ޣައްޒާގައި ދިރިއުޅޭ ރައްޔިތުންނަށް ބޭނުންވާ މިންވަރަށް ކާބޯތަކެތި ނުލިބޭ ކަމަށާއި، އެ މީހުންނަށް ހައިހޫނުކަމާ ކުރިމަތިލާން ޖެހިފައިވާ ކަމުގައި ދުނިޔޭގެ ކާބޯތަކެއްޗާ ބެހޭ ޕުރޮގުރާމް، ޑަބްލިޔުއެފްޕީން ބުނެފިއެވެ. ޣައްޒާގެ ރައްޔިތުންނަށް މި ވަގުތު ކުރިމަތި ކުރުވާފައިވާ ނިކަމެތި ހާލާ ގުޅޭ ގޮތުން އެ ޖަމުޢިއްޔާގެ ޑެޕިޔުޓީ ޑިރެކްޓަރ ކޯލް ސްކައޫ ވިދާޅުވީ، ޔަހޫދީންގެ އުދުވާންތަކާ ގުޅިގެން ޣައްޒާއިން ކާބޯތަކެތި ހުސްވުމާ ގުޅިގެން ހައިހޫނުކަމާ ކުރިމަތިލާން ޖެހިފައިވާ މީހުންނަށް ކާބޯތަކެތި ފޯރުކޮށްދޭން އެ ޖަމުޢިއްޔާއިން ކުރަމުންދާ މަސައްކަތްތައް ހުއްޓައިލަން މަޖުބޫރުވެފައިވާ ކަމުގައެވެ.
"އެކަށީގެންވާ މިންވަރާ ގާތަށް ވެސް ކާބޯތަކެއްޗެއް ނެތް. އެ މީހުންނަށް ވަނީ ހައިހޫނުކަމާ ކުރިމަތިލާން ޖެހިފައި. ޣައްޒާއަށް އިތުރު ކާބޯތަކެތި ވައްދައިގެން މެނުވީ އަޅުގަނޑުމެން މި ކުރަމުންދާ މަސައްކަތްތައް ދެމެހެއްޓޭނެ ގޮތެއް ނެތް،" ސްކައޫ ވިދާޅުވިއެވެ. އޭނާ ދާދިފަހުން ވަނީ ޣައްޒާއަށް ވަޑައިގަންނަވައި، އެ ސަރަޙައްދުގައި ހާލުގައި ޖެހިފައިވާ މީހުންނަށް ކާބޯތަކެތި ފޯރުކޮށްދޭން ޑަބްލިޔުއެފްޕީން ކުރަމުންދާ މަސައްކަތްތައް ބައްލަވައިލައްވައިފައެވެ.
ސްކައޫ ވިދާޅުވީ ޣައްޒާގައި ދިރިއުޅޭ މިލިޔަނެއްހާ މީހުންނަށް ޑަބްލިޔުއެފްޕީން ކާބޯތަކެތި ފޯރުކޮށްދީފައިވާ ކަމުގައެވެ. ނަމަވެސް، ޣައްޒާއަށް އެތެރެކުރާ ކާބޯތަކެތީގެ ޢަދަދު މަދުވުމުން، ޑަބްލިޔުއެފްޕީގެ މަސައްކަތްތައް ކުރުމަށް ހުރަސް އެޅިފައިވާ ކަމުގައި އޭނާ ވިދާޅުވިއެވެ. "އަޅުގަނޑުމެން މި ކުރާ މަސައްކަތް ދެމެހެއްޓެނިވި ގޮތެއްގައި ކުރެވޭކަށް ނެތް،" ސްކައޫ ވިދާޅުވިއެވެ.
ޣައްޒާގެ ފުރަބަންދު ޔަހޫދީން ހަރުކަށި ކުރުމުން ކާބޯތަކެތީގެ އިތުރުން އެ ސަހަރުން ތެޔޮ ވެސް ވަނީ ހުސްވެފައެވެ. އަދި، މެދުކެނޑުމެއް ނެތި ޣައްޒާއަށް ބޮންއަޅަމުންދާތީ، އެއްވެސް އިންސާނަކަށް ރައްކާތެރި ކަމެއް ނެތް ކަމުގައި ސްކައޫ ވިދާޅުވިއެވެ. ޣައްޒާގެ ރައްޔިތުންގެ ގެދޮރު ސުންނާފަތި ކޮށްލާފައިވުމުން، ބައިނަލްއަޤުވާމީ ޖަމުޢިއްޔާތަކުން ހިންގާ ކޭމްޕުތައް ވެސް މިހާރު ވަނީ ފުރި، ބާރުވެފައެވެ. ޣައްޒާގެ ރައްޔިތުން މިހާރު ދިރިއުޅެމުން ދަނީ ތޮއްޖެހިފައިވާ ތަންތަނުގައި ކަމަށާއި، ފިނި މޫސުން ކުރިއަށް އޮތްއިރު، އެއީ ރައްކާތެރި ހާލަތެއް ނޫން ކަމުގައި ސްކައޫ ވިދާޅުވިއެވެ. އަދި، ބަލިމަޑުކަމެއް ފެތުރިދާނެ ކަމުގެ ބިރުވެރި ކަން އޮތް ކަމުގައި ވެސް އޭނާ ވިދާޅުވިއެވެ.
"ޣައްޒާގެ ބޭރުގައި ކާބޯތަކެތި ބަރާކޮށްފައިވާ އުޅަނދުތައް އެބަތިބި. ނަމަވެސް، ޣައްޒާގެ ސަރަޙައްދީ ރޮނގުތައް ހުޅުވައިގެން މެނުވީ، އެ ތަކެއްޗަށް ބޭނުން ޖެހިފައިވާ މީހުންނަށް އެ ތަކެތި ފޯރުކޮށްދެވޭނެ ގޮތެއް ނެތް. މަދު އުޅަނދުތަކެއް ޣައްޒާއަށް ވެއްދި ނަމަވެސް، ހާލުގައި ޖެހިފައިވާ މީހުންނާ ހަމައަށް އެ ތަކެތި ފޯރުކޮށްދޭނެ މަގެއް ނެތް. މި ކަމަށް އޮތް ހަމައެކަނި ހައްލަކީ އުދުވާންތައް ހުއްޓައިލުން،" ސްކައޫ ވިދާޅުވިއެވެ.
ޣައްޒާގެ ކާރިމް އަބޫ ސާލިމް ސަރަޙައްދީ ރޮނގު ހުޅުވައިދިނުމަށް އދން ދަނީ ޔަހޫދީންގެ ކިބައިން އާދޭސް ކުރަމުންނެވެ. ނަމަވެސް، މި އާދޭޭސްތަކަށް ޔަހޫދީ ސަރުކާރުން ދީފައި ވަނީ ބީރު ކަންފަތެކެވެ. މިހާރު ޣައްޒާއަށް އެހީގެ ސާމާނު އެތެރެ ކުރަނީ ޣައްޒާއާއި މިޞްރު ގުޅޭ ރަފަޙް ހުރަސް މެދުވެރިކޮށެވެ. ނަމަވެސް، އެ ތަނުން ކޮންމެ ދުވަހަކު ވެސް އެތެރެ ކުރަނީ މަދު ޢަދަދެއްގެ އުޅަނދުތަކެކެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 18,000 އަށް އުފުލިފައެވެ. ފާއިތުވި 24 ވަރަކަށް ގަޑިއިރުގެ ތެރޭގައި ވެސް 300 އެއްހާ މީހުން ޝަހީދު ކޮށްލާފައިވެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 49,500 އަށް އުފުލިފައެވެ.