ޕީޕީއެމް/ޕީއެންސީގެ ލީޑަރަކަށް ރައީސް ޑރ.މުޢިއްޒު

ޕީޕީއެމް/ޕީއެންސީގެ ލީޑަރަކަށް ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންތިޚާބުކޮށްފިއެވެ.

ޕީޕީއެމް/ޕީއެންސީގެ ލީޑަރަކަށް ރައީސުލްޖުމްހޫރިއްޔާ އިންތިޚާބުކުރައްވާފައިވަނީ، ‏ޕްރޮގްރެސިވް ކޮންގްރެސް ކޯލިޝަންގެ ޖޮއިންޓް ސެނެޓްގެ 6 ވަނަ ބައްދަލުވުމުގައި ބައިވެރިވެވަޑައިގެންނެވި 103 ސެނެޓަރުންގެ އިއްތިފާގުންނެވެ. ސެނެޓުގެ ބައްދަލުވުން ބޭއްވެވީ ޕީއެންސީގެ އައު އޮފީހުގައެވެ.

ރައީސުލްޖުމްހޫރިއްޔާ ޕީޕީއެމް/ ޕީއެންސީގެ ލީޑަރަކަށް އިންތިޚާބުކުރައްވާފައިވާއިރު، އެމަނިކުފާނަކީ ޕީއެންސީގެ ރައީސްވެސްމެއެވެ. އެމަނިކުފާނު އެ މަޤާމަށް އައްޔަންކުރައްވާފައިވަނީ ރިޔާސީ އިންތިޚާބުގެ ކާމިޔާބީއަށްފަހު އޮކްޓޫބަރު މަހުގެ 4 ވަނަ ދުވަހުއެވެ.

ޕީޕީއެމް ޕީއެންސީ ހިމެނޭ ކޯލިޝަންގެ ލީޑަރަށް ރައީސް ޑރ. މުޙައްމަދު މުޢިއްޒު އިންތިޚާބުކުރައްވާފައިވާއިރު، ކުރީގެ ރައީސް ޢަބްދުﷲ ޔާމީން ވަނީ ޕީޕީއެމުން ވަކިވެވަޑައިގެން އައު ސިޔާސީ ޕާޓީއެއް އުފެއްދެވުމުގެ މަސައްކަތް ފަށްޓަވާފައެވެ. ނަމަވެސް ޕީޕީއެމްގެ ލީޑާރޝިޕް އޮތީ ރައީސް ޑރ. މުޙައްމަދު މުޢިއްޒުގެ ފަހަތްޕުޅުގައިކަން ވަނީ ހާމަކުރައްވާފައެވެ.

މިހާތަނަށް ޕީޕީއެމް ޕީއެންސީގެ ލީޑަރެއްގެ ގޮތުގައި އެ ކޯލިޝަން ހިންގެވުމާ ހަވާލުވެ ހުންނެވީ، ޢަބްދުއްރަޙީމް ޢަބްދުﷲއެވެ.