ރާއްޖޭގައި ތިބި އިންޑިއާ ސިފައިން އަނބުރާ ގެންދިއުމަށް އެއްބަސްވެފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ތުރުކީވިލާތަށާއި، ޔޫއޭއީއަށް ކުރެއްވި ދަތުރުފުޅަށްފަހު ރާއްޖެ ވަޑައިގެން ވެލާނާ އިންޓަރނޭޝަނަލް އެއަރޕޯޓުގައި ބޭއްވި ނޫސްވެރިންގެ ބައްދަލުވުމުގައި ދެއްކެވި ވާހަކަފުޅުގައެވެ.
ރާއްޖޭގައި ތިބި އިންޑިއާ ސިފައިން އަނބުރާ ގެންގޮސްދެއްވުމަށް އެދި ދިވެހި ސަރުކާރުން ރަސްމީ ގޮތުން އިންޑިއާ ސަރުކާރުގައި އެދިވަޑައިގަތީ ނޮވެމްބަރުމަހުގެ 18ވަނަ ދުވަހުއެވެ. އެއީ ރައީސުލްޖުމްހޫރިއްޔާކަމުގެ މަޤާމާ ހަވާލުވެވަޑައިގެން ރައީސުލްޖުމްހޫރިިއްޔާއާއި، އިންޑިއާގެ މިނިސްޓރަ އޮފް އަރތް ސައިންސެސް، މިސްޓަރ ކިރެން ރިޖިޖޫ އާއެކު ބޭއްވި ބައްދަލުވުމުގައެވެ.
ރާއްޖޭގައި ތިބި އިންޑިއާ ސިފައިން ފޮނުވާލުމަށް ކުރަމުންދާ މަސައްކަތްތަކާއި ގުޅޭގޮތުން ނޫސްވެރިންގެ ބައްދަލުވުމުގައި ވާހަަކަދައްކަވަމުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ ރާއްޖޭގެ މިނިވަންކަމާއި ސިޔާދަތަށް އަސަރުކުރާނެ އެއްވެސް ކަމަކަަށް ފުރުސަތު ނުދެއްވާނެ ކަމަށެވެ.
އެގޮތުން ރާއްޖޭގައި ތިބި އިންޑިއާ ސިފައިން ފޮނުވާލުމަށް ކުރެވުނު މަސައްކަތަކާއެކު އެޤައުމުގެ ސިފައިން އަނބުރާ ގެންދާނެ ކަމަށް އެޤައުމުގެ ސަރުކާރުން އެއްބަސްވެފައިވާ ކަމަށް ރައީސް ވިދާޅުވިއެވެ.
"މިއަދާއި ހަމައަށް ކުރެވުނު ހުރިހާ މަސައްކަތުން އިންޑިއާ ސަރުކާރުން އެއްބަސްވެފައިވަނީ އިންޑިއާ ސިފައިން އަނބުރާ ގެންދިޔުމަށް، ޓެކްނިކަލް ލެވަލްގައި މަސައްކަތް އެބަ ކުރިއަށްދޭ، މިހާރު އެއްބަސްވެފައިމިވަނީ ހައި ލެވަލްގެ ކޮމެޓީއެއް އެކުލަވާލަން، މަޝްރޫޢުތައް ކުރިއަށްގެންދިިޔުމަށް ހުރި މައްސަލަތައް ހައްލުކުރުމަށް،" ރައީސް ވިދާޅުވިއެވެ.
އިންޑިއާއާ ދެމެދު އޮންނަ ގުޅުން އިތުރަށް ބަދަހި ކުރުމަށް މަސައްކަތް ކުރުމަށްޓަކައި "ކޯ ގްރޫޕެއް" އެކުލަވާލަން ނިންމަވައިފައިވަނީ ރައީސް ޑރ.މުޢިއްޒުވަނީ ކޮޕް28ގެ ހަވާސާގައި އިންޑިއާގެ ބޮޑުވަޒީރު ނަރެންދުރަ މޯދީއާ އެކު ބޭއްވި ބައްދަލުވުމުގައެވެ.
ރައީސް ޑރ. މުޢިއްޒު ވިދާޅުވީ ރާއްޖޭގައި ތިބި އިންޑިއާ ސިފައިން ފޮނުވާލުމުގެ މަސައްކަތް ކުރަނީ ޑިޕްލޮމަސީގެ ރީތި އުސޫލުތަކުގެދަށުން ކަމަށެވެ.
