ޙަމާސުން ޔަހޫދީންނަށް ދިން ޙަމަލާއަށް ފަލަސްޠީނުގެ ރައްޔިތުން ތާޢީދު ކުރޭ

އޮކްޓޫބަރު 7 ވަނަ ދުވަހު ޔަހޫދީންނާ ދެކޮޅަށް ޙަމާސްގެ މުޖާހިދުން ހިންގި އަސްކަރީ ޙަރަކާތަށް ފަލަސްޠީނުގެ ގިނަ ރައްޔިތުން ތާޢީދު ކުރާ ކަން ހާމަވެއްޖެއެވެ. އެ ކަން ހާމަވެފައި ވަނީ ފަލަސްޠީނުގެ ސެންޓަރ ފޯ ޕޮލިސީ ސަރވޭ އެންޑް ރީސަރޗުން ނެގި ޕޯލެއްގެ ނަތީޖާއިންނެވެ. އެ ޕޯލުން ފާހަގަވި އަނެއް ކަމަކީ، ޙަމާސް ޖަމާޢަތަށް އޮތް ތާޢީދު ވެސް އެތަކެެއް ގުނައަކަށް އިތުރުވެފައިވާ ކަމެވެ.

ޔަހޫދީންގެ ރަށްތަކަށް އަމާޒުކޮށް ޙަމާސްގެ މުޖާހިދުން ދިން ޙަމަލާއަށް ޕޯލްގައި ބައިވެރިވި މީހުންގެ ތެރެއިން 72 އިންސައްތަ މީހުން ތާޢީދު ކުރާކަމަށް ޕޯލްގެ ނަތީޖާއިން ދައްކައެވެ. އެއީ، ޕޯލްގައި ބައިވެރިވި މީހުންގެ ތެރެއިން ޣައްޒާގެ ރައްޔިތުންގެ 52 އިންސައްތައާއި، ހުޅަނގު އައްސޭރީގައި ދިރިއުޅޭ ރައްޔިތުންގެ 85 އިންސައްތައެވެ. ހުޅަނގު އައްސޭރީގައި ވެރިކަން ކުރާ ޕަލަސްޓީނިޔަން އޮތޯރިޓީ (ޕީއޭ)ގެ ރައީސް މަޙްމޫދް އައްބާސްގެ ނިންމުންތަކާ މެދު ހިތްހަމަޖެހޭ ކަމަށް ބުނެފައި ވަނީ ޕޯލްގައި ބައިވެރިވި މީހުންގެ ތެރެއިން އެންމެ 11 އިންސައްތަ މީހުންނެވެ.

މި ޕޯލްގެ ނަތީޖާ ޢާންމު ކޮށްފައި ވަނީ، ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޢުދުވާނުގައި ޝަހީދު ކުރަމުންދާ މީހުންގެ ޢަދަދާ މެދު މުޅި ދުނިޔެއިން ކަންބޮޑުވުން ފާޅު ކުރަމުންދާ ދަނޑިވަޅެއްގައެވެ. އޮކްޓޫބަރު 7 ގައި ޔަހޫދީން ފެށި ޢުދުވާނުގެ ކުރިން ނަގާފައިވާ ޕޯލްތަކަށްވުރެ ފަލަސްޠީނުގެ ރައްޔިތުންގެ މެދުގައި ޙަމާސް ޖަމާޢަތަށް އޮތް ތާޢީދު ވެސް ވަނީ އިތުރުވެފައެވެ. ހުޅަނގު އައްސޭރީގައި ދިރިއުޅޭ ފަލަސްޠީނުގެ ރައްޔިތުންގެ ތާޢީދު ވަނީ ތިންގުނައަށް އިތުރުވެފައެވެ.

ޕޯލްގެ އެހެން ނަތީޖާތަކަށް ބަލައިލާއިރު، 44 އިންސައްތަ މީހުން ބުނީ އެންމެ ދުވަހަކަށް ފުދޭ މިންވަރަށް ކާބޯތަކެތި ހުރި ކަމުގައެވެ. 56 އިންސައްތަ މީހުން ބުނީ، އެންމެ ދުވަހަކު ބަނޑުފުރާނަ މުއްތިކުރެވޭ މިންވަރަށް ވެސް ކާބޯތަކެތި ނެތް ކަމުގައެވެ. ޕޯލްގެ ބައިވެރިންގެ ތެރެއިން 64 އިންސައްތަ މީހުން ބުނީ، ޔަހޫދީންގެ ޢުދުވާނުގައި އެ މީހުންގެ ޢާއިލާގެ މެންބަރުން ޝަހީދު ކޮށްލާފައިވާ ކަމުގައެވެ.

އޮކްޓޫބަރު 7 ވަނަ ދުވަހު ޔަހޫދީންނަށް އަމާޒުކޮށް ޙަމާސްއިން ދީފައިވާ ޙަމަލައަކީ ފާއިތުވި 75 އަހަރުގެ ތެރޭގައި ޔަހޫދީ ދަޢުލަތަށް އަމާޒުކޮށް ދީފައިވާ މި ފަދަ އެންމެ ނުރައްކާތެރި ޙަމަލާއެވެ. އެ ޙަމަލާގައި ޔަހޫދީންގެ 1,200 އެއްހާ މީހުން މަރުވިއެވެ. އަދި 240 ވަރަކަށް މީހުން ރަހީނު ކޮށްގެން ޣައްޒާއަށް ގެންގޮސްފައެވެ.

އެ ޙަމަލާތަކުގެ ބަދަލު ހިފުމުގެ ގޮތުން ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ފެށި ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 18,600 އަށް އުފުލިފައެވެ. އޭގެ ތެރޭގައި 6,000 އަށްވުރެ ގިނަ ޢަދަދަކަށް ކުޑަކުދިން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 50,000 އަށް އަރާފައެވެ.