ވިލާތުގެ އިއްތިޙާދުގެ މެމްބަރުކަން ޔޫކްރެއިނަށް ދިނުމާމެދު މަޝްވަރާތައް ކުރުމަށް ހުޅުވައިލައިފިއެވެ. ވިލާތުގެ އިއްތިޙާދުގެ އެ ނިންމުމަކީ ޔުކުރެއިންއަށް ލިބުނު ކާމިޔާބެއް ކަމަށް އެ ޤައުމުގެ ރައީސް ވޮލޮޑިމިއަރ ޒެލެންސްކީ ވަނީ ވިދާޅުވެފައެވެ.
ވިލާތުން އެ ގޮތަށް ނިންމިކަން ޢިއުލާނުކުރީ އެ އިއްތިޙާދުގެ ކައުންސިލް ރައީސް ޗާލްސް މިޝެލް އެކްސްގައި ކުރެއްވި ޕޯސްޓެއްގައެވެ. އަދި އެ ނިންމުމަކީ ޔޫކްރެއިނަށާއި އެ ވިލާތުގެ ބައްރަށް ލިބުނު އުންމީދެއް ކަމަށް މިޝެލް ވިދާޅުވިއެވެ.
ޔުކްރެއިނަށް މެމްބަރުކަން ދިނުމާމެދު އިއްތިޙާދުން މަޝްވަރާތަކަށް ހުޅުވައިލަފައިމިވަނީ ވިލާތުގެ އިއްތިޙާދުގެ މެމްބަރަކަށް ވުމަށް ހުށަހަޅާފައިވާ ޤައުމެއްގެ ގޮތުގައި ވިލާތުގެ ކައުންސިލުން ޔޫކްރެއިން ބަލައިގަތްތާ ގާތްގަނޑަކަށް ދެ އަހަރު ފަހުންނެވެ. ވިލާތުގެ އިއްތިޙާދު މެމްބަރަކަށްވުމުގެ ޝައުޤުވެރިކަން ޔޫކްރެއިންނުން ވަނީ މީގެ 10 ވަރަކަށް އަހަރު ކުރިން ފާޅުކޮށްފައެވެ.
ވިލާތުގެ އިއްތިޙާދުގެ އެ ނިންމުމަށް މެމްބަރު ޤައުތަކުން ތާޢީދުކުރި ނަމަވެސް ހަންގޭރީގެ ބޮޑުވަޒީރު ވިކްޓަރ އޯބަންގެ ވަނީ އެކަމާ ދެކޮޅު ހައްދަވައިފައެވެ. ހަންގޭރީއަކީ ރަޝިއާއާ ގާތް ގުޅުމެއް އޮންނަ ޤައުމެކެވެ. ވިލާތުގެ އިއްތިޙާދަކީ 27 މެމްބަރުގެ ޤައުމުގެ މައްޗަށް އެކުލެވޭ އިއްތިޙާދެކެވެ.