ބިންހެލުމާގުޅިގެން ރައީސްގެ ތަޢުޒިޔާ ޗައިނާއަށް

ޗައިނާގެ ގަންސޫ ޕްރޮވިންސަށް ކުރިމަތިވި ބިންހެލުމާ ގުޅިގެން އެތައްބަޔަކު މަރުވެ، އެތައްބަޔަކު ޒަޚަމްވެ އެތައްބަޔަކަށް އަސަރުކޮށް ކުރިމަތިވެފައިވާ ހާދިސާއާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޗައިނާގެ ރައީސް ޝީ ޖިންޕިންއަށް ތަޢުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާގެ މެސެޖުގައި މި ހާދިސާގެ ޚަބަރު އެއްސެވީ ފުންހިތާމައާއެކުކަން ފާހަގަކުރައްވައި ހިތާމައިގެ މި ދަނޑިވަޅުގައި، ދިވެހި ސަރުކާރާއި ރައްޔިތުންނާއި، ރައީސުލްޖުމްހޫރިއްޔާގެ އަމިއްލަ ނަންފުޅުގައި، ޗައިނާގެ ރައީސާއި، ސަރުކާރަށާއި، ރައްޔިތުންނަށާއި، ޚާއްޞަކޮށް މަރުވި މީހުންގެ ޢާއިލާތަކަށް އިޚްލާޞްތެރިކަމާއެކު ހަމްދަރުދީ ފޮނުއްވިއެވެ.

ރައީސުލްޖުމްހޫރިއްޔާގެ މެސެޖު ނިންމަވާލެއްވީ މި ޙާދިސާގެ ސަބަބުން ލިބުނު ގެއްލުންތަކުން އަރައިގަތުމަށް ކުރެވެމުންދާ މަސައްކަތުގައި ކާމިޔާބީއަށް އެދިވަޑައިގަންނަވަމުންނެވެ.

ޗައިނާގެ ހުޅަނގު އުތުރުގައި އޮންނަ ފަރުބަދަމަތީ ގަންސޫ ޕްރޮވިންސުގެ ޖިޝިޝާން އަވަށަށް އައި ބާރުގަދަ ބިންހެލުމާއި ގުޅިގެން 111 މީހުން ވަނީ މަރުވެފައެވެ. އަދި މި ހާދިސާގައި 230 އަށްވުރެ ގިނަ މީހުންނަށް އެކި ވަރުގެ އަނިޔާތައް ލިބިފައިވާކަމަށް ރިޕޯޓުކޮށްފައިވެއެވެ.

ޗައިނާގެ ބިންހެލުންތަކާ ބެހޭ މަރުކަޒުން ބުނީ މި ބިންހެލުމަކީ ރިކްޓަރ މިންގަނޑުން 5.9 ގެ ބާރުމިނުގައި 10 ކިލޯމީޓަރު އަޑިން އައި ބިންހެލުމެއްކަމަށެވެ. މި ބިންހެލުމުގެ ސަބަބުން ބިމާ ހަމަވެފައިވާ ޢިމާރާތްތަކުގެ ދަށުގައި ތިބި މީހުން ސަލާމަތްކުރުމުގެ މަސައްކަތް އަންނަނީ ކުރަމުންނެވެ.

މީހުން ސަލާމަތްކުރުމުގެ މަސައްކަތަށާއި، ޙާދިސާއާ ގުޅޭ އެހެނިހެން މަސައްކަތްތަކުގައި ގާތްގަނޑަކަށް 2200 މީހުން ބިންހެލުންއައި ސަރަޙައްދުގައި އަންނަނީ މަސައްކަތްކުރަމުންނެވެ. ބިންހެލުމުގެ ސަބަބުން ގަންސޫ ޕްރޮވިންސްގެ ކަރަންޓު ކެނޑި، މުވާސަލާތީ ޚިދުމަތާއި ދަތުރުފަތުރަށްވެސް ވަނީ ބުރޫއަރައިފައެވެ.