"ހިމޭން ރިވެތި އުސޫލުތަށް ބޭނުންކުރާނަން، ޑިޕްލޮމަސީގެ ރީތި އުސޫލުތަށް ބޭނުންކޮށްގެން މިޤައުމުން ބޭރު ސިފައިން ނުތިބޭތަން ހާސިލްކުރާނަން، މިއީ ކެމްޕެއިން ފެށުނީއްސުރެއް ވާހަކައަކީ، ތަފާތެއް ނުވާނެ. ވޯޓެއް ހޯދަން ދެއްކިވާހަކައެއްނޫން. ބޭނުންވަނީ ދިވެހިން އިސްކުރަން." ރައީސް ވިދާޅުވިއެވެ.
ރައީސް ޑރ. މުޢިއްޒު ވިދާޅުވީ އިންޑިއާ ސިފައިން އަނބުރާ ފޮނުވާލުމާއި ގުޅޭގޮތުން މިހާތަނަށް 5 ވަރަކަށް ބައްދަލުވުން އިންޑިއާގެ އިސްވެރިންނާއި އެކު ބާއްވާފައިވާ މަޝްވަރާކުރައްވާފައިވާކަމަށެވެ.
ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލުމަކީ ސަރުކާރުން ހާއްސަ އިސްކަމެއް ދީގެން ކުރަމުންދާ މަސައްކަތެކެވެ. އެގޮތުން މިހާތަނަށް ބެލި ބެލުމުން ރާއްޖޭގައި އިންޑިއާގެ 77 ސިފައިން ޤާއިމުވެފައި ތިބިކަން ދެނެގަނެވިފައިވާކަމަށް ސަރުކާރުން މީގެކުރިންވަނީ ހާމަކޮށްފައެވެ. އެއީ އިންޑިއާއިން ހަދިޔާކުރި 1 ހެލިކޮޕްޓަރު ދުއްވުމުގެ މަސައްކަތުގައި 24 ސިފައިން، 2 ވަނަ ހެލިކޮޕްޓަރު ދުއްވުމުގެ މަސައްކަތުގައި 26 ސިފައިން އަދި ޑޯނިއާ މަތިންދާބޯޓު ދުއްވުމުގައި 25 އިންޑިއާ ސިފައިން ހަރަކާތްތެރިވާކަމަށާއި މެއިންޓަނަންސްއާއި އިންޖިއަރިންގެ މަސައްކަތުގައި 2 ސިފައިން މަސައްކަތް ކުރާކަމަށް ސަރުކާރުން ވިދާޅުވެއެވެ.
ދެ ހެލިކޮޕްޓަރު ރާއްޖެ ގެނައީ، 2011 އަދި 2016 ވަނަ އަހަރު ކަމަށް، މިދިޔަ ސަރުކާރުން ވަނީ ވިދާޅުވެފައެވެ. ސަރުކާރުން އޭރު ބުނަމުން ދިޔައީ، އިންޑިއާ ސިފައިން ރާއްޖޭގައި ތިބީ، މި އުޅަނދުތައް ދުއްވުމާއި އޮޕަރޭޓްކުރަން ދިވެހި ސިފައިން ތަމްރީން ކުރެވެންދެންކަމަށް ކަމަށެވެ. ނަމަވެސް މިހާތަނަށް އައިއިރުވެސް އަދިވެސް، އެ އުޅަނދުތައް ދުއްވާ ބަލަހައްޓަނީ އިންޑިއާ ސިފައިންނެވެ. އަދި މިކަމުގެ ބޭސްތައް އުތުރާއި ދެކުނުގައިވެސް ޤާއިމުކޮށްފައިވެއެވެ.
މީގެ އިތުރުން ސިޔާސީ ގުޅުންތަކާއި ގުޅޭ 100 އަށްވުރެ ގިނަ އެއްބަސްވުން މިިދިޔަ 5 އަހަރުގެ ތެރޭގައި އިންޑިއާއާއި ދިވެހިރާއްޖެއާއި ދެމެދު ޤާއިމުކޮށްފައިވާކަމަށް ދިވެހި ސަރުކާރުން ވިދާޅުވެފައިވެއެވެ.