މަސްވެރިކަމުގެ ސިނާއަތާއިގުޅުން ހުރި މައުލޫމާތު ހިއްސާކުރުމަށް ހަވީރެއް ބާއްވައިފި

މަސްވެރިންގެ ދުވަހާއި ގުޅުވައިގެން މަސްވެރިކަމުގެ ސިނާއަތާއިގުޅުން ހުރި މައުލޫމާތު ހިއްސާކުރުމަށް ކުޑަކުދިންގެ ހަވީރެއް މިއަދު ބާއްވައިފިއެވެ.

ހުޅުމާލެ، ސެންޓްރަލް ޕާރކްގައި، ކުރިއަށްދިޔަ މި ހަވީރުގައި ޝަޢުގުވެރި ގިނަ ހަރަކާތްތަކެއްވަނީ ކުރިއަށް ގެންގޮސްފައެވެ. އެގޮތުން އިވެންޓަށް ވަންނަ މަގު ޚާއްސަކޮށްފައިވަނީ ދިވެހި މަސްވެރިކަމުގެ ތައާރަފެއް ދޭ ވޯކްވޭއެއް ގޮތަށެވެ.

މީގެ އިތުރުން މަސްވެރިކަމާއި ގުޅޭ ހުށަހެޅުންތަކާއި ދައްކާލުންތައް މިހަވީރުގައިވަނީ ކުރިއަށް ގެންގޮސްފައެވެ. އޭގެތެރޭގައި މަސްކެނޑުމުގެ ހުނަރު ދައްކާލުމާއި ކަނޑުމަހުގެ ބާވަތްތަކުން ތަފާތު ދިވެހި ކާތަކެތި ތައްޔާރުކުރުމުގެ ހުނަރުތައް ދައްކާލުމުގެ އިތުރުން މަހުގެ ތަފާތު އުފެއްދުންތައް ދައްކާލާފައިވެއެވެ.

މިހަވީރުގެ ތެރެއިން ކުރެހުމުގެ މުބާރާތްތަކާއި "ފަސްމީރު ޔަންގް ޝެފް" ނަމުގައި މުބާރާތެއް ބާއްވާ މިމުބާރާތްތަކުން ހޮވުނު ކުދިންނަށްވަނީ އިނާމްވެސްދީފައެވެ.

މަސްވެރިކަމާއި ގުޅޭ ހަރަކާތްތަކުގެ އިތުރުން، އެކި އުމުރުފުރާގެ ކުދިންނަށް ބައިވެރިވެވޭ ގޮތަށް ތަފާތު ކުޅިވަރުތައްވެސް މިހަވީރުގައިވަނީ ކުރިއަށް ގެންގޮސްފައެވެ. މީގެ ތެރޭގައި ޚާއްސައެހީއަށް ބޭނުންވާ ކުދިންނަށް ޚާއްސަ ގޭމްތައްވެސް ހުރިކަން ފާހަގަކޮށްލެވެއެވެ.

މިހަވީރަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރުގެ އިތުރުން ސަރުކާރުގެ ބައެއް ވުޒާރާތަކުގެ ވަޒީރުން ވަޑައިގެންނެވިއެވެ.

މިއަހަރުގެ މަސްވެރިންގެ ދުވަހާ ގުޅުވައިގެން ކުރިއަށް ގެންދިޔަ މިހަވީރަކީ މަސްވެރިކަމުގެ ސިނާޢަތުގައި ހުރި މަޢުލޫމާތު ކުޑަކުދިންނާއި ޒުވާނުންނާއި ހިއްސާކޮށް މިސިނާޢަތާއި މެދު ސްކޫލް ކުދިންގެ މެދުގައި ޝަޢުޤުވެރިކަން އުފެއްދުމަށްޓަކައި
"މިފްކޯ ކުޑަކުދިންގެ ހަވީރު" ނަމުގައި ބޭއްވި ހަވީރެކެވެ.