މާލޭ މޭޔަރުކަމުގެ ޓިކެޓު އެމްޑީޕީން ޢާޒިމަށް، ދެން ވާދަކުރާނީ ޢާޒިމާ، ޙުސައިން، ސައިފް
-
އެމްޑީޕީގެ ޕްރައިމަރީއަށް ހުލުވާލުމުން ކުރިމަތިލެއްވީ ޢާޒިމް އެކަނި
-
އިތުރު ތިން ދާއިރާގެ ޓިކެޓުވެސް ވަނީ ޕްރައިމަރީއާއި ނުލައި ދީފައި
-
މޭޔަރު އިންތިޚާބު އޮންނާނީ ޖެނުއަރީ 13ގައި
ވާދަވެރިކަން ނެތުމުން، މާލޭގެ މޭޔަރުކަމުގެ އެމްޑީޕީ ޓިކެޓު އެމްޓީސީސީގެ ކުރީގެ ސީއީއޯ އާދަމް ޢާޒިމަށް ލިބިވަޑައިގެންފިއެވެ.
މާލޭ ސިޓީ ކައުންސިލުން ހުސްވެފައިވާ މޭޔަރުކަމާއި، އިތުރު ތިން ދާއިރާއެއްގެ ކައުންސިލްމެންބަރުކަމުގެ ޕްރައިމަރީއަށް އެމްޑީޕީން ހުޅުވާލުމުން، ކޮންމެ ދާއިރާއަކަށްވެސް ކުރިމަތިލާފައިވަނީ އެންމެ ކެނޑިޑޭޓެކެވެ.
ޕްރައިމަރީއަކާ ނުލައި ޓިކެޓު ލިބިވަޑައިގަތީ އާޒިމްގެ އިތުރުން މެދު ހެންވޭރު ދާއިރާގެ ކައުންސިލަރުކަމަށް އަހުމަދު ރިޝްވާން ރަޝީދު، ހ. ވޭމައުތު / މާލެ، ހެންވޭރު ދެކުނު ދާއިރާގެ ކައުންސިލަރުކަމަށް ހައްވާ ނިޙްލާ، ހ. ތަރަބޫޒުގެ / މާލެ އަދި މާފަންނު ދެކުނު ދާއިރާގެ ކައުންސިލަރުކަމަށް އަހުމަދު އިމްރާން – މ. ފަޅުމަތީގެ / މާލެ އަށެވެ.
މާލޭ މޭޔަރުކަމުގެ ގޮނޑި ހުސްވީ އެމަޤާމުގައި ކުރިން ހުންވި ޑރ. މުޙައްމަދު މުޢިއްޒު ރައީސުލްޖުމްހޫރިއްޔާކަމުގެ މަޤާމަށް އިންތިޚާބުވެވަޑައިގަތުމުން، މޭޔަރުކަމުން އިސްތިއުފާދެއްވުމުންނެވެ. އަދި ކައުންސިލްގެ ތިން ގޮނޑި ހުސްވީ، ކައުންސިލް ތިން މެންބަރަކު ސަރުކާރުގެ ބައެއް މަޤާމުތަކަށް ވަޑައިގަތުމުންނެވެ.
މާލޭ މޭޔަރުކަމުގެ މަޤާމަށް ވާދަކުރައްވާނެކަމަށް މިހާތަނަށް އިއުލާންކުރައްވާފައިވަނީ ޢާޒިމްގެ އިތުރުން، ކުރީގެ ބަންޑާރަ ނާއިބު އާއިޝަތު ޢާޒިމާ ޝަކޫރާއި، ކުރީގެ ކޮމިޝަނަރ އޮފް ޕޮލިސް ޙުސައިން ވަޙީދާއި، މާލޭ ސިޓީ ގަލޮޅު އުތުރު ދާއިރާގެ ކައުންސިލަރު މުޙައްމަދު ސައިފް ފާތިހްއެވެ.
މާލޭ މޭޔަރުކަމުގެ އިންތިޚާބު އޮންނާނީ އަންނަ މަހުގެ 13 ވަނަ ދުވަހުއެވެ. މޭޔަރުކަމަށް ވާދަކުރައްވަން ޕީޕީއެމް/ޕީއެންސީން ވަނީ އެކޯލިޝަނުގެ ޕްރައިމަރީ މިމަހުގެ 9ވަނަ ދުވަހު ބޭއްވުމަށް ނިންމާފައެވެ.