މަޖިލީހުގެ މިއަހަރުގެ ފަހު ދައުރު ނިމޭނީ އަންނަމަހު 7ގައި
-
- މަޖިލިސް ދައުރު ނިމޭނީ އަންނަމަހު
-
- ދައުރު ދަންމާލަން 53 މެމްބަރުން ތާއީދު
-
- ބަޖެޓް ފާސްކުރުމާއި ވަޒީރުންނަށް ރުހުން ދިނުންް އެބައޮތް
ރައްޔިތުން މަޖިލީހުގެ މި ހިނގާ މިއަހަރުގެ ފަހު ދައުރު އަންނަ މަހުގެ 7 ވަނަދުވަހުގެ ނިޔަލަށް ދަންމާލަން މަޖިލީހުން ފާސްކޮށްފިއެވެ.
ދައުރު ދަންމާލަން މަޖިލީހުން ފާސްކުރީ މިއަދުގެ ޖަލްސާގައި ބައިވެރިވެޑައިގެންނެވި 63 މެމްބަރުންގެ ތެރެއިން 51 މެމްބަރުންގެ ތާއީދާއެކުއެވެ. ދައުރު ދަންމާލަން ނުފެންނަކަމަށް އެއް މެމްބަރަކު ވޯޓް ދެއްވިއިރު ވަކިގޮތަކަށް ވޯޓް ނުދެއްވާ 6 މެމްބަރަކު ތިއްބެވިއެވެ.
މަޖިލީހުގެ ރައީސް މުޙައްމަދު އަސްލަމް ވިދާޅުވީ މަޖިލީހުގެ މި ދައުރު އިތުރުކުރަން ނިންމެވީ މަޖިލީހުގައި މުހިއްމު މަސައްކަތްތަކެއް ހުރުމުންކަމަށެވެ. މަޖިލީހުގައި މިހާރު ހުރި މަސައްކަތްތަކުގެ ތެރޭގައި އެންމެ މުހިއްމު ކަމަކަށް އޮތީ އަންނަ އަހަރަށް ލަފާކުރާ ދައުލަތުގެ ބަޖެޓް ފާސްކުރުމެވެ. ބަޖެޓްގެ ބަހުސް އިއްޔެ ވަނީ ނިންމާލާފައެވެ. ކޮމެޓީގައި ދިރާސާކުރުމަށްފަހު އަލުން މަޖިލީހަށް ހުށައަޅާ ބަޖެޓް ފާސްކުރަން ޖެހޭނެއެވެ.
މީގެއިތުރުން އައު ސަރުކާރުގެ ވަޒީރުންގެ މަޖިލީހުގެ މެމްބަރުންނަށް ރުހުން ދިނުމުގެ މައްސަލަވެސް ވަނީ މަޖިލީހަށް ހުށައަޅާފައެވެ. މި މައްސަލަވެސް މިހާރު އޮތީ ކޮމެޓީގެ މަރުހަލާގައެވެ.
މަޖިލީހުގެ މިއަހަރުގެ ފަހު ދައުރު ދިގު ދަންމާލަން މި ޖެހުނީ ރައްޔިތުން މަޖިލީހުގެ ކުރީގެ ރަޢީސް، ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅުނު ހިސާބުން މަޖިލިސް ތަޅުއެޅުވި އެއްވެސް މަސައްކަތެއް ކުރިޔަށް ނުގޮސް އެތައް ދުވަހެއް ވަންދެން އޮތުމުންނެވެ.