ޗައިނާގެ ހުޅަނގު އުތުރުގައި އޮންނަ ފަރުބަދަމަތީ ގަންސޫ ޕްރޮވިންސުގެ ޖިޝިޝާން އަވަށަށް އައި ބާރުގަދަ ބިންހެލުމާއި ގުޅިގެން 111 މީހުން މަރުވެއްޖެއެވެ. އެ ހާދިޘާގައި 230އަށްވުރެ ގިނަ މީހުންނަށް ވަނީ އެކި ވަރުގެ އަނިޔާތައް ލިބިފައެވެ.
ޗައިނާގެ ބިންހެލުންތަކާ ބެހޭ މަރުކަޒުން ބުނީ ރޭ ދަންވަރު އައި އެ ބިންހެލުމަކީ ރިކްޓަރ މިންގަނޑުން 5.9ގެ ބާރުމިނުގައި 10 ކިލޯމީޓަރު އަޑިން އައި ބިންހެލުމެކެވެ. އެ ބިންހެލުމުގެ ސަބަބުން ބިމާ ހަމަވެފައިވާ ޢިމާރާތްތަކުގެ ދަށުގައި ތިބި މީހުން ސަލާމަތްކުރުމުގެ މަސައްކަތް އަންނަނީ ކުރަމުންނެވެ. މީހުން ސަލާމަތްކުރުމުގެ މަސައްކަތަށާއި ޙާދިޘާއާ ގުޅޭ އެހެނިހެން މަސައްކަތްތަކުގައި ގާތްގަޑަކަށް 2،200 މީހުން ބިންހެލުންއައި ސަރަޙައްދުގައި އަންނަނީ މަސައްކަތްކުރަމުންނެވެ. ބިންހެލުމުގެ ސަބަބުން ގަންސޫ ޕްރޮވިންސްގެ ކަރަންޓު ކެނޑި، މުވާސަލާތީ ޚިދުމަތާއި ދަތުރުފަތުރަށް ވެސް ވަނީ ބުރޫއަރައިފައެވެ.
ގަންސޫއަށް އައި ބިންހެލުމުގެ އަސަރު ކައިރި އެހެން ޕްރޮވިންސަތަކަށް ވެސް ކޮށްފައިވެއެވެ. އެގޮތުން ބިންހެލުމުގެ އަސަރުކޮށްގެން ގިންހައި ޕްރޮވިންސުން 11 މީހަކު ވަނީ މަރުވެފައެވެ.
ގަންސޫ ފަދަ ޗައިނާގެ ހުޅަނގުގައި އޮންނަ ގިނަ ސަރަޙައްދުތަކަކީ ބިންހެލުންތައް ޢާންމު ސަރަޙައްދުތަކެކެވެ. ފާއިތުވި ދިހަވަރަކަށް އަހަރުގެ ތެރޭގައި ޗައިނާއަށް އައި އެންމެ ނުރައްކާތެރި ބިންހެލުމަކީ 2008 ވަނަ އަހަރު ރިކްޓަރ މިންގަނޑުން 8.0ގެ ބާރުމިނުގައި ޗައިނާގެ ސިޗުއާންއަށް އައި ބިންހެލުމެވެ. އެ ފަހަރު ގާތްގަނޑަކަށް 70،000 މީހުން މަރުވެފައިވެއެވެ.