ޢިރާޤާއި ސޫރިއާގައި ހުންނަ އެމެރިކާގެ ދެ އަސްކަރީ މަރުކަޒަކަށް ޑްރޯނާއި ރޮކެޓް ޙަމަލާތަކެއް ދީފިއެވެ.
އެ ޙަމަލާތައް ދީފައިވަނީ ޢިރާޤުގެ އިސްލާމިކް ރެސިސްޓެންސް ޖަމާޢަތުން ކަމަށް އެމެރިކާއިން ތުޙުމަތު ކުރެއެވެ. އެ ޖަމާޢަތަކީ ޢިރާޤުގެ އަސްކަރިއްޔާއާ މިހާރު ގުޅިފައިވާ ހަޝިދު އަލް ޝާބީ ކޯލިޝަނާ ގުޅިފައިވާ ހަތިޔާރު އެޅި ޖަމާއަތެކެވެ. އީރާނުގެ އެހީތެރިކަން ލިބޭ އެފަދަ ޖަމާޢަތްތަކުން އަންނަނީ ޣައްޒާގައި ހިނގަމުންދާ ހަނގުރާމައިގައި ޔަހޫދީންނަށް ތާއީދުކުރާތީ އެމެރިކާއާމެދު އޮތް ދެކޮޅުވެރިކަން ވަރަށް ބޮޑަށް ފާޅުކުރަމުންނެވެ.
ޢިރާޤާއި އަވަށްޓެރި ސޫރިއާގައި ޙަރަކާތްތެރިވާ ހަތިޔާރުއެޅި ޖަމާޢަތްތަކާ ހަނގުރާމަކުރާ ބައިނަލްއަޤުވާމީ އިއްތިޙާދު އެކުލަވާލައިފައިވަނީ އެމެރިކާ އިސްވެއެވެ. ފާއިތުވި ހަފުތާތަކުގައި އެމެރިކާގެ އަސްކަރިއްޔާއަށް އަމާޒުކޮށް ތަކުރާރުކޮށްވަނީ ޙަމަލާތައް ދީފައެވެ. އެ ގޮތުން ޢިރާޤުގައި ހުންނަ އަލް ޢައިން އަސަދު ވައިގެ މަރުކަޒަށް އަމާޒުކޮށް ޙަމަލާ ދީފައިވެއެވެ. އެ ޙަމަލާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ. އަދި ސޫރިއާގެ އިރުއުތުރުގައި އަލްޝައްދާދީ ސަރަޙައްދުގައި ހުންނަ އެމެރިކާގެ މަރުކަޒަކަށް ވެސް ރޮކެޓް ޙަމަލާތަކެއް ދީފައިވެއެވެ.
ޔަހޫދީ ފައުޖުތަކާއި ޣައްޒާގެ ވެރިކަންކުރާ ޙަމާސް ޖަމާޢަތާއި ދެމެދު ހަނގުރާމަ ފެށިތާ 10 ދުވަސް ފަހުން އޮކްޓޯބަރު މަހުގެ 17 ވަނަ ދުވަހުން ފެށިގެން ޢިރާޤާއި ސޫރިއާގައި ހުންނަ އެމެރިކާގެ މަރުކަޒުތަކަށް 90އަށްވުރެ ގިނަ ޙަމަލާ ދީފައިވެއެވެ. މި މަހުގެ 8 ވަނަ ދުވަހު ޢިރާޤުގެ ވެރިރަށް ބަޣްދާދުގައި ސަލާމަތީ ފިޔަވަޅުތައް ވަރުގަދަ ކޮށްފައިވާ ގްރީން ޒޯންގައި ހުންނަ އެމެރިކާގެ އެމްބަސީއަށް ރޮކެޓް ޙަމަލާތަކެއްވެސް ވަނީ ދީފައެވެ. އީރާނުގެ އެހީތެރިކަން ލިބޭ ޙިޒްބުالله ބްރިގޭޑްތަކުން ނެރުނު ބަޔާނެއްގައި ބުނެފައި ވަނީ ޢިރާޤުގައި ތިބި އެމެރިކާ އަސްކަރިއްޔާގެ އެންމެ ފަހު މީހާ އެ ޤައުމުން ފުރައިގެންދަންދެން ޙަމަލާތައް ދޭނެ ކަމަށެވެ.