ޣައްޒާގެ ދެކުނުގައިވާ ރަށްތަކަށް ޔަހޫދީ ފައުޖުން ބަރުހަތިޔާރާ އެކު އެއްގަމު މަގުން އެރުމުން، ޙަމާސްގެ މުޖާހިދުން ޔަހޫދީ ސިފައިންނަށް ވަރުގަދަ ރައްދެއް ދީފިއެވެ. ޣައްޒާގެ ދެކުނުގައިވާ ޚާން ޔޫނިސް އޮންނަ ސަރަޙައްދަށް ވަދެފައިވާ ޔަހޫދީ ފައުޖުގެ ސިފައިންނާ ޙަމާސްގެ މުޖާހިދުން ދަނީ ވަރުގަދައަށް ކުރިމަތިލަމުންނެވެ. އަދި، އެ މީހުންނަށް ވަރުގަދަ ހަމަލަތަކެއް ޢަމާޒު ކުރަމުންނެވެ. އެއްގަމު މަގުން ޣައްޒާއަށް އެރި ޔަހޫދީ ސިފައިންގެ ތެރެއިން 84 މީހުން މަރުވެފައިވާ ކަމުގައި ރިޕޯޓުތައް ބުނެއެވެ.
ޣައްޒާގެ ދެކުނު ފަރާތު އައްސޭރިފަށުގައި އޮންނަ އެ ސަރަޙައްދު ދިފާޢު ކުރަން ޖިހާދު ކުރަމުންދާ ޙަމާސްގެ މުޖާހިދުންނަށް ޔަހޫދީ ފައުޖުން ވެސް ދަނީ ވަރުގަދަ ވައިގެ ޙަމަލާތަކެއް ޢަމާޒު ކުރަމުންނެވެ. އެއީ، ފަލަސްޠީނުގެ ޢާންމުންގެ ގިނަ ޢަދަދެއްގެ ބަޔަކު ދިރިއުޅޭ ސަރަޙައްދަކަށްވާއިރު، ޔަހޫދީންގެ އުދުވާންތަކުގެ ސަބަބުން އެ ސަރަޙައްދުގައި ދިރިއުޅޭ ޢާންމު ރައްޔިތުންނަށް ވަނީ ރައްކާތެރި ކަމެއް ހޯދާނެ މަގުތައް ބަންދުވެފައެވެ.
ޣައްޒާގެ ޞިއްޙީ ޚިދުމަތްތެރިން ބުނީ، ޔަހޫދީންގެ ލާއިންސާނީ އުދުވާނުގައި ޝަހީދުކޮށްލާފައިވާ މީހުންގެ ހަށިތަކާއި، ޒަޚަމު ކޮށްލާފައިވާ މީހުންނާ އެކު އެ ސަރަޙައްދުގައިވާ ހޮސްޕިޓަލްތައް މިހާރު ފުރިފައިވާ ކަމުގައެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ. އަދި، ހޮސްޕިޓަލްތަކުން ޞިއްޙީ ފަރުވާ ދިނުމަށް ބޭނުންވާ ސާމާނު ދަނީ ހުސްވަމުންނެވެ. ޔަޙޫދީންގެ އުދުވާނުގައި ގެދޮރު ސުންނާފަތި ކޮށްލާފައިވާ ގިނަ ޢަދަދެއްގެ ބަޔަކު ވެސް މި ވަޤުތު ހިޔާވަހިކަން ހޯދަމުން ދަނީ ހޮސްޕިޓަލްތަކުގައެވެ.
ޔަހޫދީންގެ އުދުވާނާ ގުޅޭ ގޮތުން ވާހަކަފުޅު ދައްކަވަމުން އިންސާނީ ޙައްޤުތަކާ ބެހޭ އދގެ އިދާރާގެ އިސްވެރިޔާ ފޮލްކާ ތުރްކު ވިދާޅުވީ މިހާރު ޣައްޒާއަކީ އިންސާނުން ދިރިއުޅެން އެކަށީގެންވާ ފެންވަރުގެ ތަނެއް ނޫން ކަމުގައެވެ. އަދި، ޔަހޫދީ ފައުޖުން ޣައްޒާގެ މުސްލިމުންގެ އިންސާނީ ޙައްޤުތަކަށް އަރައިގަނެފައިވާ ކަމަށް ބެލެވޭ ކަމުގައި އޭނާ ވިދާޅުވިއެވެ. މެދުކެނޑުމެއް ނެތި ޔަހޫދީން ޣައްޒާއަށް ބޮންއަޅަމުންދާތީ، ރަފަޙް މަގުން ޣައްޒާއަށް އިންސާނީ އެހީގެ ސާމާނު އެތެރެ ކުރަން ހުރަސް އެޅިފައިވާ ކަމުގައި އދން ބުނެއެވެ.
ޣައްޒާގެ ދެކުނުގެ ސަރަޙައްދުތަކަށް ޔަހޫދީ ފައުޖުން އެއްގަމު މަގުން އަރާފައި ވަނީ އެ ސަހަރުގެ އުތުރުގައިވާ ސަރަޙައްދުތައް ސުންނާފަތިކޮށް ނިންމުމަށް ފަހުއެވެ. ޚާންޔޫނިސްގައި ދިރިއުޅޭ ރައްޔިތުން ބުނީ، ޔަހޫދީ ފައުޖުން މެދުކެނޑުމެއް ނެތި އެ މީހުންގެ ގެދޮރަށް ބޮން އަޅަމުންދާ ކަމުގައެވެ. އަދި، އެ ރަށް ވަށައިލާފައިވާ ޔަހޫދީ ސިފައިން އަސްކަރީ ޓޭންކުފަހަރު ފަދަ ބަރުހަތިޔާރު ބޭނުން ކޮށްގެން ހަމަލަ ދެމުންދާ ކަމުގައެވެ.
ޣައްޒާގެ އުތުރަށް ވެސް ޔަހޫދީ ފައުޖުން އަދިވެސް ދަނީ ޙަމަލާތައް ޢަމާޒު ކުރަމުންނެވެ. އެންމެ ފަހުގެ ހަމަލަތައް ޢަމާޒު ކޮށްފައި ވަނީ ޖަބާލިޔާ ރެފިއުޖީ ކޭމްޕު ހުންނަ ސަރަޙައްދާއި، އެ ސަރަޙައްދުގައި ހުންނަ ޢާންމުން ދިރިއުޅޭ ގެދޮރަށެވެ. ޣައްޒާގެ މުސްލިމުންނާ ދެކޮޅަށް ޔަހޫދީން ލާއިންސާނީ އުދުވާންތައް ފަށާފައި ވަނީ އޮކްޓޫބަރު 7 ވަނަ ދުވަހުއެވެ. މި އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 16,248 އަށް އަރާފައެވެ. އޭގެ ތެރޭގައި 6,500 އަށްވުރެ ގިނަ ކުޑަކުދިން ހިމެނެއެވެ.