ އެމްބަސީ ބަންދުކޮށް، އެ ޤައުމާ އެކު ސިޔާސީ ގުޅުން ކަނޑައިލަން ދެކުނު އެފްރިކާގެ ޤާނޫނު ހަދާ މަޖިލީހުން ފާސްކުރި ނަމަވެސް، އެ ކަމުގައި އެންމެ ފަހު ގޮތް ނިންމާނީ އެ ޤައުމުގެ ރައީސް ސިރިލް ރަމަފޯސާގެ ސަރުކާރުންނެވެ. ރަމަފޯސާގެ އޭ.އެން.ސީން އެ ޤަރާރަށް ތާޢީދު ކުރަން ނިންމާފައިވާއިރު، ޤާނޫނު ހަދާ މަޖިލީހުގެ ނިންމުމަށް އޭނާ ތާޢީދު ކުރައްވާނެ ކަމަށް ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ދެކެއެވެ. ޒަޔަނިސްޓު އިސްރާޢީލުގައި ހުންނަވާ ދެކުނު އެފްރިކާގެ ސަފީރު ވެސް ދާދިފަހުން ވަނީ ޤައުމަށް ގެންގޮސްފައެވެ.
ޣައްޒާގައި ޝަހީދު ކޮށްލާފައިވާ މީހުންގެ ޢަދަދު 11,300 އަށްވުރެ މައްޗަށް އުފުލިފައިވާއިރު، އޭގެ ތެރޭގައި 4,500 އަށްވުރެ ގިނަ ޢަދަދެއްގެ ކުޑަކުދިންނާއި، 3,300 އަށްވުރެ ގިނަ އަންހެނުން ހިމެނެއެވެ. އަދި، ގިނަ ޢަދަދެއްގެ ޒުވާނުންނާއި އުމުރުން ދުވަސްވީ މީހުން ވެސް ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު މިހާރު ވަނީ 29,000 އަށް އަރާފައެވެ. ޣައްޒާގައި ހިންގާ 18 ހޮސްޕިޓަލެއް މިހާރު ބަންދު ކޮށްފައިވާއިރު، ޒަޚަމު ކޮށްލާފައިވާ މީހުންނަށް ބޭނުންވާ ޞިއްޙީ ފަރުވާ ފޯރުކޮށްދޭން ވަނީ ހުރަސްތަކެއް ކުރިމަތިވެފައެވެ.