ޣައްޒާގެ ދެކުނުގައި އޮންނަ ރަފަޙަށް ޔަހޫދީ ފައުޖުން ދިން ރަޙުމު ކުޑަ ޙަމަލާތަކެއްގައި 25 އަށްވުރެ ގިނަ މީހުން ޝަހީދު ކޮށްލައިފިއެވެ. ރަފަޙަކީ ޣައްޒާއާއި މިޞްރު ގުޅޭ ސަރަޙައްދީ ރޮނގު ކައިރީގައި އޮންނަ ރަށެކެވެ. އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީން ފެށި ލާއިންސާނީ ޢުދުވާނުން ސަލާމަތްވާން އެތަކެއް ސަތޭކަ ހާސް ބަޔަކު ވަނީ ރަފަޙަށް ދަތުރު ކޮށްފައެވެ. އެ މީހުން ދިރިއުޅެނީ ތޮއްޖެހިފައިވާ ޢިމާރާތްތަކާއި މަގުތަކުގެ މަތީގައި ޖަހާފައިވާ ޓެންޓުތަކުގައި ވަރަށް ނިިކަމެތި ހާލުގައެވެ.
ރަފަޙަށް އެންމެ ފަހުން ދިން ޙަމަލާތައް އަމާޒު ކޮށްފައި ވަނީ ޢާންމުން ދިރިއުޅޭ ދެ ޢިމާރާތަކަށެވެ. އެއީ، ޖެހިޖެހިގެން ހުންނަ ދެ ޢިމާރާތެވެ. އެ ޙަމަލާތަކުގައި އެ ދެ ޢިމާރާތުގައި ދިރިއުޅޭ އަބޫ ޟަބީ އަދި ޢާޝޫރް ޢާއިލާގެ ހުރިހާ މެންބަރުން ޝަހީދުވެފައިވެއެވެ.
"ޔަހޫދީންގެ ޙަމަލާގައި އަޅުގަނޑުގެ މަންމައާއި، ދެ ބޭބެއާއި، އެ ދެ މީހުން އަނބިން ވަނީ ޝަހީދު ކޮށްލާފައި. އެ މީހުންގެ ދަރިން ވެސް ވަނީ ޝަހީދު ކޮށްލާފައި. އަޅުގަނޑުގެ މާމަގެ ފުރާނަ ނެތް މަސްގަނޑު ވެސް ވީ ސުންނާފަތި ކޮށްލާފައިވާ ޢިމާރާތުގެ ދަށުގައި،" ޢާޝޫރް ޢާއިލާގެ އަންހެނަކު ބުންޏެވެ. ޔަހޫދީންގެ ރަޙުމު ކުޑަ ޙަމަލާ ދިން ވަޤުތު ޢިމާރާތުގައި 50 ވަރަކަށް މީހުން ތިބި ކަމުގައި އެ ޢާއިލާގެ އެހެން މެންބަރަކު ބުންޏެވެ.
"ރަފަޙުން އިވެމުން ދަނީ ޒަޚަމުވެފައިވާ މީހުންގެ ކެކުޅުމުގެ އަޑު. ޝަހީދު ކޮށްލާފައިވާ މީހުންގެ ޢާއިލާގެ މެންބަރުންގެ ރުއިމުގެ އަޑު. މިއީ، ރައްކާތެރި ރެފިއުޖީ ކޭމްޕެއް. މި ތަނުގައި އެއްވެސް އެއްޗެއް ނެތް. މި ތަނަށް ޙަމަލަދޭން ޖެހޭ އެއްވެސް ސަބަބެއް ނެތް. ޔަހޫދީން ބޮން އަޅަމުން ދަނީ ކުޑަކުދިން މަގުތަކުގައި ފުޓުބޯޅަ ކުޅެއް ތިއްބާ،" ރަފަޙްގައި ދިރިއުޅޭ ރައްޔިތެއް ކަމުގައިވާ ފަޟްލު ޝަޢުބާން ބުންޏެވެ.
ޣައްޒާގެ ޞިއްޙަތާ ބެހޭ ވުޒާރާއިން ބުނީ ރަފަޙަށް ޔަހޫދީ ފައުޖުން އެންމެ ފަހުން ދިން ޙަމަލަތަކުގައި 26 މީހަކު ޝަހީދު ކޮށްލާފައިވާ ކަމުގައެވެ. އަދި، ފާއިތުވި 48 ވަރަކަށް ގަޑިއިރުގެ ތެރޭގައި ދީފައިވާ ތަފާތު އެކި ޙަމަލަތަކުގައި 303 މީހުން ޝަހީދުކޮށްލައި އެތަކެއް ސަތޭކަ ބަޔަކު ޒަޚަމު ކޮށްލާފައިވާ ކަމުގައެވެ.
ޣައްޒާގެ އުތުރުގައިވާ ރަށްތަކަށް ވެސް ޔަހޫދީ ފައުޖުން ދަނީ މެދުކެނޑުމެއް ނެތި ބޮން އަޅަމުންނެވެ. އަދި، ޔަހޫދީ ސިފައިން ދަނީ އެ ސަރަޙައްދުތަކުގައި ހަރަކާތްތެރިވަމުންނެވެ. ޣައްޒާގެ ޞިއްޙަތާ ބެހޭ ވުޒާރާއިން ބުނީ، ޔަހޫދީ ސިފައިންގެ ބައިގަނޑެއް ޖަބާލިޔާގައި ހުންނަ ހޮސްޕިޓަލަކަށް ވަދެ، އެ ތަނުގެ ތެރޭގައި ޢުދުވާން ހިންގަމުންދާ ކަމުގައެވެ. އަދި، އެ ތަނުގައި މަސައްކަތް ކުރާ މުވައްޒަފުން ހައްޔަރުކޮށް، ބިރުދައްކައި، އަނިޔާ ކުރަމުންދާ ކަމުގައެވެ. އެ ހޮސްޕިޓަލުގެ އައި.ސީ.ޔޫގައި 12 ކުޑަކުދިންނަށް ފަރުވާދެމުންދާ ކަމުގައި އެ ވުޒާރާގެ ތަރުޖަމާނު އަޝްރަފް އަލް-ޤުދްރާ ވިދާޅުވިއެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 18,700 އަށް އުފުލިފައެވެ. އޭގެ ތެރޭގައި 6,000 އަށްވުރެ ގިނަ ޢަދަދަކަށް ކުޑަކުދިން ވެސް ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 50,000 އަށްވުރެ މައްޗަށް އަރައެވެ.