ވެރިންނާއި ގުޅޭގޮތުން ފެތުރި ވާހަކަތައް ދޮގުކޮށް މައްސަލަ ބަލައިދޭން އެމްޓީސީސީން އެދިއްޖެ
-
- ކުންފުނި ބަދުނާމު ކުރަނީ ސިޔާސީ ބޭނުމަށް
-
- މައްސަލަ ބަލައިދޭން އެސީސީއަށްވަނީ ހުށައަޅާފައި
މާކެޓް ރޭޓަށްވުރެ ބޮޑުކޮށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ބޮޑު ހިލަ ސިޕްމަންޓެއް ގަންނަ އުޅޭކަމަށް ބުނާ ވާހަކަތައް އެކުންފުނިން ދޮގުކޮށްފިއެވެ.
އެމްޓީސީސީ މިކަން ހާމަކުރީ އެކުންފުނީގެ ސީއީއޯ އާދަމް އާޒިމް އިސްވެ ހުންނަވައިގެން ކުންފުނީގެ އިތުރު ވެރިންތަކެއް ބައިވެރިވާ ގޮތަށް ނާޖައިޒު މާލީ ފައިދާތަކެއް ހޯދުމަށް މަސައްކަތް ކުރަމުންދާކަމަށް ބުނެ ރާއްޖޭގެ އަމިއްލަ ނޫހެއްގައި ލިޔުނު ހަބަރަކާއި ގުޅިގެންނެވެ.
އެމްޓީސީސީން ނެރުނު ބަޔާނެއްގައި ވަނީ އެ ނޫހުގައިވާ ވާހަކަތަކީ އެއްވެސް އަސާސެއް ބުރަދަނެއް ނެތް ދޮގު ވާހަކަތަކެއްކަމަށެވެ، އަދި ކުންފުނީގެ އެކިއެކި ބޭނުމަށް ގެނެވޭ މުދަލުގެ މުޢާމަލާތަތަކަކީ ކުންފުނީގެ ބޯޑުން ފާސްކޮށްފައިވާ ޕްރޮކިއުމަންޓް ޕޮލިސީއާ އެއްގޮތަށް ކުރިއަށްދާ މުޢާމަލާތްތަކެއްކަން އެ ބަޔާނުގައިވެއެވެ. އަދި މިފަދަ މުއާމަލާތްތަކުގެ ހުއްދަ ދިނުމަށް ވާނީ އެކި މަރުހަލާތަކުގައި ހުއްދަ ދިނުމަށް ގިންތި ކަނޑައެޅި ޑޮކިޔުމަންޓްކޮށްފައިވާކަމަށްވެސް އެމްޓީސީގެ ބަޔާނުގައިވެއެވެ.
ކުންފުނީގެ ވެރިންގެ ބޮލުގައި ބޮޑެތި ތުހުމަތު އެއްވެސް ހެއްކެއްނެތި އަޅުވާ ދައްކާފައިވާ ވާހަކަތަކުގެ ހަޤީގަތް ރައްޔިތުންނަށް ސާފުކޮށްދިނުމަށް އެކަމާއި ގުޅޭ ތަހުޤީގެއް ހިންގާދިނުމަށް އެންޓި ކޮރަޕްޝަން ކޮމިޝަނަށް ހުށައަޅާފައިވާކަމަށްވެސް އެމްޓީސީން ބުނެއެވެ.
" މި ކުންފުނިން އަބަދުވެސް އިސްކޮށްފައިވާނީ ކުންފުންޏާއި ކުންފުނީގެ ހިއްޞާދާރުންގެ މަސްލަހަތެވެ. އެގޮތުނ،ް ކޮންމެ މުޢާމަލާތެއްގައިވެސް ޢަމަލުކޮށްފައިވާނީ ރަނގަޅު ގަވަރނަންސްގެ ތެރެއިން ކަމަށާއި އަދި ވިޔަފާރީގައި ގެންގުޅޭ ބަޢިނަލް އަޤްވާމީ ބެސްޓް ޕްރެކިޓްސްގެ ހަމަތަކާއި މިންތަކާއި އެއްގޮތްވާ ގޮތުގެ މަތިންކަމުގައި ދަންނަވަމެވެ. އަދި ދިވެހި ރައްޔިތުންނަށް މިކަމުގެ ހަޤީގަތް ސާފުކޮށްދިނުމަށް އޭސީސީން ތަހުޤީގެއް
ހިންގާދިނުމަށް އެދި މިކުންފުނިން އެ ކޮމިޝަނަށް މިހާރު ވާނީ ސިޓީއަކުން ދަންނަވާފައެވެ." އެމްޓީސީސީގެ ބަޔާނުގައިވެއެވެ.
އެމްޓީސީސީން ބުނީ އެ ކުންފުންޏާއި ކުންފުނީގެ ވެރިން ބަދުނާމުވާ ގޮތަށް ހަޤީގަތާއި ޚިލާފު ދޮގު ޚަބަރު ފަތުރަމުން ދިޔުމަކީ ވަރަށް ނާތަހުޒީބު ޢަމަލެއްކަމަށެވެ. އަދި މިކަން ކުރަނީ ޒާތީ ތަޢައްސުބް އިސްކޮށް، ސިޔާސީ މަންފާއެއް ހޯދުމުގެ ވިސްނުމުގައިކަމަށްވެސް އެމްޓީސީސީން ބުނެއެވެ.