މާލެސިޓީގެ މޭޔަރުކަމަށް ކުރިމަތިލާ ކެންޑިޑޭޓުންގެ ބަހުސެއް ޕީއެސްއެމުން ބާއްވަނީ

މާލެ ސިޓީގެ މޭޔަރުކަމަށް ކުރިމަތިލާ ކެންޑިޑޭޓުންގެ ޚާއްސަ ބަހުސެއް ޕަބްލިކް ސަރވިސް މިޑިއާ ޕީއެސްއެމުން ގެނެސްދިނުމަށް ހަމަޖެހިއްޖެއެވެ.

މާލެ ސިޓީގެ މޭޔަރުގެ ގޮނޑި ހުސްވެފައިވަނީ، އެމަޤާމުގައި ކުރިން ހުންނެވި މިހާރުގެ ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ރައީސުލްޖުމްހޫރިއްޔާކަމުގެ މަޤާމަށް އިންތިޚާބުވެވަޑައިގަތުމުން، މޭޔަރުކަމުން އިސްތިއުފާދެއްވުމުންނެވެ.

މޭޔަރަކު އައްޔަންކުރެއްވުމަށް ބާއްވާ އިންތިޚާބަށް ކުރިމަތިލިމުގެ ފުރުޞަތު އިލެކްޝަން ކޮމިޝަނުން ހުޅުވާލެއްވީ މިދިޔަ މަހުގެ 28ވަނަ ދުވަހުއެވެ. ކުރިމަތިލުމުގެ މުއްދަތު ހަމަވާނީ މިމަހުގެ 13 ވަނަ ދުވަހުއެވެ.

މި މަޤާމަށް ވާދަކުރުމުގެ ޝަޢުވެރިކަން މިހާތަނަށް ފާޅުކޮށްފައިވަނީ ސިޔާސީ 3 ޕާޓީއަކުންނާއި ކުރީގެ ރައީސް ޔާމީން އިސްކޮށް ހުންނަވާ އުފައްދަވަން މަސައްކަތްކުރާ ޕާޓީންނެވެ. މާލޭ މޭޔަރުކަމުގެ މަޤާމަށް ވާދަކުރައްވާނެކަން މިހާތަނަށް އިއުލާންކުރައްވާފައިވަނީ އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާދަމް ޢާޒިމް، ޕީޕީއެމްގެ ފަރާތުން ކުރީގެ ބަންޑާރަ ނާއިބު އާއިޝަތު ޢާޒިމާ ޝަކޫރު، ދަ ޑިމޮކްރެޓްސްގެ ފަރާތުން މާލޭ ސިޓީ ގަލޮޅު އުތުރު ދާއިރާގެ ކައުންސިލަރު މުޙައްމަދު ސައިފް ފާތިހްއެވެ. އަދި ރައީސް ޔާމީން އިސްކޮށް ހުންނަވާ އުފައްދަވަން މަސައްކަތްކުރާ، ޕީޕަލްސް ނެޝަަނަލް ޕްރަންޓުން، ކުރީގެ ކޮމިޝަނަރ އޮފް ޕޮލިސް ޙުސައިން ވަޙީދުއެވެ.

ޕީއެސްއެމުން ކުރިއަށްދަން ނިންމާފައިވާ މޭޔަރުންގެ ބަހުސަކީ، މާލެ ސިޓީގެ ތަރައްޤީއަށް އެބޭބޭފުޅުން ގެންގުޅުންވާ ތަޞައްވުރާއި، ކުރިއަށްގެންދަވާނެ މަސައްކަތްތަކާއި ގުޅޭގޮތުން ރައްޔިތުންނާއި ހަމައަށް މަޢުލޫމާތު ފޯރުކޮށްދިނުމުގެ ފުރުޞަތު ފަހިކޮށްދިނުމަށް ބާއްވަން ނިންމާފައިވާ ބަހުސެކެވެ. އަދި ހުރިހާ ކެންޑިޑޭޓުންގެ ފިކުރު އެކި ދާއިރާތަކުން އެނގި، އެންމެ އެކަށޭ މޭޔަރަކު އައްޔަންކުރުމަށް ރައްޔިތުންނަށް ފަހިކޮށްދިނުމަކީވެސް ޕީޕީއެމުން މިބަހުސް ބާއްވާ އެއް ބޭނުމެވެ.

މޭޔަރުންގެ ބަހުސްވެސް ބާއްވާނީ، ޕީއެސްއެމުން ބާއްވަމުން އަންނަ ރިޔާސީ ބަހުސާއި ދާއިރާތަކުގެ ބަހުސްވެސް ބާއްވަމުން އަންނަ ގޮތަށެވެ. ބަހުސްގައި ބައިވެރިވުމަށް ހުރިހާ ކެންޑިޑޭޓުންނަށް ދަޢުވަތު އަރުވާނެއެވެ. ބަހުސް ބާއްވާނެ ތާރީޚް ޕީއެސްއެމުން އިޢުލާނުކުރާނެއެވެ.

މޭޔަރުންގެ ބަހުސްގެ އިތުރުންވެސް، ކެންޑިޑޭޓުންގެ ސިޔާސަތުތައް ގެނެސްދިނުމަށް އޮންއެއަރ ވަގުތު ދޫކުރުމަށްވެސް ވަނީ ހަމަޖެހިފައެވެ. މިކަމާއި ގުޅޭ ޢުސޫލުވެސް އާއްމުކުރާނެއެވެ.

މާލޭ މޭޔަރުކަމުގެ އިންތިޚާބު އޮންނާނީ އަންނަ މަހުގެ 13 ވަނަ ދުވަހުއެވެ.